قازاقستان مۇسىلماندارى ءدىني باسقارماسىنىڭ قازاقستان ازاماتتارىنىڭ مۇسىلمان ەلدەرىندە ورىن العان سوعىسقا قاتىسۋىنا بايلانىستى مالىمدەمەسى

اسا قامقور ەرەكشە مەيىرىمدى اللانىڭ اتىمەن باستايمىز!

بۇكىل الەمدى جاراتقان اللا تاعالاعا ماداقتار، ونىڭ ەلشىسى مۇحاممەدكە سالاۋاتتار مەن سالەمدەر بولسىن!

قازاقستان مۇسىلماندارى ءدىني باسقارماسىنىڭ تورالقا مۇشەلەرى، عۇلامالار كەڭەسى مۇسىلمان مەملەكەتتەرىندە ورىن العان كەلەڭسىز وقيعالارعا الاڭداۋشىلىق بىلدىرەدى جانە تۇراقسىزدىقتى، ءدىني جانجال مەن الاۋىزدىقتى وركەنيەتتى تۇردە، بەيبىت جولمەن شەشۋگە شاقىرادى.

جەر بەتىندە يسلام حاليفاتىن ورناتامىز دەگەن ۇرانمەن بىرقاتار مەملەكەتتەردەن جينالعان قارۋلى توپتار يراك جانە شام ەلدەرىندە اداسقان ارماننىڭ، قۇرى قيالدىڭ جەتەگىندە ءجۇرىپ، ءدىني دۇردارازدىق پەن بۇلىك تۋدىرۋدا. ولاردىڭ قاتارىنا قوسىلعان ماقساتى ايقىن ەمەس، ءدىندى بىلىممەن ەمەس، سەزىممەن تۇسىنگەن، قارۋ الىپ، جيھادقا شىققان قازاقستان ازاماتتارىنىڭ ارەكەتىن قاتاڭ ايىپتايمىز.

يسلام مەملەكەتىن قۇرۋ يدەياسىن تاراتۋشىلار قاسيەتتى قاعبانى قيراتىپ، جەرمەن جەكسەن ەتۋ كەرەك دەگەن پيعىلدارىن دا اشىق ايتۋدا. بۇل – يسلامعا قارسى ارەكەت، مۇسىلماندىق بىلاي تۇرسىن، ادامشىلىققا دا جات امال. كەزىندە يەمەن پاتشاسى ابراحا كوپ اسكەرمەن قاعبانى قيراتۋ نيەتىمەن جولعا شىققاندا، اللا تاعالا ولاردىڭ توبەلەرىنەن قۇستار جىبەرىپ، تاس جاۋدىرىپ قۇردىمعا باتىرعان. وسىلايشا، قاسيەتتى قاعبانى اللانىڭ ءوزى قورعاعان. بۇل وقيعا ء«پىل» سۇرەسىندە اشىق باياندالعان. وسى سۇرەدە: «ولارعا توپ-توپ ءابابيل قۇستارىن جىبەردى. قۇستار ولارعا بالشىقتان كۇيدىرىلىپ جاسالعان تاستار اتتى. وسىلايشا اللا جەلىنگەن توپان ءتارىزدى قىلدى», – دەلىنگەن. 

بۇگىندە عالامتور بەتىندە دۇنيە ءجۇزىنىڭ مۇسىلماندارىن جيھادقا شاقىراتىن اۋديو جانە ۆيدەوماتەريالدار كۇن ساناپ كوبەيۋدە. جۋىردا بۋىنى ءالى بەكىپ ۇلگەرمەگەن، وڭى مەن سولىن تانىمايتىن، ءدىندى ۇستانۋعا دەڭگەيى مەن قابىلەتى جەتپەگەن جاس قازاق بالالارىنىڭ قارۋ كەزەنىپ، سوعىسقا ۇندەگەن ءسوزى جاريالاندى. ءوز سوزىنە ءوزى جاۋاپ بەرە المايتىن جاستاعى ويىن بالالارىنىڭ سىرتقى كۇشتەردىڭ ىقپالى مەن ارباۋىندا كەتۋى ءبىزدى، مۇسىلمان جاماعاتىن قاتتى وكىندىرەدى. بالانىڭ بولاشاعىن ويلاعان اتا-انا بۇعان استە جول بەرمەۋى ءتيىس ەدى. سان عاسىرلىق تاريحى بار سالتى مەن ءداستۇرلى دىنىنەن قول ءۇزىپ، ءدىني يدەولوگياعا ساناسى ۋلانعان كەيبىر اتا-انالاردىڭ قاساڭ كوزقاراستارى مەن قۇرانعا جانە شاريعاتقا قايشى، ادامگەرشىلىككە جات ارەكەتتەرىنەن بالانىڭ دا بولاشاعىنا بالتا شابىلىپ، ساياسيلانعان ءدىني ۇستانىمنىڭ قۇربانىنا اينالۋدا. جاستايىنان ءبىلىم الماعان، اتا-اجە، اتا-انانىڭ تاربيەسىن كورمەگەن، مەكتەپ مۇعالىمنىڭ تالىمىنەن سۋسىنداماعان جەتكىنشەك قوعامعا قايتىپ پايداسىن تيگىزبەك؟         

قازاقستان مۇسىلماندارى ءدىني باسقارماسى ءوزىنىڭ ۋاعىز-ناسيحات جۇمىستارىندا جاستاردى ءدىندار بولىپ كەتۋگە نەمەسە اسىرە دىنشىلدىكتى ۇستانۋعا شاقىرمايدى. وتانىن سۇيەتىن، اتا-اناسىن قادىرلەيتىن، مەملەكەتشىل ازامات بولىپ وسۋگە ۇندەيدى.

