قازىرگى قولدانىستاعى كۇنتىزبە بويىنشا جاڭا قوي جىلى دا كەلدى. مەرەكەنى ءار كىم، ءار ءوڭىر ءوز حال-قادىرىنشە قارسى الاتىنى ءمالىم. بۇل جولعى جاڭا جىلدى قازاقي داستۇرمەن قارسى العان ءوڭىردىڭ ءبىرى التاي ايماعىنا قاراستى بۋىرشىن اۋدانى ەدى.

اۋداندا   ايگىلى قاناس كولى ورنالاسقان. التاي تاۋىنىڭ بيىك توسىندە جاتقان كول قىتايداعى ەڭ تەرەڭ كولدەردىڭ ءبىرى. جازدا جاسىل جەلەك جامىلعان قاناستىڭ سۇلۋ تابيعاتى، ايناداي مولدىرەگەن ايدىنى الىس-جاقىننان كەلگەن ساياحاتشىلاردى وزىنە ەرىكسىز تارتىپ تۇرادى. ال، قىستا دا ءوز ەرەكشەلىگىمەن كورگەن جاندى ءتانتى ەتەدى.

بيىلىعى جاڭا جىل مەرەكەسىن اۋدان جۇرتى وسى كورىكتى كولدىڭ قار جامىلعان القابىندا اتاپ ءوتتى. ۇلتتىق ويىندار ۇيىمداستىرىپ، ءداستۇردى جاڭعىرتقان اۋدان جۇرتى، قار جامىلعان كول بەتىن ات تۇياعىمەن دۇبىرلەتىپ، اپپاق كورپە جامىلعان التاي تاۋلارىن ۇيقىسىنان وياتقانداي بولدى.

اسىرەسە، ۇلتتىق ويىنداردىڭ ىشىندەگى ەلدىڭ ارقاسىن قوزدىرىپ، قانىن تۋلاتقان كوكپار ەدى. تاناۋىنان قۇشاق-قۇشاق بۋ ۇرلەپ، بوز قىراۋ جامىلعان تۇلپارلار قۇرىش تاقىم جىگىتتەرگە قانات بىتىرگەندەي. باستارىنا تۇلكى تىماق، زەر شاپان كيىپ، الەكەدەي جالانعان ازاماتتار، سەركەنى ات ۇستىنەن اسپانعا اتىپ، بىرىنە-ءبىرى دەس بەرمەي تارتىستى. قالادا شىرشا قۇرىپ، ساليۋت اتقان دا ءجون شىعار، بىراق ءار مەرەكەگە وسىلاي ۇلتتىق ءوڭ-ءتۇس بەرىپ، ءداستۇردىڭ ساباقتاستىعىمەن جالعاپ جاتساق نەسى ايىپ؟! قايتا كورگەن جاننىڭ كوڭىلىنە قۋانىش سىيلاپ، جاس ۇرپاقتىڭ ساناسىنا بابالار رۋحىن سىڭىرمەي مە!

سونىمەن، قاڭتاردا مۇزدى كولدى قاقىراتىپ، بۋىرقانا كوكپارلاتقان ويىن ساتتەرىنەن تۇسىرىلگەن فوتولاردى نازارلارىڭىزعا ۇسىنايىق!

ايتپاقشى، اتا ءداستۇردى جالعاپ جاتقان بۋىرشان اۋدانى بىلتىرعى جىلى قىتايداعى ەڭ كورىكتى اۋداندارىڭ قاتارىنا كىرىپ، 8 ورىن يەلەنگەنىن دە وسى ارادا ايتا كەتكەنىمىز ءجون. جانە ول وسى اتاققا يە بولعان شىڭجاڭداعى بىردەن-ءبىر اۋدان بولدى. اتالعان بايقاۋعا بۇكىل قىتاي بويىنشا 2 مىڭ اۋدان تۇسكەن بولاتىن. كورىكتى اۋدانداردى باعالاۋدا قالانىڭ جوبالانۋى، ەلدىڭ ەجەلگى سالت-ءداستۇر، تاريحي جوسىنى، ءۇي-قۇرىلىستارىنىڭ ۇلگىسى، اۋىل-قىستاق وركەنيەتى، تابيعاتى، تانىمالدىعى ءبارى ەسكەرىلگەن ەكەن.

مۇرات الماسبەكۇلى

سۋرەت «التاي اقپارات تورابىنان» الىندى

Abai.kz