سارسەنبى, 1 ءساۋىر 2020
وزگەلەر 3182 0 پىكىر 26 مامىر, 2014 ساعات 18:01

ۋكراينادا سايلاۋ ءوتتى. كيەۆ پەن كرەمل ەندى قالاي بولار ەكەن

ۋكراينادا كوپتەن كۇتكەن سايلاۋ ءوتتى. ۋكراينا بايلارىنىڭ تىزىمىندە  جەتىنشى بولىپ تۇرعان پارلامەنت دەپۋتاتى پورەشەنكو 53,86% داۋىس جيناپ جەڭىسكە جەتتى. كەشە، 25 ماۋسىمدا وتكەن سايلاۋعا ەلدىڭ 60%-دان استام سايلاۋشىلارى قاتىستى. ۋكراينانىڭ ەكس-پرەمەرى، ءارى پرەزيدەنتتىككە باستى كانديدات يۋليا تيموشەنكو 13,10% داۋىس جينادى. باتىستىق اقپارات كوزدەرى سايلاۋ كەزىندە قۇقىق بۇزۋشىلىقتاردىڭ تىركەلمەگەنىن جەتكىزدى. سايلاۋ كەزىندە ەلدىڭ شىعىسىنداعى لۋگانسك پەن دونەتسك وبلىستارىندا دا از ساندى سايلاۋ ۋچاسكەلەرى اشىلعان. دەگەنمەن رەسەيشىل سەپەراتيستەر دەمونستراتسيالار مەن پيكەتتەر وتكىزىپ، سايلاۋعا كەدەرگى كەلتىرىپ باققان. ۋكراينانىڭ باس پروكۋرورى نيكولاي گوشوۆسكي سايلاۋ كەزىندەگى 85% قۇقىق بۇزۋشىلىق اتالعان وڭىردە تىركەلدى دەيدى.

ۋكرايناداعى سايلاۋدا كۇتپەگەن  جاعداي تىركەلمەدى. سايلاۋدىڭ العاشقى ناتيجەلەرىنەن-اق العا شىققان پورەشەنكو سايلاۋ بىتەر-بىتپەستەن ءباسپاسوز كونفەرەنتسياسىن وتكىزدى. العاشقى ءىسى ەلدىڭ شىعىسىنداعى جاعدايدى تۇراقتاندىرۋ بولاتىنىن ايتقان ول، قىرىمدى رەسەيدىڭ بولىگى رەتىندە مويىندامايتىنىن دا جەتكىزدى. سونداي-اق ول بيلىككە كەلە سالا ەۋرووداقپەن بايلانىستى نىعايتپاق. قازىرگە دەيىن پوروشەنكونىڭ جەڭىسىن اقش پەن ءبىر قاتار باتىس ەلدەرى  مويىنداپ، قۇتتىقتاۋلار ايتتى. پولشا پرەزيدەنتى برونيسلاۆ كوموروۆسكي  تەلەفون ارقىلى پورەشەنكونى  قۇتتىقتاپ، ماۋسىم ايىنىڭ 3-4 كۇندەرىندە ەلگە رەسمي ساپارمەن كەلۋگە شاقىردى.

ۋكراينادا بىلتىر كۇزدەن باستالعان ساياسي تۇراقسىزدىقتار پرەزيدەنت يانۋكوۆيچتى  اقپان ايىندا بيلىكتەن كەتۋگە ءماجبۇر ەتكەن ەدى. ۋكراينا شىعىسىنداعى قىرىم، دونەتسك، لۋگانسك وبلىستارى ءبۇلىنىپ، ءوز الدىنا سايلاۋ وتكىزىپ تاۋەلسىزدىك جاريالادى. الەم ەلدەرى ۋكراينانىڭ جاڭا بيلىگى ەلدەگى ساياسي تۇراقسىزدىقتى قالپىنا كەلتىرە الادى دەپ ءۇمىت ارتادى. ۋكراينادا بولىپ جاتقان ساياسي جاعدايعا تىكەلەي بايلانىستى رەسەي بيلىگى بۇگىن جاڭا بيلىكپەن ارىپتەستىك ورناتۋعا دايىن ەكەنىن جەتكىزدى. بۇعان دەيىن رەسەيگە ۋكراينانىڭ ەۋرووداقپەن جاقىن قارىم-قاتىناس ورناتۋى ۇناماي كەلگەن بولاتىن. سونداي-اق، ۋكراينا ناتو-عا مۇشە بولۋعا دا مۇددەلىلىك تانىتىپ ءجۇر. پورەشەنكو ەلدىڭ دامۋىن جۇيەگە ءتۇسىرىپ، مەملەكەتتىك تۇتاستىقتى قالپىنا كەلتىرەتىن ساياسي قادامدار جاساي الا ما، بۇل ساۋالدىڭ جاۋابىن الداعى كۇندەردەن كۇتەمىز. ەڭ باستىسى رەسمي كيەۆ پەن كرمەلدىڭ اراسىندا قانداي قارىم-قاتىناس ورنار ەكەن؟..

 

نۇرعالي نۇرتاي

Abai.kz 

 

 

0 پىكىر