جۇما, 28 اقپان 2020
بيلىك 3972 0 پىكىر 29 مامىر, 2014 ساعات 13:18

ترانسفورماتسيا - قوزعاۋشى كۇش

«سامۇرىق-قازىنا» اق باسشىلىعى، قور كومپانيالارى توبىنىڭ تاۋەلسىز ديرەكتورلارىمەن جانە توپ-مەنەدجمەنتىمەن كەزدەسۋ بارىسىندا، ەلباسى تاپسىرماسى بويىنشا جاسالىپ جاتقان ترانسفورماتسيا باعدارلاماسىن تالقىعا سالدى. قور كومپانيالارى توبىنىڭ تاۋەلسىز ديرەكتورلارى اتالعان باعدارلامانى جوعارى باعالاپ، ونى ۇلتتىق بيزنەس اياسىنداعى ەكونوميكاعا سەرپىن بەرۋشى قۋاتتى تەتىك دەپ اتادى، دەپ حابارلايدى اق ءباسپاسوز قىزمەتى.

«سامۇرىق-قازىنا» اق تاۋەلسىز ديرەكتورى سەر ريچارد ەۆانستىڭ سوزىنە قاراعاندا، قور كومپانيالارى توبىنىڭ بيزنەسىن وزگەرىسكە ۇشىراتۋ باعدارلاماسى ەكونوميكالىق جاڭعىرۋلاردىڭ قوزعاۋشى كۇشىنە اينالىپ، جوعارى تەحنولوگيالى، ءتيىمدى ءارى وزىندىك قۇنىن اقتاۋشى جوبالاردىڭ سانى مەن ساپاسىن، كىرىسىن ارتتىرۋعا مۇمكىندىك بەرمەك. «ترانسفورماتسيا – العا جىلجۋدىڭ قۇنارلى ازىعى. ءبىز ۇزاق جولدىڭ باسىندا تۇرعانىمىزدى، ترانسفورماتسيا شەڭبەرىندە ديرەكتورلار كەڭەسى اكتسيونەرلەردەن ەنشىلەس كومپانيالاردىڭ باسقارمالارىنا بەلگى بەرۋدە ارالىق دەلدال بولاتىنىن ءتۇسىنۋىمىز كەرەك. مەملەكەتتىك مەكەمەلەر – بۇل ءبىزدىڭ ينتەگرالدىق سەرىكتەستەرىمىز. مينيسترلىكتەرگە ولاردىڭ اتالمىش ۇدەرىستەن سىرت قالا المايتىندارىن جەتكىزگەنىمىز ابزال»، – دەيدى ول.

سەر ەۆانستىڭ اقپاراتىنا سۇيەنسەك، بىرنەشە اپتا مەرزىمىندە، كومپانيا قۇنىن ارتتىرۋدا نەگىزگى ولشەۋ قۇرالىنا اينالاتىن، EVA (economic value added – ەكونوميكالىق قوسىمشا قۇن) ستراتەگيالىق كورسەتكىشىنە قاتىستى جۇمىس اياقتالادى. «ماۋسىم ايىنىڭ اياعىنا تامان بارلىق ۇلتتىق كومپانيالاردىڭ ديرەكتورلار كەڭەسىنىڭ قۇپتاۋىن الماق رايدامىز. الايدا تەك EVA كورسەتكىشىمەن شەكتەلىپ قالماۋ ءجون دەپ سانايمىز. ماسەلەن، باعدارلاماعا الەۋمەتتىك تۇراقتىلىق رەيتينگىن دە قوسۋ كەرەك. ەكونوميكالىق قۇرامداس بولىككە عانا ناقتى نازار اۋدارىپ قويماي، وزگە دە باسىمدىققا يە ماسەلەلەر بويىنشا اشىقتىقتىڭ بولۋى ماڭىزدى»، – دەپ جالعاستىردى ول. 

«بيزنەس-ترانسفورماتسيا – بۇل ءار ۇلتتىق كومپانيانىڭ جاۋاپكەرشىلىگى»، – دەپ ارىپتەستەرىنىڭ پىكىرىن قولدايدى «سامۇرىق-قازىنا» اق تاۋەلسىز ديرەكتورى نايدجەل ستەيپلتون. «تاۋەلسىز ديرەكتور رەتىندە مەن مۇنداي ماسەلەدە كوپ سىنالدىم. دەگەنمەن، مىناۋ ەڭ ءبىر كۇردەلىسى، اۋقىمدىسى بولىپ تۇر. وعان سالعىرتتىق تانىتۋعا بولمايدى. بىراق ءبارىمىز بۇل سىندى ەرىكتى ءارى قۋانىشتى تۇردە قابىلدايمىز دەگەن ويدامىن. باعدارلامانى ديرەكتورلار كەڭەسى دەڭگەيىندە قامتاماسىز ەتۋ ءۇشىن نە ىستەۋگە بولاتىنىن بارشامىز جاپپاي ويلاستىرايىقشى»، - دەدى ول كەزدەسۋدە.

