قاراعاندىدا تۇراتىن ارداگەرلەرگە ارنالعان ەلباسىنىڭ سىيلىعىن وبلىس اكىمى ن.ابدىبەكوۆ ولارعا ار­نايى بارىپ تابىستادى. ايماق باسشىسى سوعىس ارداگەرلەرى تالعاتبەك ابدىرازاقوۆتىڭ، نيكولاي ستە­پانوۆيچ جانە تاتيانا يۆانوۆنا پاستۋحوۆالاردىڭ، قابەش بەكەنوۆتىڭ، ۆاسيلي كۋزنەتسوۆتىڭ، كامالي دۇي­سەمبەكوۆتىڭ شاڭىراعىندا بولىپ، ەلباسى­مىزدىڭ اتىنان سىي-سياپات كورسەتتى. بۇل قۇرمەتتى ارداگەرلەرىمىز وت كەشىپ، تۋعان جەردىڭ يگىلىگى ءۇشىن ات­قار­عان ەڭبەگى ءۇشىن يەلەندى. 

تالعاتبەك ابدىرازاقوۆ اقساقال ۇلى وتان سوعىسىندا كورسەتكەن ەرلىگى ءۇشىن 1-دارەجەلى «وتان سوعىسى«، «قۇرمەت بەل­­گىسى» وردەندەرىمەن جانە مەدال­دارمەن ماراپاتتالعان. قاراعاندى قا­لا­سى­نىڭ قۇرمەتتى ازاماتى. قاراعاندى پە­داگوگيكالىق ينستيتۋتىنىڭ، ە.ا.بو­­كە­توۆ اتىنداعى قاراعاندى مەملەكەتتىك ۋنيۆەرسيتەتىنىڭ كافەدرا مەڭگەرۋشىسى، قاراعاندى كووپەراتسيا ينستيتۋتىنىڭ رەكتورى بولعان عالىم ادام. پروفەسسور ت.ابدىرازاقوۆ ەلباسىنىڭ كورسەتكەن ءىل­تي­پاتىنا رازى. قازاق مەملەكەتى ءۇشىن جاساعان ەڭبەگى ەلەنىپ، ەلباسىنىڭ ار­نايى جولداعان سالەمدەمەسىن الىپ كەل­گەن وبلىس اكىمىنە ريزاشىلىعىن ءبىل­دىردى. 

ال 89 جاستاعى نيكولاي پاستۋحوۆ اس­كەر قاتارىنا الىنعاندا نەبارى 17 جاس­تاعى بۋىنى قاتپاعان بوزبالا ەكەن. سوناۋ وتتى جىلدارمەن تۇسپا-تۇس كەلگەن جاستىڭ سول كەزدەگى ءومىرى ەل باسى­نا كۇن تۋعان ۇلى وتان سوعىسى جىلدارىمەن قاتار كەلگەن. جاس جىگىت 1943 جىلى ورلوۆ-كۋرسك دوعاسىندا فا­شيستەرگە قارسى شايقاسقا قاتىسىپ، دالا شايقاستارىنىڭ بىرىندە جارا­قات­تانىپ، اسكەري گوسپيتالگە جىبەرىلەدى. نيكولاي پاستۋحوۆ اسكەري گوسپيتالدا ەمدەلىپ شىققاننان كەيىن 5-ءشى اتقىش­تار ديۆيزياسىنىڭ گۆارديالىق ارميا­سى­نىڭ قاتارىنا قايتا قوسىلىپ، ۋك­راينا، مولداۆيا، پولشا، رۋمىنيا جانە گەرمانيا جەرىنە دەيىن جەتكەن. سۇراپىل وتتىڭ ورتاسىندا ءجۇرىپ ماي­دانگەر ماحابباتىنا جولىعادى. ول 17 جاسار تاتيانا كۋرانوۆامەن تانى­سادى. مىنە، شايقاس كەزىندە تانىسقان قىز بەن جىگىت سوعىس وتى ءسونىپ، ەلدىڭ بەتى بەرى قاراعان ۋاقىتتا وتاۋ قۇرادى. «سۇي­گەن جارىم تاتيانامەن سوعىستان كەيىن، بي كەشتەرىنىڭ بىرىندە كەزدەستىم. وسىدان كەيىن جۇبىمىز جاراسىپ، وتاۋ قۇردىق. قۇدايعا شۇكىر، بۇگىندە تاتۋ-ءتات­تى ءومىر ءسۇرىپ جاتقانىمىزعا 70 جىل­داي بولدى. تاتيانا مەن ءۇشىن اياۋلى جار عانا ەمەس، سونىمەن قاتار مايدان دالا­سىندا ماعان جىگەر بەرگەن جان-جارىم ەكەنىن دە اتاپ وتكىم كەلەدى» دەدى نيكولاي پاستۋحوۆ. ومىراۋى وردەنگە تولى قارت مايدانگەر بۇگىندە ىشكى ىستەر ورگاندارى جانە ىشكى اسكەر قىزمەتىنىڭ قۇرمەتتى ارداگەرى. 

قاراعاندىلىق ارداگەرلەر مەملە­كەت باسشىسىنا شەكسىز ريزاشىلىعىن ءبىلدىرىپ، ەلباسىنىڭ ەلدە جۇرگىزىپ وتىر­عان رەفورمالارىن ءبىراۋىزدان قول­دايتىندىقتارىن ءبىلدىردى. 

نۇرمۇحامبەت ابدىبەكوۆ قاريالار­-عا ەلباسىنىڭ اتىنان قۇتتىقتاۋ حات، 21 راۋشاننان تۇراتىن ەرەكشە گۇل شو­عىن جانە جاڭاجىلدىق سىيلىقتار تاپ­سىردى.

اباي-اقپارات.

(ماقالادا «قازاقپارات» حاا دەرەكتەرى پايدالانىلدى)