تامىزدىڭ 18-ءى كۇنى استانا قالالىق سوتىنىڭ كاسساتسيالىق القاسى پاۆلودار تۇرمەسىندە وتىرعان ارون اتابەكتىڭ (رەسمي تەگى – ەدىگەەۆ) 2014 جىلى قازاننىڭ 19-ىندا جازعان جەتى تالابىنىڭ قالعان ەكەۋىن – «تۇتقىننىڭ قاماۋ ورنىن اۋىستىرعانى جونىندە تۋعان-تۋىستارىنا دەر كەزىندە حابار بەرۋ» جانە «تاركىلەنگەن قولجازبالارىن قايتارۋ» تۋرالى ءوتىنىشىن قارادى.

«شەشىم شاعىمدى قايتا جولداۋعا كەدەرگى ەتپەيدى»

سۋديا تايسيا ميرزويان توراعالىق ەتكەن، سۋديا جاننا ەرماعامبەتوۆا جۇرگىزگەن سوتقا شاعىمدانۋشى تاراپتان ارون اتابەكتىڭ ادۆوكاتى جانار بالعاباەۆا قاتىستى.

ادۆوكات بالعاباەۆا اتابەكتىڭ شاعىمدى قىلمىستىق-اتقارۋ كودەكسىنىڭ 25-بابى («جازانى وتەۋ ورنى تۋرالى حابارلاما») مەن اۆتورلىق قۇقىق تۋرالى زاڭعا نەگىزدەپ بەرگەنىن ايتتى. جاۋاپكەر تاراپ – قىلمىستىق اتقارۋ جۇيەسى كوميتەتىنىڭ (قاجك) وكىلى بۇل ىسكە ءبىرىنشى رەت قاتىسىپ وتىرعانىن ايتىپ، قانداي دا ءبىر سۇراققا جاۋاپ بەرۋدەن باس تارتتى. ال مەملەكەتتىك ايىپتاۋشى راۋشان ءامىرحانوۆا شاعىمدى قاناعاتتاندىرماۋدى سۇرادى.

سوت ارون اتابەكتىڭ شاعىمىن جارتى ساعات كولەمىندە قاراپ، ونى قاناعاتتاندىرماۋ جايلى شەشىم شىعاردى.

– بىراق بۇل شەشىم كەمشىلىكتەرى الىنعان سوڭ شاعىمدى قايتا جولداۋعا كەدەرگى ەتپەيدى، – دەدى سۋديا جاننا ەرماعامبەتوۆا.

ارون اتابەكتىڭ 2014 جىل 19 قازاندا سوتقا بەرگەن شاعىمىندا جەتى تالاپ ايتىلعان. ولاردىڭ اراسىندا «قاجك-ءنىڭ اتابەككە قاتىستى ارەكەتى قاتىگەز ءارى ادامنىڭ ار-نامىسىنا تيۋ ەكەندىگى مويىندالسىن، ول فاكتىلەرگە قاتىستى تاۋەلسىز تەرگەۋ جۇرگىزىلسىن، اتابەكتىڭ اپ-162 مەكەمەسىندە قاماۋدا بولۋى زاڭسىز دەپ تانىلىپ، ونى ءوزى بۇرىن قامالعان الماتى وبلىسى تەرريتورياسىنداعى تۇزەۋ مەكەمەسىنە جىبەرسىن، ونى جان-جاقتى مەديتسينالىق تەكسەرۋگە جىبەرسىن، قۇقىقتىق قولداۋ كورسەتكىسى كەلگەن بوگدە ادامدارمەن كەزدەسۋگە رۇقسات ەتسىن» دەگەن سىندى تالاپتار بار.

بيىل ناۋرىزدا وتكەن كاسساتسيالىق سوت بۇل شاعىمنىڭ باسقا تالاپتارىن قاناعاتتاندىرماي، «تۇتقىننىڭ قاماۋ ورنىن اۋىستىرعانى جونىندە تۋعان-تۋىستارىنا دەر كەزىندە حابار بەرىلسىن» جانە «تاركىلەنگەن قولجازبالارىن قايتارسىن» دەگەن ەكى تالابىن عانا قوسىمشا قاراستىرۋعا جىبەرگەن ەدى.

