جۇما, 29 ناۋرىز 2024
ءبىزدىڭ شەنەۋنىك 8867 0 پىكىر 23 قازان, 2014 ساعات 12:30

سەرىك احمەتوۆ نەگە قىزمەتسىز قالدى؟

سونىمەن سەرىك احمەتوۆ قورعانىس مينيسترلىگىنىڭ ورىنتاعىندا دا ۇزاق وتىرا المادى. نۇرسۇلتان نازارباەۆ قورعانىس مينيسترلىگىنىڭ باسشىلىق قۇرامىمەن كەزدەسۋ بارىسىندا سەرىك احمەتوۆتىڭ وتستاۆكاسىن بىردەن قابىلداعانى بەلگىلى بولدى. اتالعان ۆەدموستۆوعا جاڭا باسشىنى – يمانعالي تاسماعامبەتوۆتى تاعايىنداعان ەلباسى قورعانىس مينيسترلىگى ەلدىڭ مەملەكەتتىك باسقارۋ جۇيەسىندە ماڭىزدى بۋىن سانالاتىنىن اتاپ ءوتىپ، قازاقستان ارمياسىنىڭ قارۋ-جاراعىن ودان ءارى جەتىلدىرۋدىڭ جانە ونى زاماناۋي اسكەري تەحنيكالارمەن جابدىقتاۋدىڭ قاجەتتىلىگىنە نازار اۋداردى.

يمانعالي نۇرعاليۇلى – پرەزيدەنت نازارباەۆ كومانداسىنداعى داعدارىس كەزىندە جاۋاپتى قىزمەتتىڭ تۇتقاسىن قولىنا الاتىن سەنىمدى سەرىگى. ساياسي ورتانىڭ تىلىمەن ايتساق، كريزيس مەنەدجەرى. ساعادات نۇرماعامبەتوۆ، مۇحتار التىنباەۆتاردان كەيىن بىرجاقتى سىنالۋمەن كەلە جاتقان قورعانىس مينيسترلىگى دانيال احمەتوۆتىڭ تۇسىندا ءتىپتى السىرەپ كەتكەن. باقىتجان ەرتاەۆتىڭ باسىن داۋعا قالدىرعان ميگ زىمىرانۇشاقتارى دانيال كەنجەتايۇلىنىڭ كەزىندە ءيزرايلدىڭ جارامسىز تەحنيكالارىن ساتىپ الدى دەگەنگە ۇلاسىپ، قورعانىس سالاسىندا «قورتىق» اڭگىمەلەر كوبەيە تۇسكەن ەدى. اقىرى د. احمەتوۆتىڭ بار-جوعى بەلگىسىز بولىپ قىزمەت ورىنىن تاستاپ شىققان-دى. ەندى سول بىلىق-شىلىقتىڭ ءبارىن تۇزەتىپ جولعا سالۋ تاسماعامبەتوۆكە تاپسىرىلعان سياقتى. ايتكەنمەن دە، بۇل ءوز الدىنا بولەك اڭگىمە. سوندىقتان ءبىز نەگىزگى تاقىرىبىمىزعا اۋىسايىق.

