بەيسەنبى, 23 قىركۇيەك 2021
قازاقتىڭ ءتىلى 4319 0 پىكىر 23 مامىر, 2014 ساعات 09:09

اقوردا سايتى وقىرماندارى رەسەيلىكتەر مە؟

قازاقستان پرەزيدەنتىڭ رەسمي سايتى http://www.akorda.kz/ -ءتى نە جازىلدى ەكەن دەپ كۇن قۇرعاتپاي اشىپ تۇرامىن. قاشاندا رەسەيدىڭ مەملەكەتتىك تىلىمەن اشىلادى. ارينە قازاق تىلىندەگى بەتى بار، بىراق جارىق ەتىپ شىعا كەلگەننەن سوڭ امالسىز ورىس تىلىندەگى اقپاراتقا كوز جۇگىرتەسىڭ. سوسىن قازاق تىلىنە اۋىستىرا قالساڭ جاڭا عانا وقىعان اقپاراتىڭ جوق، ەسكى اقپاراتتار تۇرادى. بۇل ءجايتتى ءبىر اقوردا سايتى ەمەس، رەسمي بيلىكتىڭ ءبىر قاتار سايتتارىنان بايقادىم.

ولار:

http://www.constcouncil.kz/ - قازاقستان رەسپۋبليكاسىنىڭ كونستيتۋتسيالىق كەڭەسى سايتى;

http://www.mint.gov.kz/ - يندۋستريا جانە جاڭا تەحنولوگيالار مينيسترلىگى سايتى;

http://www.edu.gov.kz/ - ءبىلىم جانە عىلىم مينيسترلىگى سايتى;

http://www.eco.gov.kz/new2012/ - قورشاعان ورتانى قورعاۋ جانە سۋ رەسۋرستارى مينيسترلىگى سايتى.

سونداي-اق ءبىر قاتار سايتتار قازاق تىلىندە اشىلعانىمەن توبەسىندەگى اتاۋى ورىس تىلىندە جازىلىپ تۇرادى. بۇلاردىڭ جانىندا پرەمەر-مينيستر كارىم ءماسىموۆتىڭ رەسمي سايتى قازاق تىلىندە اشىلادى.

 پرەزيدەنت نازارباەۆتىڭ قازاقستان حالىقتارى اسسامبلەياسىنىڭ 20 سەسسياسىندا «بۇگىندە ۇلتتى بىرىكتىرۋشى باستى فاكتور قازاق ءتىلى – مەملەكەتتىك ءتىل بولىپ وتىر»، - دەگەن ءسوزى بار ەدى. پرەزيدەنت ىلعي دا جينالىستاردا «قازاق ءتىلىن» بۇقارالىق قولدانىسقا ەنگىزۋ جايىن ايتىپ جۇرەدى. دەگەنمەن ەلباسى نە دەدى ەكەن دەپ ەل ەلەڭدەپ قارايتىن سايتىن باسا قالساڭىز ورىس تىلىندە اشىلاتىنى كوڭىل قىنجىلتادى. ادەتتە كەز كەلگەن مەملەكەتتىك مەكەمەگە قوڭىراۋ شالا قالساڭىز، حاتشى قىزدىڭ ورىس تىلىندە جاۋاپتاساتىنى تاڭقالارلىق جاعداي ەمەس. جوعارعى دەڭگەيدەگى جيىنداردىڭ دەرلىگى دە مەملەكەتتىك ءتىلدى «مازالاپ» جاتپايدى. مەملەكەتتەگى 67%  حالىقتىڭ ءتىلى قاشانعى اياققا تاپتالا بەرمەك؟

نۇرعالي نۇرتاي

Abai.kz

0 پىكىر