قازاقستان پرەزيدەنتى الماتى قالاسىنا جۇمىس ساپارىمەن كەلدى. ساپار شەڭبەرىندە قالالىق ءماسليحاتتىڭ سەسسياسىنا قاتىستى. سەسسيا بارىسىندا الماتى قالاسىنىڭ جاڭا اكىمى باۋىرجان بايبەكتىڭ كانديداتۋراسى دەپۋتاتتار تاراپىنان ءبىراۋىزدان قولداۋ تاپتى. بۇل تۋرالى akorda.kz حابارلادى. مەملەكەت باسشىسى سونداي-اق، قالا اكتيۆىمەن كەزدەسىپ، جاڭا باسشىنى تانىستىردى جانە مەگاپوليستىڭ بۇدان ءارى دامۋ باعىتتارىن ايقىندادى. قازاقستان پرەزيدەنتى «استانا ەكسپو-2017» ۇلتتىق كومپانياسىنىڭ باسشىلىعىنا تاعايىندالعان احمەتجان ەسىموۆ الماتى قالاسىنىڭ اكىمى لاۋازىمىندا ۇلكەن جۇمىس اتقارعانىن اتاپ ءوتتى. «وسى ۋاقىت ارالىعىندا قالا ەلەۋلى ناتيجەلەرگە قول جەتكىزدى، كەلبەتى وزگەردى، بارىنشا يكەمدى ءارى جايلى بولا ءتۇستى. باسپانا قۇرىلىسى قارقىندى جۇرگىزىلىپ، جاڭادان ەكى اۋدان پايدا بولدى. ازيادا تابىستى وتكىزىلدى، قازىرگى كەزدە دۇنيەجۇزىلىك ستۋدەنتتەر ويىنىنا دايىندىق ءجۇرىپ جاتىر. الماتىدا شاعىن جانە ورتا بيزنەس ەكپىندى دامۋدا. ونىڭ ۇلەسى قالا ەكونوميكاسىندا 30 پايىزدان اسىپ، بيۋدجەت تۇسىمدەرىنىڭ ۇشتەن ەكىسىن قامتاماسىز ەتىپ وتىر. بۇل – ماڭىزدى كورسەتكىش»، – دەدى نۇرسۇلتان نازارباەۆ. قازاقستان پرەزيدەنتى اتاپ وتكەندەي، احمەتجان ەسىموۆتىڭ تاجىريبەسى قازىرگى ۋاقىتتا استانادا ەكسپو كورمەسىن ۇيىمداستىرۋ جانە وتكىزۋ ءۇشىن قاجەت. «ەكسپو-2017 – ءبىزدىڭ بولاشاعىمىز. كورمە نىساندارىنىڭ قۇرىلىسى – بۇل مىندەتتىڭ تەك ءبىر قىرى عانا. ونىڭ باسقا، الدەقايدا ماڭىزدى قىرى – مازمۇندىق تولىعۋى. ەكسپو-2017 قازاقستاننىڭ بارلىق سالادا بالاما ەنەرگەتيكانى دامىتۋ ارقىلى جاڭا تەحنولوگيالىق قۇرىلىسقا ءوتۋى ءۇشىن سەرپىن بەرۋى ءتيىس. ۇلتتىق كومپانيانىڭ باسشىلىعىنا ۇكىمەتپەن، بارلىق وڭىرلەردىڭ اكىمدىكتەرىمەن ءىس-قيمىل جاسايتىن، ينۆەستيتسيا جانە تەحنولوگيا تارتۋ ءۇشىن الەمنىڭ ونداعان ەلدەرىمەن جۇمىس ىستەيتىن تاجىريبەلى ادام كەرەك»، – دەدى مەملەكەت باسشىسى. نۇرسۇلتان نازارباەۆ الماتى ەلدىڭ ءىرى قالاسى عانا ەمەس، ەكونوميكانىڭ لوكوموتيۆى ءارى عىلىمي-اعارتۋشىلىق ورتالىق بولعاندىقتان، ونى باسقارۋ تاجىريبەلى جانە كرەاتيۆتى كادردى قاجەت ەتەتىنىنە نازار اۋداردى. «باۋىرجان بايبەك – وسىنداي لاۋازىمعا تاعايىندالىپ وتىرعان «بولاشاق» باعدارلاماسىنىڭ ءبىرىنشى تۇلەگى. ول سىرتقى ىستەر مينيسترلىگى جۇيەسىندە، پرەزيدەنت اكىمشىلىگىندە جۇمىس ىستەدى، «نۇر وتان» پارتياسى توراعاسىنىڭ ءبىرىنشى ورىنباسارى