ەل ءسوزىن سويلەپ، ۇلت قامىن ويلاعان اردا ازاماتتارىمىز ت.رىسقۇلوۆ پەن س.قوجانوۆتىڭ 120 جىلدىعى جانە قارا شاڭىراق اتانعان «وڭتۇستىك قازاقستان» گازەتىنىڭ 90 جىلدىعىنا وراي جۋرناليستەر اراسىندا شاعىن فۋتبولدان رەسپۋبليكالىق تۋرنير ءوتتى دەپ حابارلايدى وقو اكىمى اپپاراتىنىڭ ءباسپاسوز قىزمەتى. بۇل تۋرنيردە قوعام قايراتكەرلەرىن ەسكە الىپ قۇران باعىشتالدى. شىمكەنتتەگى حالىقارالىق تالاپتارعا ساي «بيىك» سپورت كەشەنىندە وتكەن تۋرنيرگە الماتى قالاسى مەن جامبىل، قىزىلوردا جانە وڭتۇستىك قازاقستان وبلىستارىنىڭ جۋرناليستەرىنەن قۇرالعان 9 كوماندا قاتىستى. «وڭتۇستىك قازاقستان» گازەتىنىڭ ۇيىمداستىرۋىمەن وبلىستىق ىشكى ساياسات باسقارماسىنىڭ قولداۋىمەن وتكەن شاعىن فۋتبولدىڭ ماقساتى سالاماتتى ءومىر سالتىن ناسيحاتتاپ، جۋرناليستەر اراسىنداعى دوستىق قارىم-قاتىناستى نىعايتۋ. جەرەبە جولداس بولعاندار: «ا» توبى: الماتى، جامبىل، وبلىستىق ىشكى ساياسات باسقارماسى مەن سوزاق اۋدانى جانە «جانۋبي قوزوعيستون» گازەتى. ال، «ۆ» توبىندا قىزىلوردا، «وڭتۇستىك قازاقستان» گازەتى، وقو جۋرناليستەر وداعىنىڭ قۇراماسى جانە «قازاقستان-شىمكەنت» تەلەارناسى. اشىلۋ سالتاناتىندا وبلىستىق ىشكى ساياسات باسقارماسىنىڭ باسشىسى بەرىك قۇرمانعالي مەن «وڭتۇستىك قازاقستان» گازەتىنىڭ باس رەداكتورى باقتيار تايجان ءسوز الدى. سونىمەن قاتار الماتىدان ارنايى كەلگەن «جاس قازاق» گازەتىنىڭ باس رەداكتورى سرايىل سمايىل مەن «قازاقستان جازۋشىلار وداعى» باسقارماسىنىڭ ورىنباسارى جاناربەك ءاشىمجان قاتىسۋشىلارعا ساتتىلىك تىلەپ، ءتۋرنيردى اشىق دەپ جاريالادى. فۋتبولدىڭ قورىتىندىسى بويىنشا ءبىرىنشى ورىن جامبىل وبلىسى، ەكىنشى ورىندى الماتى قالاسى السا، ءۇشىنشى ورىندى قىزىلوردالىقتار جەڭىپ الدى. تارتىستى وتكەن بۇل كەزدەسۋدە جامبىلدىقتاردىڭ مەرەيى ۇستەم ءتۇستى. قورىتىندىسىندا كۋبوك پەن ماراپات قاعازىنان بولەك، جامبىل وبلىسى 120 مىڭ، الماتى قالاسى 90 مىڭ، قىزىلوردا وبلىسى 60 مىڭ تەڭگەگە يە بولدى. سايىس كەزىندە ەرەكشە كوزگە تۇسكەن ويىنشىلار ارنايى ماراپات قاعازى جانە باعالى سىيلىقتارمەن ماراپاتتالدى.

 اباي-اقپارات