دانيالمەن فاميلياسى ءبىر سەرىك نىعىمەتۇلى – دابىرا-شۋسىز ادام. قورعانىس ءمينيسترى دەگەن لاۋازىمى جوعارى قىزمەتتى دە ول ىڭ-شىڭسىز الدى. ىڭ-شىڭسىز كەتتى. ۇكىمەتتى دە ءبىر جارىم جىلدان استام ۋاقىت شەگىندە ءۇن-ءتۇنسىز باسقاردى. تەك سىرت كوزگە ەلەۋسىز بولعانىمەن ەپتەپ بايقالعانى: سول كەزدەگى پرەزيدەنت اكىمىشىلىگىنىڭ جەتەكشىسى كارىم ماسىموۆپەن اراسى سالقىنداۋ كورىندى. اقورداعا جاقىن ادامداردىڭ سوزىنە قاراعاندا، ءپا-ءنىڭ ەكس-جەتەكشىسى كارىم قاجىمقانۇلى توماعا-تۇيىقتاۋ سەرىك نىعمەتۇلىنىڭ الدىن وراي بەرگەنگە ۇقسايدى. ونىڭ ۇستىنە پرەمەر-مينيستر احمەتوۆ ءۇش ەلدىڭ اراسىنداعى كەدەندىك وداقتىڭ كەيبىر قارىم-قاتىناسى مەن الىس-بەرىسىنە قاراسى شىعىپ وتىرعان-مىس. ەۋرازيالىق ەكونوميكالىق وداقتىڭ كەلىسسوزدەرىنە دە سالعىرتتاۋ قاراعان. وسىنىڭ ءبارى جيناقتالا كەلگەندە احمەتوۆتىڭ ۇكىمەت باسشىلىعىنان كەتۋىنە اكەلىپ سوقتىرعان. ال، ونىڭ قورعانىس مينيسترلىگىنەن دە جىلدام «جىلجۋىنا» ءپا-ءنىڭ قازىرگى باسشىسى نۇرلان نىعامتۋلين پارمەن ەتكەن دەگەن ءسوز بار. قازاقستاندا ءوزىڭ تۋىپ-وسكەن ولكەگە ىقپالدى تۇلعاعا اينالۋ ءۇشىن ايماقتان شىققان نەمەسە شىعۋى ىقتيمال ازاماتتارعا اۋقىم تۋدىرىپ وتىرۋ قاجەت دەيتىن زاڭ بار. مىسالى، ەلىمىزدىڭ باتىس وبلستىرىندا اسلان مۋسين مەن يمانعالي تاسماعامابەتوۆتىڭ بەدەلى جوعارى. ەلباسى دا كادرلىق ساياساتتا تانىمال ادامداردىڭ ەل ىشىندەگى بەت-بەدەلىن ۇنەمى تارازىعا تارتىپ وتىرادى. ماسەلەنكي، وسىدان بىرەر جىل بۇرىن ەشكىمگە دەس بەرمەگەن اسلان مۋسين پرەزيدەنتتىڭ «ەركەسىنە» اينالاعان كەزدە يمانعالي تاسماعامبەتوۆ استانانىڭ شارۋاقور اكىمى بولىپ قانا ءجۇردى. تاسماماعامبەتوۆتى قالا اكىمىنەن مينيسترلىك قىزمەتكە اۋىستىرا وتىرىپ ەلباسى حورۆاتياداعى اسلان ءمۋسيننىڭ ەلشىلىك ميسسياسىن ۇلعايتىپ، قازاقستان رەسپۋبليكاسىنىڭ بوسنيا جانە گەرتسەگوۆينا رەسپۋبليكاسىنداعى، چەرنوگوريا رەسپۋبليكاسىنداعى توتەنشە جانە وكىلەتتى ەلشىسى قىزمەتىن قوسا اتقارۋ مىندەتىن جۇكتەدى.

شامامەن سەرىك احمەتوۆ تە وسى ايماقتىق امبيتسيالاردىڭ الامانىنا ءتۇستى. ءا دەگەندەگى اقپارات ونى قالا اكىمى دەسكەن-ءدى. ياعني، تاسماعامبەتوۆتىڭ ورىنىنا استانا قالاسىنىڭ اكىمى بولىپ احمەتوۆ تاعايىندالدى دەپ باستالعان اقپارات تاراپ ۇلگەرگەنشە، ول ورىنعا قورعانىس سالاسىن دانيال احمەتوۆتان كەيىن باسقارعان ادىلبەك جاقسىبەكوۆ بارىپ جايعاستى.

جوعارىدا احمەتوۆتىڭ ازىرگە قىزمەتسىز قالۋىنا ءپا جەتەكشىسى نىعماتۋليننىڭ ىقپالى بولدى دەگەندى ايتتىق قوي. مۇمكىن. سەبەبى سەرىك احمەتوۆ (قاراعاندى وبلىسىنىڭ تۋماسى) ۇكىمەت باسشىسى اتاناعان كەزدە اتقا مىنگەن قاراعاندىلىق شەنەۋنىكتەر  (وبلىس پەن قالا اكىمى باستاپ) قازىر ءىستى بولىپ جاتىر (قاراڭىز: http://abai.kz/post/view?id=1814, http://abai.kz/post/view?id=1795). ولاردىڭ دا وتكەن-كەتكەنى پرەزيدنەت اكىمشىلىگىنىڭ قاداعالاۋىندا-مىس. مىنە، وسىلاي... قاق-سوقتا شارۋاسى كەم، ارتىق-اۋىز سوزدەن بويىن اۋلاق ۇستايتىن، سىپايى-سىنىق سەرىك احمەتوۆ ازىرشە ەش جەرگە «جارامايتىن» كادر بولىپ تۇر. استانا جاقتان كەلەتىن جىڭىشكە ءبىر اڭگىمەنىڭ نوبايىنا قاراعاندا، احمەتوۆتىڭ دە ۇندەمەي ءجۇرىپ «ۇيدەي پالەنى ءۇيىپ العان» ءتۇرى بار كورىنەدى. سوندىقتان ءبىز دە وسى ارادان «احمەتوۆ نەگە قىزمەتسىز قالدى؟» دەگەن ساۋالعا قاتىستى ناقتى جاۋابىمىزدى ىركە تۇرماقپىز.

Abai.kz  

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1570
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2265
عيبىرات

قايسار رۋحتى عازيز جان

مۇحتار قۇل-مۇحاممەد 3564