الماتى قالاسىندا 29 تامىزدا قازاق حاندىعىنىڭ 550 جىلدىق مەرەيتويىنا بايكەرلەردىڭ موتوشەرۋى باستالدى.

موتوشەرۋدىڭ ماقساتى - قازاق حاندىعىنىڭ 550 جىلدىق مەرەيتويىن ەلىمىزدىڭ بارلىق ايماقتارىندا جالپىۇلتتىق دەڭگەيدە اتاپ ءوتۋدى ناسيحاتتاۋ. اتالعان موتوشەرۋ قازاقستان حالقىنىڭ بىرلىگىن نىعايتۋعا، قوعامدى تاۋەلسىزدىك، تۇراقتىلىق، بەيبىتشىلىك جانە كەلىسىمگە نەگىزدەلگەن باستى قۇندىلىقتار توڭىرەگىنە توپتاستىرۋعا، مەرەكەلىك ءىس-شارالارعا ەلىمىزدىڭ بارلىق ازاماتتارىن تارتۋعا جانە ت.ب. سەپتىگىن تيگىزەدى.

اتالعان موتوشەرۋدى «قازاقستان گەوگرافيالىق قوعامىنىڭ» پرەزيدەنتى،  الەمگە تانىمال ساياحاتشى د.ي.پەترۋحين باستاماسىمەن مادەنيەت جانە سپورت مينيسترلىگى ۇيىمداستىرىپ وتىر.

29 تامىزدا الماتى قالاسىنان  شىققان موتوشەرۋشىلەر 11 قىركۇيەكتە نەگىزگى مەرەيتويلىق شارالار وتەتىن استانا قالاسىنا كەلسە، 9 قازاندا نەگىزگى مەرەيتويلىق شارالار جالعاساتىن تاراز قالاسىنا جەتەدى. موتوشەرۋ جول بويى قاراعاندى، وسكەمەن، سەمەي، پاۆلودار، كوكشەتاۋ، قوستاناي، اكتوبە، ارال، بايقوڭىر، قىزىلوردا، تۇركىستان، شىمكەنت جانە ت.ب. قالالاردا بولادى.

موتوشەرۋشىلەر ءاربىر ايماقتىڭ باسشىلارىنا قازاق حاندىعىنىڭ 550 جىلدىعىنا ارنالعان لوگوتيپ بەينەلەنگەن تۋدى تابىستاپ، كەزدەسۋلەر وتكىزەدى جانە قازاقستان تاريحىندا ماڭىزى زور تاريحي جەرلەرگە بارادى.

شەرۋ شامامەن 40 كۇنگە سوزىلادى.

اتالعان شەرۋ قازاقستاننىڭ كوپتەگەن وڭىرلەرىن قامتيتىندىقتان حالىق ەڭ كوپ قاتىساتىن اۋقىمدى شارالاردىڭ بىرىنە اينالادى دەپ كۇتىلۋدە.

اباي-اقپارات