قازاقستان پرەزيدەنتى نۇرسۇلتان نازارباەۆ «تاجىكستان اۋعانستانمەن شەكارالاس رەتىندە، تەرروريزم مەن ەكسترەميزممەن كۇرەستىڭ وتىندە تۇر»،- دەپ مالىمدەدى. ول تاجىكستانداعى سوڭعى وقيعالار سىرتقى اسەردىڭ ىقپالىنسىز بولماعانىنا سەنىمدى ەكەنىن ايتتى. 

نازارباەۆتىڭ تاجىكستانعا ساپارى ەلدىڭ بۇرىنعى قورعانىس ۆيتسە-ءمينيسترى ابدۋحاليم نازارزودانى قولعا ءتۇسىرۋ وپەراتسياسىمەن سايكەس كەلدى. دۋشانبە بيلىگىنىڭ دەرەگى بويىنشا، ابدۋحاليم نازارزودا باسقارعان قارۋلى توپ دۋشانبە مەن باحدات قالالارىندا پوليتسياعا شابۋىل جاساعان. ول شابۋىلداردان 9 پوليتسيا قازا تاۋىپ، ون شاقتىسى جارالانعان. 11 كۇندىك وپەراتسيا بارىسىندا «قارۋلى توپقا مۇشە» دەلىنگەن 150-دەي ادام ولتىرىلگەن جانە ۇستالعان.

ەكى ەل باسشىلارى كەزدەسۋ بارىسىندا التى قۇجاتقا قول قويدى. ولاردىڭ اراسىندا ەكى ەلدىڭ ستراتەگيالىق ارىپتەستىگى تۋرالى كەلىسىم دە بار. رەسمي مالىمەت بويىنشا، بۇل ەكى ەلدىڭ اراسىنداعى تاۋار اينالىمى 2014 جىلى الدىڭعى جىلعا قاراعاندا 20,5 پايىزعا ءوسىپ، 859 ميلليون دوللارعا جەتكەن.

اباي-اقپارات