بىرنەشە كۇننەن بەرى اقتوبەدە سەگىز بالالى وتباسىنىڭ ءۇيلى بولعانى تۋرالى ءسۇيىنشى حاباردى باق بىتكەن جارىسا جاريالاپ جاتىر. دۇرىس-اق! ءۇي سىيلاعان، وتاعاسىن جۇمىسقا العان  كاسىپكەر مەيىرجان وندىرگەنوۆتىكى — ەرلىك! مىڭ العىس وعان! اللا بايلىعىن ەسەلەپ، وتباسىنىڭ قۇت-بەرەكەسىن ارتتىرا بەرسىن!

ال ەندى  مىنا زاماندا، باسىندا ءۇيى، تۇراقتى جۇمىسى جوق بولا تۇرا، ءبىر اللاعا سەنىپ، قۇداي قالاسا، توعىزىنشى بالانى دۇنيەگە اكەلەيىن دەپ وتىرعان سەرىك پەن ايساۋلە قانداي ماقتاۋعا دا لايىق! ولار كونستيتۋتسيا بويىنشا ەڭ ۇلكەن بايلىق — ادام سانىن كوبەيتىپ وتىر!  ناعىز ەرلىك سولاردىكى! اسىرەسە حالقىنىڭ  سانى تازدىڭ شاشىنداي از قازاقستاندا بۇنداي ەرلىك ءتىپتى زورايىپ كورىنۋى ءتيىس!

«التىن القا» الاتىن انالار سانى جىلدان-جىلعا ازايىپ بارادى. الداعى جىلداردا ءتىپتى ازايۋى مۇمكىن. سوندىقتان ۇكىمەت  باتىر انالارعا كەزەكتەن تىس ءۇي بەرۋ تۋرالى ارنايى قاۋلى قابىلداۋى ءتيىس! سوندا  قالالىق، اۋداندىق اكىمدىكتەردىڭ دە «قولدارى شەشىلەر» ەدى. ايتپەسە ولار قازىر كەزەگى كەلمەي، «التىن القا» يەلەرىنە بىردەن ءۇي بەرە المايدى، قۇقىق قورعاۋ ورىندارى «زاڭسىزدىقتى» بىردەن «اڭعارادى». ال كوپبالالى وتباسىلاردىڭ  كەيدە كەزەككە تۇرۋ جاعىنا ءمان بەرە بەرمەيتىنى دە بار...

پارلامەنت دەپۋتاتتارى وسى ماسەلەنى كوتەرسە،  قۇبا-قۇپ بولار ەدى-اۋ!

Abai.kz