نەمەسە 14 ملن گا جەر بوس جاتىر ما؟ 

قازاقستاندا 14 ملن. گەكتار جەر پايدالانىلماي جاتىر. بۇل تۋرالى سولتۇستىكتەگى استىقتى ءوڭىر اكىمدەرىمەن كەڭەس وتكىزگەن كەزدە ەلباسى نۇرسۇلتان نازارباەۆ ايتتى دەپ حابارلايدى www.inform.kz  (http://www.inform.kz/rus/article/2815387) 

ء «بىز باستى رەسۋرس جەردى ءتيىمسىز پايدالانۋدامىز. تەك سىزدەردىڭ ءۇش وبلىستارىڭىزدا عانا پايدالانىمايتىن 3,5 ملن. گەكتار جەر انىقتالدى. جالعا العان، بىراق پايدالانبايدى. بۇعان جول بەرۋگە بولمايدى. جالپى، ەلىمىز بويىنشا 14 ملن. گەكتار اۋىل شارۋاشىلىعى جەرى، ونىڭ ىشىندە 5 ملن. گەكتار جايىلىم جەر پايدالانىلمايدى»، — دەپ اتاپ ءوتتى مەملەكەت باسشىسى. قر پرەزيدەنتىنىڭ العا تارتقان دەرەكتەرىنە سايكەس، قازاقستاندا شامامەن 180 ملن. گەكتار جايىلىم جەر بار. ولاردا بۇگىندە 6 ملن. گەكتارىندا ءىرى قارا، 15 ملن. گەكتارىندا قوي-ەشكى وسىرىلۋدە. ال، اۆستراليادا 20 ملن. گەكتار جايىلىمدا 27 ملن. ءىرى قارا مەن 90 ملن. قوي وسىرىلەتىن كورىنەدى.

ەلباسىمىز بۇل ءسوزدى نەگە ايتتى؟ شىندىعىندا دا قازاق جەرى يگەرىلمەي جاتىر ما؟ ول جەر يەسىز بولسا، ونىڭ ەگەسى كىم بولماق؟ قازىر بۇل ماسەلە الەۋمەتتىك جەلىلەردە دە (قاراڭىز: https://www.facebook.com/profile.php?id=100003387158087&fref=ts) كەڭ كولەمدە تالقىلانۋدا؟ ولاردىڭ ءبىر بولىگى مەملەكەت باسشىسىنىڭ بۇلاي ايتۋىنا جەردەن تاپشىلىق كورىپ وتىرعان قىتاي ەلىنە بارعان ساپارى سەبەپ بولدى دەسە، ەكىنشى تاراپ «رەسەي قازاق جەرىن سۇراپ وتىرعان بولار» دەپ دولبارلايدى. ارينە، ەلباسىمىزدىڭ اتىنا نەگىزسىز كىر كەلتىرەتىن مۇنداي پىكىرلەر ورىن الماۋ ءۇشىن مەملەكەت باسىنداعى «كوكەلەر» ويلانۋى قاجەت. وسىنداي كەزدە الاشتىڭ ايتۋلى ۇلى ءاليحان بوكەيحانوۆتىڭ ەرلىگى ەسكە تۇسەدى. ول 1896-1903 جىلدار ارالىعىندا ششەربينا ەكسپەديتسياسىنا مۇشە بولىپ، قازاق جەرىن وتارلاماق بولعان ورىس وتارلاۋشىلارىنا «قازاقتىڭ جەرىندە بوس جاتقان ۇلتاراقتاي جەر جوقتىعىن» عىلىمي نەگىزدە دالەلدەپ، قاۋىپتىڭ بەتىن ءبىر قايتارىپ تاستاعان ەدى.

Abai.kz