اقتوبە قالاسىنىڭ اقساقالدارى بوس ۋاقىتتارىن جەرتولەدە وتكىزەدى. ولاي ەتپەسكە لاجدارى جوق. ساقىلداعان سارى اياز قارتتاردىڭ قاۋقىلداسىپ، حال سۇراسۋىنا ەش مۇمكىندىك  بەرمەيدى. التى اي قىس ىقتاسىن ىزدەپ، ساندالىپ كەتەتىن قارتتاردىڭ ەكى جىلدان بەرگى تۇراعى – ء«اليا» پاتەر يەلەرى كووپەراتيۆىنە قاراستى  ءۇيدىڭ جەرتولەسى بولىپ شىقتى.

 قارتتار جينالاتىن جەرتولە  اعايىندى جۇبانوۆتار كوشەسىندە. ء«اليا»  پاتەر يەلەرى كووپەراتيۆىنىڭ  ءتورايىمى ۆەرا  گريگورەنكو  ىقتاسىن ىزدەگەن  قارتتارعا قارسىلىق بىلدىرمەگەن.  جەرتولەنى  شاحمات ويىنا قاجەتتى ۇستەل، ورىندىقتارمەن  زەينەتكەرلەردىڭ وزدەرى جاساقتاپ الىپتى. ءتىپتى باسى اۋىرىپ، بالتىرى سىزداعاندار جانتايا سالاتىن  كەرەۋەتتەر دە بار. جىلۋ تارتىلماعان قاراڭعى بولمەلەر ازىناپ تۇرعاندىقتان قارتتار ۇنەمى سىرت كيىممەن وتىرادى. جەرتولەنىڭ اتى-جەرتولە. سۋىقتىعى ءوز الدىنا، قۇبىرلاردىڭ بويىمەن سارىلداپ  اققان كارىز سۋىنان دەنەڭ تىتىركەنەدى. 

تىنىشتىق  تۇياقوۆ، ارداگەر (سۋرەتتە):

-         ارامىزدا ەڭبەك ارداگەرلەرى دە، ءار سالانىڭ ۇزدىكتەرى دە بار. بارلىعى 30 ادامبىز. كەزىندە وبلىستىڭ وركەندەۋىنە ءبىر كىسدەي ۇلەس قوستىق. بۇل كۇندە  ء“بالدۋ-ءبالدۋ، ءبارى وتىرىك” سياقتى. كۇن جىلى كەزدە ءاليا  مولداعۇلوۆا داڭعىلى بويىنداعى شاحمات الاڭىندا وينايمىز. اقتوبەدە ء“ساۋىر بولماي، ءتاۋىر بولمايدى” ەمەس پە؟ ءساۋىر ايىنىڭ ورتاسىنا  دەيىن وسىندامىز. قۋىعىنان ماي كەتكەن ۇلكەن ادامداردىڭ جايىن بىلەسىڭدەر، اسىرەسە دارەتحانانىڭ جوقتىعى جانىمىزعا باتادى. جاقىن ماڭداعى ءدامحانانىڭ داياشىلارىنا جامان اتتى بولىپ بىتتىك.

سوعان قاراماستان  ورتالىقتاعى جەرتولەگە   زارەچنىي اۋىلى مەن تۇرعىندار قالاشىعى، ماسكەۋ، وڭتۇستىك باتىس اۋداندارىنان كەلەتىن  قاريالار دا بار ەكەن. قارتتار بەيرەسمي  «كەڭسەلەرىنەن»  اقتوبە قالاسىنىڭ اكىمى ەرحان وماروۆتىڭ اتىنا حات جولداپتى. قالا باسشىلارى قارتتارعا «اقجەلكەن»  اۋلا  كلۋبىندا ء بىر ساعات  شاحمات ويناۋعا  رۇقسات ەتكەن ەكەن. الايدا، بالا-شاعامەن جاعالاسىپ، شەكتەۋلى مەرزىمدە شاحمات ويناۋ قارتتارعا قولايسىزدىق تۋعىزسا كەرەك. كۇن ساۋلەسى تۇسپەيتىن، سۋىق جەرتولەلەرىنە قايتىپ ورالىپتى.

اقتوبە وبلىسىنىڭ  بايعانين  اۋدانىندا  ۇزاق  جىلدار باسشىلىق قىزمەتتە بولعان  شورا اتانتاەۆ تا  (سۋرەتتە) كۇن سايىن زامانداستارىمەن بىرگە. قازاقستاننىڭ اۋىلشارۋاشىلىعى سالاسىنا  ەڭبەگى سىڭگەن  قىزمەتكەر قارتايعاندا «قادىرلەرىنىڭ قاشقانىنا» ناليدى.

-         مۇنايدىڭ ۇستىندە وتىرعان اقتوبەنىڭ اقساقالدارىنا 1 زالدى جاساقتاپ بەرۋ سونشالىقتى قيىن شارۋا –دەپ ويلامايمىن. بارماعان  جەرىمىز، ايتپاعان ادامىمىز جوق. الايدا، ءازىر  ەش ناتيجە بولماي تۇر. 30-40 زەينەتكەر  باس قوسۋعا جارامدى جەر بولسا،  تازالىعىن  ءوز موينىمىزعا الار ەدىك. باتامىزدى بەرەر  ەدىك، -دەيدى  جەرتولەدەگى شاحمات كلۋبىنىڭ مۇشەسى.

جانسايا ەسماعانبەت

jansaya_ar@mail.ru

اقتوبە قالاسى

Abai.kz