2015 جىل 31 شىلدە كۇنى تاڭعى 11:00-دە قىزىلاسكەر ەلدى مەكەنىندە ايگىلى شاكەن ايمانوۆتىڭ «تاقيالى پەرىشتە» تۋىندىسىنىڭ جالعاسى بولىپ تابىلاتىن «تاقيالى پەرىشتە–2» تولىقمەتراجدى ءفيلمىنىڭ ءتۇسىرىلىمى باستالادى.

تۋىندى قالىڭ كورەرمەن كوڭىلىنەن ورىن الادى دەپ سەنەمىز. سەبەبى، ءدال قازىرگى كەزەڭدە وسىنداي تاقىرىپقا قۇرىلعان فيلمدەر جوقتىڭ قاسى دەسەك تە قاتەلەسپەيمىز.

بۇگىنگى تاڭدا قارا شالدىڭ قايعىسى بولىپ وتىرعان "شاڭىراق ۇستار تەلقوزىنىڭ", ياعني ءوز اكەسى مەن اتاسىنان ونەگە العان ۇل، جانىنا جالاۋ بولار، قابىرعا كەڭەسشىسى، بوساعانىڭ التىن قازىعى بولار ۇستامدى، سانالى دا سابىرلى، ويى ورەلى، كوزى قاراقتى قازاق كەلىندەرىن، ياعني بولاشاق جارلارىن دۇرىس تاني، تاڭداي ءبىلۋى - باستى نىسانا، دىتتەگەن وي، دۇرىس بولجام. كوركەم تۋىندى بارىسىندا ءۇش ۇرپاق، ياعني اتا، اكە، نەمەرە اراسىنداعى بايلانىس وتە جاقسى، اشىق كورسەتىلىپ، وقيعا بارىسىندا ءبارىنىڭ تۇلعالارى ءار ءتۇرلى قىردان اشىلعان.

ءفيلمنىڭ تاعى ءبىر ەرەكشە، بولاشاق ۇرپاققا ۇلكەن ءبىر وي تاستار وقيعاسى - بۇگىنگى انا ءتىلىنىڭ احۋالى. تىلگە جاناشىر جاستار ارقىلى ۇلتتىق رۋح - انا ءتىلىمىزدى قۇرمەت تۇتۋدى ۇلگى ەتەدى. ليريكالىق كومەديانىڭ تاعى ءبىر ۇتىمدى تۇسى - قازاق بالاسى نەگر قىزىن، قىتاي قىزىن جار ەتىپ الۋدى باستى ماقسات ەتپەي، ەرمەك، ويىن رەتىندە كورسەتۋى - وي جەلىسىنىڭ جىمداسىپ، استارلى ورىلگەنىنىڭ ايعاعى. تۋىندىنىڭ اۆتورى جالپى قازاققا تۇسىنىكتى، جالپاق تىلمەن ءۇن قاتادى. شىتىرمان، اۋرەسى كوپ، دۋمانعا تولى قالا ءومىرى مەن باۋىرمال، اقجارقىن، كوپشىل، جاتسىنۋدى بىلمەيتىن، ۇيىنەن قوناعى ارىلمايتىن، قايماعى بۇزىلماعان قازاق وتباسى تىرشىلىگىن قاتار الىپ سۋرەتتەيدى. جاستارعا بەرەر ءتالىم-تاربيەسى زور، ءماندى، قازاقى قالجىڭ مەن استارعا تولى تۇششىمدى، تارتىمدى، قۇندى دۇنيە.

«اڭسار ارمانىم» پروديۋسەرلىك ورتالىعىنىڭ نەگىزى 2013 جىلدىڭ قىركۇيەك ايىندا كالاندى. شالاباەۆ قۇسمان كارىمۇلىنىڭ باستاماسىمەن اشىلعان ورتالىق جىلدان جىلعا كوركەيىپ، ءوزىنىڭ العاشقى جانە ۇلكەن جوبالارىن ءىس-جۇزىندە جۇزەگە اسىرىپ، قارىشتاپ دامىپ كەلەدى. قازىرگى تاڭدا پروديۋسەرلىك ورتالىق قانات قاعىپ، بيىك بەلەستەردى باعىندىرۋ ۇستىندە. 
«اڭسار ارمانىم» پروديۋسەرلىك ورتالىعى كليپ ءتۇسىرۋ، كونتسەرتتىك باعدارلامالار مەن ءار ءتۇرلى اۋقىمدى ءىس-شارالاردى ۇيىمداستىرۋمەن اينالىسادى. العاشقى جوباسى 2013 جىلدىڭ قاراشا ايىندا ۇيىمداستىرىلعان «ەلىمە كەلىپ، ەلەۋلى بولدىم» اتتى شەتەلدەن كەلگەن قانداس باۋىرلارىمىزدىڭ قاتىسۋىمەن وتكەن كونتسەرتتىك باعدارلاما بولدى. سونىمەن قاتار قازاق حاندىعىنىڭ 550 جىلدىعىنا ارناپ شىعارىلعان، قازاقتىڭ پاتريوتتىق رۋحىن كوتەرىپ، قازاق ەلىن بيلەگەن ءار حاننىڭ ەرلىكتەرىن جەكە-جەك جىرعا قوسقان «ۇلىلاردى ۇلىقتاۋ» انىنە تۇسىرىلگەن كليپ تە كوپتىڭ ىستىق ىقىلاسىنا بولەنگەن بولاتىن.

اباي-اقپارات