مۇسىلمان ادام ءدىندى ساياسات ءۇشىن پايدالانعىسى كەلەتىندەردىڭ، يسلامدى مانسۇقتاۋدى ماقسات تۇتقان ساياسي كۇشتەردىڭ يدەولوگياسىنان ساقتانۋى ءتيىس. پايعامبارىمىز مۇحاممەد (اللانىڭ وعان يگىلىگى مەن سالەمى بولسىن) حاديستەرىنىڭ بىرىندە: «مۇسىلماندى سوگۋ – پاسىقتىق، ال ونى ءولتىرۋ – كۇپىرلىك»، – دەگەن.

تەرىس پيعىلدى راديكالدى اعىمدار يسلامداعى جيھاد ءسوزىن پايدالانىپ، ادامداردى مۇسىلمان ەلدەرى اراسىندا بولىپ جاتقان قاقتىعىسقا قاتىسۋعا شاقىرۋدا. وسىعان وراي، قازاقستان مۇسىلماندارى ءدىني باسقارماسىنىڭ عۇلامالار كەڭەسى «جيھاد ۇعىمى جانە قازىرگى زامان» تۋرالى ارنايى ءپاتۋا شىعاردى.

جيھادتىڭ شارتى: ەڭ اۋەلى يمامنىڭ (مەملەكەت باسشىسىنىڭ) رۇقساتى بولۋى ءتيىس. شاريعاتىمىزدا يمامنىڭ (مەملەكەت باسشىسىنىڭ) رۇقساتىنسىز سوعىسقا شىعۋعا تىيىم سالىنعان. جيھاد (سوعىس) ىستەرى يمامعا (مەملەكەت باسشىسىنا) جۇكتەلگەنىندە ەشقانداي كۇمان جوق. كۇنا ىستەردەن بولەك باسشىعا بويسۇنۋ مىندەت. قاسيەتتى قۇراندا اللا تاعالا: ء«اي، مۇمىندەر. اللاعا بويسۇنىپ، پايعامبارعا ءارى وزدەرىڭنەن بولعان ءامىر يەلەرىنە بويسۇنىڭدار» («نيسا» سۇرەسى، 59-ايات) دەپ بۇيىرعان.

ەكىنشىدەن، شاريعات شارتىنا سايكەس، جيھادقا شىققان ادامنىڭ ماقساتى ايقىن بولۋ، ۇشىنشىدەن، دۇشپاننان ءتونىپ تۇرعان قاۋىپ ناقتى بولۋ. ەگەر بۇل شارتتار ورىندالماسا، وندا ونىڭ ءىس-ارەكەتى بۇزاقىلىققا، قاسكويلىككە ۇلاسادى. بىرەۋدىڭ ومىرىنە قاۋىپ توندىرۋگە، ار-نامىسىنا تيۋگە، زۇلىمدىق جاساۋعا – دىنىمىزدە رۇقسات جوق. جاراتۋشى يەمىز: «...جازىقسىز ادامدى ولتىرگەن ادام – بارلىق ادام بالاسىن ولتىرگەنمەن تەڭ (كۇناكار) بولادى...» ء(«مايدا» سۇرەسى، 32-ايات) – دەپ قاتاڭ ەسكەرتكەن.

سوقىر سەنىممەن وزگە ەلدىڭ ىشكى ماسەلەسىنە ارالاسىپ، ساياسي سوعىستارعا قاتىسۋ – مۇسىلمانشىلىققا جات، شاريعاتقا قايشى. شىندىعىندا، كەز-كەلگەن سوعىسقۇمار ادامنىڭ اشقان سوعىسى جيھادقا جاتپايدى. نەگىزىندە، مۇنداي باس-كوزسىز وزبىرلىق ءىس-ارەكەتتەر ماسەلەنى شەشپەيدى. كەرىسىنشە، قيىنداتىپ، شيەلەنىستىرە تۇسەدى. قازىرگى تاڭداعى ەڭ ۇلكەن جيھاد – ساۋاتسىزدىقپەن كۇرەس. پايعامبارىمىز (اللانىڭ وعان يگىلىگى مەن سالەمى بولسىن): «ۇلكەن جيھاد – ءوز ناپسىڭمەن كۇرەسۋ»، – دەگەن.

يسلام ءدىنى مەملەكەتتە، قوعامدا تىنىشتىق بولۋىن كوزدەيدى. پەندەنى سوعان تاربيەلەيدى. قازاقستان مۇسىلماندارى ءدىني باسقارماسى مۇسىلمان ەلدەرىندە ورىن الىپ جاتقان وقيعالاردى قولدامايدى جانە قازاق جاستارىنىڭ وزبىرلىق ارەكەتىن ايىپتايدى.

اللا تاعالا ەل-جۇرتىمىزدى بۇلىكتەن ساقتاپ، بىرلىك-ىنتىماعىنان اجىراتپاسىن دەپ تىلەيمىز.

اباي.kz