قازاقستان رەسپۋبليكاسى جوعارعى سوتىنىڭ توراعاسى قايرات ءمامي ەۋروپالىق بيزنەس قاۋىمداستىعىنىڭ قازاقستانداعى توراعاسى مارك سميتپەن كەزدەستى.

كەزدەسۋ بارىسىندا تاراپتار وتاندىق بيزنەس ءۇشىن قولايلى جاعداي جاساۋ جانە ينۆەستيتسيالىق تارتىمدىلىقتى ارتتىرۋ – كەز كەلگەن مەملەكەت ءۇشىن وزەكتى ءارى ماڭىزدى مىندەت ەكەندىگىن اتاپ ءوتتى.

«قازاقستاندا بۇل باعىتتا ءتيىمدى شارالار قابىلدانۋدا. ولاردىڭ قاتارىنا مۇلىك پەن كاپيتالدى زاڭداستىرۋ، جەكەشەلەندىرۋدىڭ ەكىنشى تولقىنى، سالىق جۇكتەمەسىنىڭ ازايۋى، شاعىن جانە ورتا بيزنەستى تەكسەرۋگە موراتوري جاتادى. ينۆەستورلاردىڭ قۇقىقتارىن بارىنشا قورعاۋ ماقساتىندا وتكەن جىلدىڭ ماۋسىم ايىندا ينۆەستيتسيالىق ومبۋدسمەن ينستيتۋتى قۇرىلدى»، - دەدى ق.ءمامي.

اڭگىمە بارىسىندا قر جوعارعى سوتىنىڭ توراعاسى كاسىپكەرلەر مەن مەملەكەتتىك ورگاندار اراسىندا تۋىندايتىن داۋلارعا قاتىستى ازاماتتىق ىستەردى قاراۋ باعىتىنداعى سوتتاردىڭ جۇمىسى تۋرالى حاباردار ەتتى.  ايتالىق، سوڭعى 6 جىل ىشىندە قازاقستان سوتتارى تاراپىنان جالپى سوماسى 240 ميللياردتان استام تەڭگە كولەمىندە زاڭدى تۇلعالاردىڭ (شەتەلدىك ينۆەستورلاردى قوسا العاندا) قۇقىقتارى قورعالدى. سوت ستاتيستيكاسىنىڭ دەرەكتەرى بويىنشا، مەملەكەتتىك ورگانداردىڭ ءىس-ارەكەتىنە شاعىم ءتۇسىرۋ جونىندەگى بارلىق تالاپ ارىزداردىڭ جارتىسىنان استامى قاناعاتتاندىرىلعان. ماسەلەن، گەرمانيا، لاتۆيا سەكىلدى ەۋرووداق ەلدەرىندە مۇنداي وتىنىشتەر 10-نان 20%-عا دەيىنگى كولەمدە قاناعاتتاندىرىلادى.

قازىرگى تاڭدا شەتەلدىك ينۆەستورلاردىڭ قاتىسۋىمەن داۋلاردى قارايتىن دەربەس سوت قۇرۋ ماسەلەسى قاراستىرىلۋدا. ءبىر نۇسقا رەتىندە ونى جوعارعى سوتتىڭ مامانداندىرىلعان القاسى رەتىندە قۇرۋ جايى تالقىلانۋدا. بۇل داۋلاردى نەعۇرلىم جوعارى دەڭگەيدە شەشۋگە جانە جەرگىلىكتى بيلىك ورگاندارىنىڭ سوتقا ىقپال ەتۋىنىڭ الەۋەتتى مۇمكىندىگىن بولدىرماۋعا مۇمكىندىك بەرەدى. 

كەزدەسۋ قورىتىندىسى بويىنشا ق. ءمامي م. ءسميتتى وسى جىلعى 6-اقپاندا استانا قالاسىندا وتەتىن ء«ادىل سوت جۇيەسى مەن تۇراقتى زاڭناما – تارتىمدى ينۆەستيتسيالىق احۋالدىڭ نەگىزى» اتتى «دوڭگەلەك ۇستەلگە» قاتىسۋعا شاقىردى. اتالعان ءىس-شارادا ينۆەستورلاردىڭ قۇقىقتارىن قورعاۋ، ولاردىڭ قاتىسۋىمەن داۋلاردى شەشۋ، ينۆەستيتسيا سالاسىنداعى زاڭنامانى جەتىلدىرۋ ماسەلەلەرى تالقىلاناتىن بولادى.

تاراپتار وسى كەزدەسۋدىڭ سوت ءىسىن جۇرگىزۋ سالاسىنداعى جاڭا تاسىلدەردى زەردەلەۋ، سونداي-اق سوت جۇيەسىنە قاتىستى اقپاراتتارمەن جانە جەتىستىكتەرمەن الماسۋ تۇرعىسىنداعى ماڭىزىنا توقتالدى. اڭگىمەلەسۋشىلەر سوت جۇيەسىندەگى ىنتىماقتاستىقتى جانداندىرۋعا مۇددەلىلىك تانىتتى.

اباي-اقپارات.