جۇكتى ايەلدىڭ جاتىرىندا ەگىزدەر سويلەسىپ جاتىپتى. ولاردىڭ ءبىرى يمانىنا كامىل بولسا، ەكىنشىسى ەشتەڭەگە سەنبەيدى ەكەن. 
- تۋعاننان كەيىن ءومىر بار دەگەنگە سەنەسىڭ بە؟ – دەپ سۇرايدى سەنبەيتىن ءسابي يماندى اعاسىنان. 
- ارينە، سەنەمىن، - دەيدى يماندى، - تۋعاننان كەيىن ءومىر بارىن ءبارى بىلەدى. ءبىز مۇندا ۋاقىتشا عانامىز. تەك مۇندا بۇعانامىز بەكىپ، جاڭا ومىردە كۇتىپ تۇرعان تاعدىرىمىزعا تايسالماي، تۋرا قارايتىنداي بولىپ جەتىلۋىمىز ءۇشىن عانا بارمىز. 
- مۇنىڭ ءبارى ءجاي ءسوز، - دەپ سەنبەيدى ءىنىسى. – تۋعاننان كەيىن ەشقانداي ءومىر جوق. سەن ول ءومىردىڭ قانداي بولاتىنىن ايتا الاسىڭ با؟ 
- مەن ءبارىن كوزبەن كورگەندەي ءتۇسىندىرىپ بەرە الماسپىن. بىراق ول ومىردە جارىق كوپ. مۇمكىن، دۇنيە ەسىگىن اشقان سوڭ ءوزىمىز ءجۇرىپ، ءوزىمىز تاماق ىشەتىن كۇيگە تۇسەرمىز. 
- نە دەگەن اقىماقتىق، - دەپ كەيدى ءىنىسى، - ول مۇمكىن ەمەس قوي. ءوزىڭ ءجۇرىپ، ءوزىڭ تاماق ءىشۋ دەگەن... بۇل تۋرالى باس قاتىرۋدىڭ ءوزى كۇلكىلى ەمەس پە؟! ءبىزدىڭ كىندىگىمىز بار. ءبىز سول كىندىككە بايلاۋلىمىز. ول ءبىزدى قورەكتەندىرەدى. ءبىزدىڭ ءومىرىمىز – كىندىك. ول ونسىز دا تىم قىسقا. باسقا نارسە تۋرالى ويلاۋعا ءتىپتى بەيىلدى ەمەسپىن. ول جاقتان ەشكىم قايتىپ ورالعان ەمەس. تۋا سالىسىمەن ءومىر وشەدى. 
- جوق، - دەدى يماندى اعاسى، - تۋعاننان كەيىنگى ءومىر قانداي بولاتىنىن بىلمەدىم. بىراق ءومىر بار. ول جاقتا ءبىز انامىزدى كورەمىز. ول بىزگە بار قامقورلىعىن ارنايدى. 
- انا؟ سەن انا دەگەن ۇعىمعا سەنەسىڭ بە؟ سوندا ول قايدا؟ 
- ول بارلىق جەردە. اينالامىزدا. ءبىز ونىڭ ىشىندەمىز. انامىزدىڭ ارقاسىندا قوزعالا الامىز. اناسىز ءبىز ءتىرى بولماس ەك. 
- مىناۋىڭ ءتىپتى شەكتەن شىققاندىق. مەن ەشقانداي انانى كورگەم جوق. ياعني، ول ەش جەردە جوق. بولمايدى دا، - دەيدى سەنبەيتىن ءسابي. 
- جوق، ول بار. بار ەكەنىنە كامىل سەنەمىن، - دەيدى يماندى اعاسى. – كەيدە اينالا تىنشىپ قالعاندا، ونىڭ ءان سالعانىن ەستۋگە بولادى. ءبىزدىڭ الەمىمىزدى الاقانىمەن ايالاعانىن سەزەم. ناعىز ءومىر تۋعان سوڭ باستالاتىنىنا مەن بەك سەنەمىن.

facebook-تەگى پاراقشاسىنان