بۇلار نەگىزىنەن جەل قۋاتى مەن مەتاللۋرگيا سالاسى بويىنشا جاساقتالعان ءىرى جوبالار ەكەن. ءبىزدىڭ «بايتەرەك» حولدينگى مەن قىتاي بانكى 45 بىرلەسكەن جوبانى جۇزەگە اسىرۋ ءۇشىن ارنايى جۇمىس توبىن قۇرادى.

بىرلەسىپ اتقارار جوبالاردىڭ تىزىمىندە ىرىلەرىمەن قاتار، شاعىن جانە ورتا بيزنەسكە ارنالعان جوبالار دا بار. بۇل تۋرالى حولدينگ باسقارماسىنىڭ باستىعى قۋاندىق  بيشيمباەۆتىڭ ءوزى مالىمدەپ وتىر. جەل قۋاتى مەن مەتاللۋرگياعا باعىتتالعان ءىرى جوبالاردىڭ قۇنى 600 ملن دوللاردان باستالىپ، 1 ملرد دوللارعا دەيىن جەتەدى.

ارنايى جۇمىس توبى ەلباسىمىز قىتايعا بارعان كەزىندە قابىلدانعان مەموراندۋم اياسىندا قۇرىلماق. مەموراندۋم جاساسۋ كەزىندە قىتاي بانكى قازاقستاننىڭ يندۋستريالدى-يننوۆاتسيالىق دامۋ باعدارلاماسى اياسىنداعى جوبالارعا 5 ملدر دوللارعا دەيىن قارجى باعىتتاۋعا ءازىر ەكەندىكتەرىن بىلدىرگەن بولاتىن.

«قىتاي بانكى مەن «بايتەرەك» حولدينگى اراسىندا  كەلىسىم جاسالدى. ەندى 45 جوبانى بىرلەسىپ اتقارۋعا كىرىسەمىز»، – دەپ قۋاندىق بيشيمباەۆ مالىمدەگەننەن كەيىن قىتاي بانكى باسقارماسىنىڭ توراعاسى تيان گۋولي قارجى ينستيتۋتىنىڭ جەل جانە ەلەكتروەنەرگەتيكا سالاسىنداعى جوبالاردى قارجىلاندىرۋعا مۇددەلى ەكەندىكتەرىن مالىمدەدى. دەگەنمەن، قازاقستان تاراپىنا قارجىلاندىرىلۋى ءتيىس جوبالاردىڭ ءتىزىمىن تەز ارادا ۇسىنىلۋىن ەسكە سالۋدى ۇمىتپادى. ق. بيشيمباەۆ بۇل كەزدەسۋدە العاشقى جوبالاردى بىرنەشە كۇننىڭ ىشىندە ۇسىناتىنىنا ۋادە بەردى.

اباي-اقپارات