تۇرعىن ءۇي قۇرىلىس جيناق بانكى سالىمشىلارىنا وتەماقى تولەۋگە بولەك شەشىم قابىلدانباق

بۇگىن قر ۇلتتىق بانكىندە وتكەن بريفينگتە تۇرعىن ءۇي قۇرىلىس جيناق بانكى سالىمدارى بويىنشا بولەك شەشىم قابىلداناتىنى بەلگىلى بولدى.

- تۇرعىن ءۇي قۇرىلىس جيناق بانكىنەن باسقا، ەكىنشى دەڭگەيلى بانكتەر مەن ولاردىڭ سالىمشىلارى ءۇشىن وتەماقى تولەۋ ءتارتىبىن قاراستىرىپ جاتىرمىز. وعان قاتىستى ۇكىمەتتىڭ بولەك تاپسىرماسى بار. ول – 1 قازانعا دەيىن تەتىكتەر ازىرلەۋ، – دەپ مالىمدەدى قر ۇلتتىق بانكىنىڭ توراعاسىنىڭ ورىنباسارى قۋات قوجاحمەتوۆ.

قتقجب ءباسپاسوز قىزمەتى دە تولەم ءتارتىبىنىڭ وسى ايدىڭ سوڭىنا دەيىن انىقتالاتىنىن ايتتى. ءوتىنىش بەرۋ ۋاقىتى تىم قىسقا بولمايدى. بارلىق ازاماتتار قۇجات تاپسىرىپ ۇلگەرەدى. بۇل ءۇشىن بارلىق شارا جاسالىپ جاتىر.

قتقجب حابارلاۋىنشا، 2015 جىلدىڭ 18 تامىزىنداعى جاعداي بويىنشا، 492 مىڭ شارت جاسالعان. سونىڭ ىشىندە، 435 مىڭ شارتتىڭ قاراجات كولەمى 1 ملن.تەڭگەدەن اسپايدى. بۇل – ەلىمىزدەگى بارلىق تەڭگەلەي دەپوزيتتىڭ 30%-ى. قالعان 57 مىڭ شارتتىڭ دەپوزيتتە جينالعان قاراجات كولەمى 1 ملن.تەڭگەدەن اسىق. قازىرگى كەزدە بانك ۇزاق مەرزىمدى سالىمدار بويىنشا ەدب اراسىندا ءبىرىنشى ورىندى يەلەنىپ وتىر.

سونداي-اق، بانكتىڭ ءباسپاسوز قىزمەتىنىڭ ايتۋىنشا، تۇرعىن ءۇي قۇرىلىس جيناق بانكىنىڭ بارلىق كليەنتىنىڭ مۇددەسى ەسكەرىلەتىن بولادى. فيليالداردىڭ جۇمىسى ەشقانداي دۇربەلەڭ، ابىر-سابىر تۋمايتىنداي، بارلىق ازامات ءوتىنىش بەرىپ ۇلگەرەتىندەي ەتىلىپ ۇيىمداستىرىلماق.