قۋات بوراش ءبىرشاما جىلداردان بەرى پرەزيدەنت اكىمشىلىگىندە جاۋاپتى قىزمەت اتقارىپ كەلەدى. ونى «ەگەمەندە» قاتار ىستەگەن جىلداردان بەرى جاقسى بىلەمىن. سىپايى، مادەنيەتتى، ۇلكەندى سىيلاپ تۇراتىن ىزەتتى جىگىت. اقورداعا بارعان سوڭ دا، وندا ءبىرشاما جىلدار قىزمەت ىستەپ، لاۋازىم باسپالداقتارىمەن كوتەرىلىپ بارا جاتسا دا سول مىنەزىنەن وزگەرمەدى. ءبىر قالىپتان جاڭىلماي تۇرادى، وسىنىڭ ءوزى ونىڭ تەكتىلىگىن كورسەتىپ تۇر.

         جاسى بىزدەن كىشى بولسا دا ونىڭ جازعىشتىعىنا، ويىن اسەرلى ەتىپ جەتكىزە الاتىندىعىنا، بايقاعىشتىعىنا قىزىعاتىن ەدىك. اسىرەسە، ساياسي، كۇردەلى تىركەستەردى ءادىپتى دە ماعىنالى ەتىپ ورنىقتىرا بىلەدى. ءتىپتى، بۇرىن قولدانىلا قويماعان ساياسي ورامداردى ءدال تاۋىپ، ەشكىمگە ۇقسامايتىن وزىندىك كەلبەت جاسايتىن شەبەرلىگىنە ريزا بولاسىڭ. مىسالى: «قالتارىستا قالعان قاراجاتتى قازىناعا قايتارۋ» دەيدى ول بىردە. قانداي تاماشا تىركەس. وسىلاي، كىلەڭ ءبىر ارىپتەن باستاپ كوسىلۋگە بولاتىن قازاق ءتىلىن كىم كەدەي دەپ ايتا الار؟ مۇنىڭ ورىسشاسى «ۆەرنۋت نەوسۆوەننىە سرەدستۆا ۆ بيۋدجەت» دەگەن عوي. ورىس تىلىنەن قازاقشاعا سوزبە-ءسوز اۋداراتىن بىلگىشتەر مۇنى: «يگەرىلمەگەن قاراجاتتى بيۋدجەتكە قايتارۋ» دەپ اۋدارار ەدى. ال مۇنداي سوزدەردىڭ وقىرمانعا ەش اسەرى جوق، قاتارداعى قارادۇرسىن اۋدارما، ايتەۋىر مازمۇنى وزگەرمەگەنىنە تاۋبە دەيسىڭ.      

قوپارىپ جازاتىن، قوتارىپ جازاتىن جۋرناليستەر بولادى. بۇل قۇدايدىڭ بەرگەن دارىنىنىڭ ارقاسى. قۋات بوراش تا سوندايدىڭ سويىنان. ونىڭ بۇگىنگى پاتريوتيزم تۋرالى مىنا تۇجىرىمى سوعان دالەل: «بۇگىنگى پاتريوتيزم كوزگە كورىنبەيتىن، كولەڭكەسى قولعا ۇستاتپايتىن مىلتىقسىز مايدان، اقپاراتتىق سوعىستا ءوزىڭنىڭ، تۋعان ەلىڭنىڭ ءبىتىم-بولمىسىن تۇتاستاي ساقتاپ قالۋ جولىندا كۇرەس جۇرگىزۋدىڭ ۇلگى-ونەگەسى. ول ءۇشىن الەمنىڭ استى-ۇستىنەن اعىلىپ-توگىلىپ جاتقان سان الۋان اقپاراتتار تاسقىنىنا توتەپ بەرەر رۋحاني كۇش-جىگەرىڭدى، ۇلتتىق يممۋنيتەتىڭدى شىڭداۋىڭ كەرەك. دالىرەك ايتساق، ەلىڭنىڭ تاريحىن بىلۋگە، داڭقتى بابالارىڭنىڭ ەرلىك شەجىرەسىن ماقتان تۇتۋعا ءارى سولارداي بولۋعا ۇمتىلۋىڭ قاجەت». مىنە، بۇگىنگى پاتريوتيزم دەگەن ناق وسى، وي-پىكىرىڭ بولسا ونى ارمەن قاراي ورىستەتە بەر.      

جۋىردا قۋات بوراشتىڭ كوپ جىلعى پۋبليتسيستيكالىق وي-تولعامدارىنان ورىلگەن «جۇمىر جەردىڭ جۇماعى» اتتى جيناعى جارىق كوردى. مۇندا كوركەم وي مەن كوسەم ءسوز ارقىلى كوپتەگەن قىزىقتى دۇنيەلەر وقىرمانىنا جول تارتىپتى. قازىر از سوزدەرمەن كوپ دەرەكتەر بەرەتىن كىتاپتىڭ عانا وقىلاتىن ۋاقىتى. ءبىر كەزدەگىدەي تابيعاتتى، كوڭىل كۇيدى، ىشكى سەزىمدى ۇزاق سۋرەتتەپ، ءتىلدى بەزەپ، سۋرەت سالىپ وتىراتىن كوركەم كىتاپتار دا، ارتىق سوزدەردى كوپ قوسىپ، ويىن جەدەل جەتكىزە المايتىن پۋبليتسيستيكالىق كىتاپتار دا قازىر وقىلا قويمايدى. وندايلاردى ارنايى زەرتتەيتىن ماماندار عانا وقۋى مۇمكىن. زامان سولاي، زاماننىڭ جىلدامدىعى سونداي. تەز جەتەتىن، تەز باراتىن زاماندا كوپ سوزگە مالتىعۋدىڭ ءوزى ءبىر ازاپ. سوندىقتان دا جۇرتتىڭ كوبى كىتاپ وقىماي كەتتى. ونىڭ ۇستىنە جاڭا دەرەگى جوق كىتاپ تا وقىلمايدى. تەك دەرەكتى دۇنيە عانا قازىر كەرەكتى. قۋاتتىڭ كىتابى سول تالاپتىڭ ۇددەسىنەن تابىلىپتى. ونىڭ جاس وقىرماندارعا بەرەرى مول.     

جاقسىباي سامرات،

جۋرناليست.

اباي-اقپارات.