- كليەنتتەردىڭ مۇددەسىن كوزدەپ، ۇكىمەتپەن بىرگە بىرقاتار شارا جاساپ جاتىرمىز. شەشىم قىسقا مەرزىم ىشىندە قابىلدانۋى ءتيىس. مۇنىڭ ءارتۇرلى تەتىكتەرى قاراستىرىلادى. تۇرعىن ءۇي قۇرىلىس جيناق بانكى تەك قانا سالىمشىلاردىڭ مۇددەسىنە قاراي ارەكەت ەتەدى جانە جيناعان اقشاسىنىڭ ساقتالۋى ءۇشىن بارىنشا كۇش-جىگەر جۇمسايتىن بولادى، - دەدى «قازاقستاننىڭ تۇرعىن ءۇي قۇرىلىس جيناق بانكى» اق باسقارما توراعاسىنىڭ ورىنباسارى ەربول قاراشۇكەەۆ.  

ەستەرىڭىزگە سالا كەتسەك، اقوردادا وتكەن كەڭەستە ەلباسى ۇلتتىق بانككە ەكىنشى دەڭگەيلى بانكتەردەگى حالىقتىڭ دەپوزيتتەرىندە جاتقان قاراجاتقا قاتىستى وتەماقى تەتىكتەرىن ازىرلەۋدى تاپسىرعان بولاتىن. نۇرسۇلتان نازارباەۆ تۇرعىن ءۇي قۇرىلىس جيناق جۇيەسىنىڭ ماڭىزدىلىعىن باسا كورسەتىپ، تۇرعىن ءۇي قۇرىلىس جيناق بانكىنىڭ سالىمشىلارىن ەرەكشە اتاپ ءوتتى.

- تۇرعىن ءۇي قۇرىلىس جيناق بانكى سالىمشىلارى بويىنشا ماسەلە تۋىپ وتىر. حالىق پاتەر الۋعا قاراجات جيناۋدا. سوندىقتان، ازاماتتاردىڭ  قاراجاتى بوسقا كۇيىپ كەتپەسىن، ۇكىمەت وسى جاعىن ويلاستىرسىن، – دەدى نۇرسۇلتان نازارباەۆ.

قتقجب-نىڭ مالىمدەۋىنشە، قازىرگى كەزەڭدە 543 228 شارت بار. سالىمدار 276 ميلليارد تەڭگەگە جەتكەن.

بانك وكىلدەرى «باعامنىڭ وزگەرۋى وڭىرلەردى دامىتۋدىڭ 2020 جىلعا دەيىنگى باعدارلاماسىن جۇزەگە اسىرۋعا ىقپال ەتپەيدى» دەپ سەندىرەدى. جەرگىلىكتى اتقارۋ ورگاندارىمەن شارت جاسالعان نىساندار قارجىلاندىرىلا بەرەدى. تۇرعىن ءۇي باعاسى تەڭگەدە بەلگىلەنگەن. ورنالاسقان وڭىرلەرىنە بايلانىستى، 1 شارشى مەتردىڭ باعاسى  90 000–142 500 ارالىعىندا.   

2015 جىلدىڭ 1 تامىزىندا «حالىقتىڭ بارلىق ساناتىنا ارنالعان تۇرعىن ءۇي» باعىتى بويىنشا جالپى اۋدان 970 مىڭ شارشى مەتر بولاتىن 15 167 پاتەردىڭ قۇرىلىسى اياقتالدى. بيىلعى جىلدىڭ سوڭىنا قاراي جالپى اۋدانى 380 مىڭ شارشى مەتر بولاتىن 6 مىڭ پاتەر سالۋ جوسپارلانىپ وتىر.

قازىرگى تاڭدا ەلىمىزدىڭ توعىز وبلىسىندا 1 927 پاتەر بويىنشا پۋلعا قاتىسۋعا ءوتىنىش قابىلدانىپ جاتىر. بۇعان قوسا، جىل سوڭىنا دەيىن تاعى دا 2 895 پاتەر بويىنشا ءوتىنىش قابىلدانباق.

اباي-اقپارات