بيزنەس-ترانسفورماتسيانى وتكىزۋدە تابىسقا جەتۋ ءۇشىن ۇلتتىق كومپانيالار وزگەرىستەردى باسقارا الاتىن جاعدايدا بولۋ كەرەك، دەپ سانايدى نايدجەل ستەيپلتون. انىعىراق ايتساق، شەشىم قابىلداۋداعى جاۋاپكەرشىلىك كومپانيا باسشىلىعى دەڭگەيىندە توقىراپ قالماي، ءارى قاراي تەرەڭىرەك، ماڭىزدى ماسەلەلەرگە تسەحتاردا، شەبەرحانالاردا، ت.ب. جەرلەردە جۇمىس ىستەيتىن قاراپايىم ەڭبەك ادامدارى اتسالىساتىن ۇدەرىستى قامتاماسىز ەتۋ قاجەت. «بۇل ۇلتتىق كومپانيالار ەڭسەرۋى ءتيىس ۇلكەن وزگەرىستەر سۋبسيديارلىق ۇستانىم دەپ اتالادى»، – دەپ ويىن ءبىلدىردى ول.

جوعارىدا كەلتىرىلگەننەن بولەك، ۇلتتىق كومپانيالار جوبالىق باسقارۋ مەن ولاردى جۇزەگە اسىرۋ تاسىلدەرىن يگەرۋ كەرەك، دەگەن پىكىردە نايدجەل ستەيپلتون. «جوبالىق باسقارۋ بىرنەشە باعىتقا تارماقتالعان. بۇل باعىتتاردىڭ ارقايسى ءبىر ارنادا توعىسىپ وتىرۋى ءتيىس. سوندىقتان جوبالىق باسقارۋدىڭ اسا ماڭىزدىلىعىن تۇسىنگەن ءجون»، - دەپ بايىپتادى ول.

«مەن ءۇشىن ترانسفورماتسيا – بۇل تابيعي جانە ساپالى وزگەرىس قادامى. بيزنەستى ترانسفورماتسيالاۋ ماسەلەلەرىن تالقىلاۋ كەزىندە، ءبىز، ياعني ديرەكتورلار كەڭەسىنىڭ مۇشەلەرى جايباراقاتتىق اۋقىمىنان شىققانداي كۇيگە ەندىك. ەندىگى شەشەتىن ماسەلەسى بايىبىنا بارساق، نە ءبىز ساپالىق تۇرعىدا وزگەرەمىز، نە بۇل تۇيتكىلدەردى تارقاتۋعا وزگە ادامدار كىرىسەدى. ءبىزدىڭ جۇمىسىمىزدى تۇبەگەيلى وزگەرتۋ اۋاداي قاجەت دۇنيە. مىندەتىمىز – بۇل ۇدەرىستەردى قابىلداي ءبىلىپ، ولارعا بەيىمدەلۋ»، – دەپ ويىن ساباقتادى «قازپوچتا» جانە «قازترانسگاز» كومپانيالارىنىڭ تاۋەلسىز ديرەكتورى جانات بەردالينا. 

ساراپشىلاردىڭ پىكىرىنشە، «سامۇرىق-قازىنا» كومپانيالار توبىن ترانسفورماتسيالاۋ تالپىنىسى، قوردى ەنشىلەس كومپانيالاردىڭ كۇندەلىكتى قىزمەتىنە ارالاسپاي، تەك ستراتەگيالىق ماسەلەلەرمەن شۇعىلداناتىن جوعارى ءتيىمدى ءارى بىلىكتى كەڭەسشى دەڭگەيىنە كوتەرەدى. «ترانسفورماتسيا باعدارلاماسى – مەنەدجمەنت توبىمەن عانا شەكتەلمەي، ديرەكتورلار كەڭەسىن دە ساراپتايتىن وتە جاۋاپتى باسقارۋ بەتبۇرىسى. استانا ەكونوميكالىق فورۋمىندا كورپوراتيۆتىك باسقارۋ ءرولىن كۇشەيتۋ ماسەلەسى كوتەرىلگەنى بەلگىلى. انىعىراق ايتساق، ديرەكتورلار مەن كورپوراتيۆتىك باسقارۋ ينستيتۋتىن قۇرۋ جايى تالقىلاندى. ءوز باسىم، «سامۇرىق-قازىنا» قورىن امال-تاسىلدەرى ايقىندالعان، ساياسي باعدارى مەن تاجىريبەسى تۇزىلگەن كورپوراتيۆتىك باسقارۋدىڭ جەتەكشى توبى دەپ ەسەپتەيمىن. سوندىقتان ول كورپوراتيۆتىك باسقارۋدىڭ ۇلتتىق جۇيەسىن جاساۋدىڭ ادىستەمەلىك نەگىزى بولۋى ءتيىس»، – دەپ اتاپ ءوتتى «قازمۇنايتەڭىز» كومپانياسىنىڭ تاۋەلسىز ديرەكتورى الەكساندر فيلاتوۆ. 

Abai.kz

0 پىكىر