اكەمىز 1932 جىلدىڭ اشارشىلىعىن كوزبەن كورىپ، ازەر دەگەندە ءتىرى شىققان ادام. ۇكىمەتتەن قاتتى قورقاتىن.

ءستاليندى ولگەنشە ماقتاپ كەتتى. 1991-1998 جىلدارداعى قيىنشىلىقتى بۇيىم كورگەن جوق. بىزگە "سەندەر نە، وسىنى اشتىق دەپ جۇرسىڭدەر مە؟ بۇل ءالى توقشىلىق قوي" دەپ وتىرا بەرەتىن. ءبىزدىڭ قانداي دا ءبىر راديكالدى "رەزكي" پىكىرلەرگە توقتاۋ سالىپ وتىراتىن. "ەي، بالام، ۇكىمەتپەن ويناما. قالاسا ءبىر تۇندە جوق قىلادى" دەپ تىزگىندى تارتىپ وتىراتىن. ءبىز ول كەزدە جالىنداعان جاسپىز. ءبارىن قوپارىپ، وزگەرتىپ، گۇلدەندىرگىمىز كەلەدى. توقىراپ، توقتاپ تۇرعان ومىرگە كوڭىلىمىز تولماي بۇلقىنامىز. ول بولسا "وسىعان شۇكىر، قويىڭدار بولدى" دەيدى. سول ءۇشىن اكەمىزبەن تالاي رەت تايتالاستىق تا. سوسىن ىشىمنەن "بۇلار ەندى سسسر-ءدىڭ تەپكىسىن ابدەن كورگەن. سانالارىن سودان ۇرەي بيلەپ الدى. بۇل كىسىلەر كەتكەن سوڭ جاڭا زاماننىڭ جاستارى ەلدى قالاي دا جاڭا بەلەستەرگە الىپ شىعادى" دەپ سەنۋشى ەدىم. قازىر قاراپ وتىرسام، ءبارى بەكەر سياقتى.

كەشە عانا وسىندا بىرنەشە دىنگە بەيىم بىرنەشە جاستارمەن سوزگە كەپ قالدىم. نەگە دەيسىز عوي؟ سەبەبى، ولار مىنا ەلدىڭ ەگەمەندىگىن جويىپ، تاۋەلسىزدىكتى قۇلاتۋدىڭ از اق الدىنا اكەپ تىرەگەن كوررۋپتسيونەرلەر مەن جەمقور جۇيەنى ءدىن ارقىلى اقتاپ الۋ ءۇشىن بارىن سالدى. ايتاتىن ۋاجدەرى "قالاي تىربانساڭ دا اللانىڭ ءناسىپ ەتكەنى عانا بۇيىرادى", ء"اۋ، باستا نە جەپ، نە ىشەتىنىمىزدى اللا بەلگىلەپ قويعان. سودان اسىپ كەتە المايسىڭ", "بيلىكتىڭ ەش كىناسى جوق قازىرگى جوقشىلىققا. حالىقتىڭ پەيىلىنە قاراي بيلەۋشى دەگەن. حالىقتىڭ وزىنە وسى لايىق" دەگەن سىڭايدا جالعاسىپ كەتە بەرەدى. مەن جالىن اتىپ، اساۋ اتشا تۋلاپ تۇرۋعا ءتيىستى جاستاردىڭ وسىنشالىقتى پاسسيۆ مىنەزىنە قايران قالدىم. وقىماعان جاي ادامنىڭ ءوزى مىنا جەمقور جۇيەنىڭ جۇرتتى ولتىرۋگە اينالعانىن ءبىلىپ سەزىپ تە وتىر. پارا بەرمەسە تىرناقتاي دا ءىسى تىنبايتىنىن كۇنىگە كورىپ وتىر. سوندا دا ءدىندى ورتاعا كولدەنەڭ تارتا وتىرىپ، كوررۋپتسياعا شىرمالىپ قالعان سيستەمانى سۋدان اق، سۇتتەن تازا ەتىپ اقتاپ الۋعا دەگەن قۇشتارلىق راسىندا دا قايدان شىعادى؟

مىسالى ۇكىمەت ايەلدەردىڭ بالاسىنا بەرىلەتىن اقىسىن سان ءتۇرلۋ سىلتاۋمەن بەرمەي سوزا بەرەدى. كۇمىس القا الۋ ءۇشىن ەندى كورشىڭنەن بارىپ مىنەزدەمە قاعاز جازدىرىپ اكەل دەگەنگە دەيىن باردى. سوندا مەنىڭ كورشىلەرىم ۇكىمەتتكى ورگانعا "يا، راستايمىن. كورشىمنىڭ التى بالاسى بار. ول جاقسى ايەل. كۇيەۋىمەن، ەنەسىمەن، قايىن اعا، قايىن ىنىلەرىمەن جاقسى سىيلاسىپ تۇرادى" دەپ مىنەزدەمە بەرۋى كەرەك پە؟ ءدىنشىل جاس جىگىت ماعان "اقىڭىزدى تالاپ ەتپەڭىز. وعان ۇكىمەتتىڭ ەش قاتىسى جوق. ونى اللا سىزگە ءناسىپ ەتەتىن. ءتىپتى نازاربەۆ جەكە ءوزى بۇيىرسا دا اللادان رۇقسات بولماسا ول "پوسوبيەنى" ەش الا الماپسىز دا" دەپ جاۋاپ قاتتى. اكەلەرىمىزدى عوي 32-ءنىڭ اشتاعىن كورگەن دەپ اقتادىق. ادىلەتتى قوعام قۇرۋ ءۇشىن بارىن سالۋى ءتيىس ەندىگى جاستاردىڭ مىنا ارەكەتىن نەمەن اقتايمىز؟

سانجار كەرىمباي

Facebook-تەگى پاراقشاسىنان