«ۇساق-تۇيەك جەڭىلدىك»

ارون اتابەكتىڭ رەسمي وكىلى باقىتجان تورەعوجينا «بيلىك شاعىمدى رەسمي قاناعاتتاندىرماعانمەن، كەيبىر تالاپتاردا بەيرەسمي العا باسۋ بار» ەكەنىن ايتادى.

– ماسەلەن، اتابەك تەرگەۋ اباقتىسىندا مەديتسينالىق تەكسەرىستەن ءوتتى. اياعى سىنعان ەدى، تاياعىن بەردى. كامەراسىنىڭ جاعدايىن تۇزەپ، ۋنيتاز ورناتتى. سوڭعى جەڭىلدىك – ونى جالعىز كىسىلىك كامەرادان ءتورت ادامدىق كامەراعا كوشىردى. بيلىك سوتتا بىزگە جەڭىس بەرمەي، بەيرەسمي ۇساق-تۇيەك جەڭىلدىك جاساپ وتىر، – دەيدى باقىتجان تورەعوجينا.

باقىتجان تورەعوجينا ارون اتابەكتىڭ جەتى تالابى تۇگەل ورىندالماي قالعان شاعىمى بويىنشا جوعارعى سوتقا، ءىس ونبەسە بۇۇ-نىڭ ازاپتاۋعا قارسى كوميتەتىنە شاعىمداناتىندارىن ايتادى.

اقىن ءارى ديسسيدەنت ارون اتابەك 2006 جىلعى شاڭىراق وقيعاسىناقاتىستى ايىپپەن 2007 جىلى 18 جىلعا سوتتالعان. ول تۇرمەدە وتكىزگەن سەگىز جىلدىڭ ىشىندە اباقتى اۋرۋحاناسىنا بىردە-ءبىر رەت جىبەرىلمەگەن. الايدا وسى ۋاقىت ىشىندە اتابەك ەكى مارتە «تۇرمە ىشىندەگى تۇرمە» شاراسىمەن جازالانعان، ياعني حات جازىسۋ مەن كەزدەسۋ قۇقىعىنسىز، ۇزاق ۋاقىت جالعىز قامالعان. 2013 جىلدىڭ جەلتوقسانىنان بەرى ونى ءبىر تەرگەۋ يزولياتورىنان ەكىنشىسىنە اۋىستىرۋمەن كەلەدى. ونىڭ تۇرمەدەگى جەڭىلدەتىلگەن رەجيمگە اۋىستىرۋدى سۇراپ ءوتىنىش بەرۋگە مۇمكىندىگى جوق – الدىڭعى سوگىستى الىپ تاستايتىن مەرزىم جاقىنداعان سايىن وعان جاڭا سوگىس (جازا) بەرىلىپ كەلەدى.

2010 جىلى ديسسيدەنت اقىن ارون اتابەك حالىقارالىق «شىعارماشىلىق ەركىندىگى» سىيلىعىنا لايىق دەپ تانىلعان. ول – 2007 جىلعى وپپوزيتسيالىق «ازاتتىق» سىيلىعىنىڭ لاۋرەاتى. قازاقستاننىڭ بىرقاتار قۇقىق قورعاۋ ۇيىمدارى ارون اتابەكتى ساياسي تۇتقىن دەپ تانيدى.

2006 جىلى شىلدەدە بيلىك الماتى ماڭىنداعى شاڭىراق اۋىلىندا زاڭسىز سالىندى دەپ تاپقان ۇيلەردى قيراتپاق بولعان كەزدە شىققان تارتىپسىزدىككە بايلانىستى ارون اتابەككە قوسا تاعى ءۇش ازامات–  قۇرمانعازى وتەگەنوۆ، ەرعانات تارانشيەۆ جانە رۇستەم تۇياقوۆ قىلمىستىق سيپاتتاعى ايىپتارمەن سوتتالعان.

ءمادي بەكماعانبەت

ازاتتىق راديوسى