بولدى. قاسىمدا جۇمىس ىستەي ءجۇرىپ، مەنىڭ قىزمەتىمدى كوردى، بۇكىل رەسپۋبليكامىزدى ارالادى، ماڭىزدى سايلاۋ ناۋقاندارىنا قاتىستى، ال ءبىزدى الدا پارلامەنتتىك سايلاۋ كۇتىپ تۇر، بۇل وڭاي سىناق ەمەس. ونىڭ قالا الدىندا تۇرعان مىندەتتەردى ەلدە جۇزەگە اسىرىلىپ جاتقان باعدارلامالار اياسىندا سىزدەرمەن بىرلەسىپ شەشە الاتىنىنا سەنىمدىمىن»، – دەدى قازاقستان پرەزيدەنتى. مەملەكەت باسشىسى الماتى قالاسىنىڭ بۇدان ءارى دامۋىنىڭ نەگىزگى باعىتتارىن اتادى. ءبىرىنشى كەزەكتە، قالانىڭ عىلىمي جانە كادرلىق الەۋەتىن، ونىڭ ينۆەستيتسيالىق تارتىمدىلىعىن پايدالانا وتىرىپ، ينۆەستيتسيا تارتۋ جانە جاڭا ءوندىرىس ورىندارىن اشۋ جۇمىستارىن جانداندىرۋ كەرەك. سونداي-اق شاعىن جانە ورتا بيزنەستى قولداۋ جۇمىستارىن مۇلدە جاڭا دەڭگەيگە شىعارۋ قاجەت بولادى. «الماتى ەجەلدەن كاسىپكەرلىكتىڭ ورتالىعى بولىپ سانالادى، سوندىقتان ەكونوميكا ءۇشىن كۇردەلى كەزەڭدە بيزنەستىڭ بەلسەندىلىگىن تومەندەتپەي، كەرىسىنشە ۇلعايتۋ ءۇشىن مەملەكەتتىك قولداۋدىڭ بارلىق شارالارىن قابىلداۋ كەرەك»، – دەدى نۇرسۇلتان نازارباەۆ. سونىمەن قاتار، قازاقستان پرەزيدەنتى 2017 جىلعى ۋنيۆەرسيادانى جوعارى دەڭگەيدە وتكىزۋدى جانە سالىنعان بارلىق نىسانداردىڭ ول وتكەننەن كەيىن ءتيىمدى پايدالانىلۋىن قامتاماسىز ەتۋدى تاپسىردى. نۇرسۇلتان نازارباەۆ اتاپ وتكەندەي، كولىك ينفراقۇرىلىمى جەتىلدىرۋدى قاجەت ەتەدى، ال ونىمەن ەكولوگيالىق احۋال دا بايلانىستى. «قالادا كەپتەلىستەر مەن كولىك تۇراقتارى ماسەلەسى ءالى كۇنگە تۇبەگەيلى شەشىلگەن جوق. جول توراپتارى سالىندى، مەترو ىسكە قوسىلدى، قوعامدىق كولىكتى گازعا كوشىرۋ ءجۇرىپ جاتىر. مۇنىڭ ءبارى احۋالدى ايتارلىقتاي جاقسارتۋعا كومەكتەسەدى، بۇل جۇمىستاردى جالعاستىرۋ كەرەك»، – دەدى مەملەكەت باسشىسى. قازاقستان پرەزيدەنتى تاعى ءبىر ماڭىزدى باعىت رەتىندە قالاداعى قىلمىستىق احۋالدى جاقسارتۋ ماسەلەسىن ايتتى. ء«بىز الماتىدا ءتۋريزمدى دامىتۋعا نيەتتىمىز، سوندىقتان قالا قاۋىپسىز ءارى ءومىر ءسۇرۋ ءۇشىن جايلى بولۋى ءتيىس»، – دەدى ەلباسى. سونداي-اق، مەملەكەت باسشىسى ستۋدەنتتىك ورتالىق بولىپ سانالاتىن مەگاپوليستە عىلىم مەن ءبىلىمدى ودان ءارى دامىتۋدىڭ، جاستاردى جۇمىسقا ورنالاستىرۋ ماسەلەسىن شەشۋدىڭ ماڭىزدىلىعىن ايتتى. سوڭىندا نۇرسۇلتان نازارباەۆ ەل ەكونوميكاسىنداعى كۇردەلى احۋالدى ەڭسەرۋ جانە ونىڭ ءارى قاراي جۇيەلى دامۋى كوپ جاعدايدا الماتىنىڭ تابىستى دامۋىمەن بايلانىستى ەكەنىنە نازار اۋداردى.

 اباي-اقپارات