ەكى بىردەي ءسابيىن تەرەزەدەن لاقتىرىپ جىبەرگەن ايەلدىڭ كۇيەۋى ساياسات كوكەناي جۇمىس جاسايتىن «بايكەن» مەشىتىنىڭ باس يمامى قۇلمۇحاممەد ماحانبەت ايەلدىڭ ءدىني سەنىمىنە قاتىستى نەگىزسىز ايىپتاۋلارعا جول بەرمەۋىن سۇرادى دەپ حابارلايدى Today.kz.

«ارينە، بۇل وكىنىشتى جاعداي. ءبارىمىزدىڭ جانىمىزعا باتتى. ەشقانداي انا ءوز بالاسىن ءوز قولىمەن ولىمگە قيمايدى. انانىڭ بالاعا دەگەن مەيىرىمى مول ەمەس پە؟ ءبىز دە بۇل وقيعانىڭ سەبەپ-سالدارىن تۇسىنبەي وتىرمىز»، — دەيدى قۇلمۇحاممەد ماحانبەت.

«ساياسات كوكەناي ەسىمدى ازامات «بايكەن» مەشىتىنە نايب يمام (باس يمام ورىنباسارى) قىزمەتىنە 2015 جىلدىڭ 16 قاڭتارىندا قابىلدانعان. ءدىني ءبىلىمى جوعارى ازامات. مەشىت جاماعاتى دا ونى ەرەكشە قۇرمەتتەيدى. ال ونىڭ جۇبايى مەشىتتە قىزمەت ەتپەيدى. الايدا ايەلدىڭ ءدىني سەنىمىنە قاتىستى نەگىزسىز ايىپتاۋلارعا، جالعان اقپاراتتارعا جول بەرمەۋلەرىڭىزدى سۇرايمىن»، — دەپ اتاپ ءوتتى مەشىتتىڭ باس يمامى.

«قازىر الماتى مەشىتتەرى اتىنان سول وتباسىعا ماتەريالدىق كومەك كورسەتىلدى. مورالدىق قولداۋ دا كورسەتىپ جاتىرمىز. ءبىز ءدىني قىزمەت بارىسىندا ءار يمامنىڭ تۇرمىستىق جاعدايىنا، ولاردىڭ وتباسىلىق قارىم-قاتىناسىنا كوڭىل بولەمىز. بۇگىندە يمامدارىمىز ءبىر-بىرلەرىنىڭ وتباسىلارىمەن جاقسى قارىم-قاتىناستا. قازىر سىزدەرگە وسى وقيعاعا بايلانىستى تولىققاندى اقپارات بەرە المايمىز. ويتكەنى، ءوزىمىز دە وقيعانىڭ سەبەپ-سالدارىنان ءالى تولىق حابارىمىز جوق. تەرگەۋ، زەرتتەۋ امالدارى جۇرگىزىلىپ جاتىر. قۇزىرلى مەكەمەلەر وزدەرىنىڭ تەكسەرۋ جۇمىستارىنىڭ ناتيجەسىن ايتاتىن بولادى»، — دەلىنگەن مەشىتتەن كەلىپ تۇسكەن حابارلامادا.

ەستەرىڭىزگە سالساق، 5 قىركۇيەكتە الماتىنىڭ ساتپاەۆ كوشەسىندە 33 جاستاعى ايەل بەسىنشى قاباتتان كامەلەت جاسىنا تولماعان ەكى بالاسىن لاقتىرىپ جىبەرىپ، ارتىنشا ءوزى دە سەكىرىپ كەتكەن.

Nur.kz