امەريكالىق TMZSports تانىمال پورتالىنىڭ ءتىلشىسى قازاقستاندىق بوكسشى گەننادي گولوۆكيننەن كىشىگىرىم سۇحبات الدى. رەپورتەر سپورتشىدان "بورات" ءفيلمىن كوردىڭىز بە؟" دەپ سۇرايدى. گەننادي ء"يا، كوردىم، بىراق بارلىق كورسەتىلگەندەر - وتىرىك" دەپ جاۋاپ قاتادى. بۇل تۋرالى Tengrinews.kz حابارلادى.

بوكسشىنىڭ ايتۋىنشا، فيلمدەگى ءازىل جاراسىمسىز، ال كينو كۇلكىلى ەمەس. "بۇل قازاقستان ەمەس، بۇل ناعىز قازاقستان ەمەس", - دەيدى گەننادي.

"ال بۇل ءفيلمنىڭ ەكىنشى بولىمىنە، ياعني "بورات 2" تۋىندىسىنا تۇسۋگە شاقىرسا نە ىستەر ەدىڭىز" دەگەن سۇراققا گولوۆكين قىسقا عانا "جوق، جوق" دەيدى.

ەسكە سالايىق، 33 جاستاعى قازاقستاندىق گەننادي گولوۆكين كاسىبي رينگتە ءبىر دە ءبىر رەت جەڭىلىپ كورمەگەن. قازىرگى ۋاقىتتا ول اقش-تا جاتتىعۋدا.

WBA (Super), IBO جانە WBC (Interim) تۇجىرىمدارى بويىنشا ورتا سالماقتاعى الەم چەمپيونى گەننادي گولوۆكين مەن IBF تۇجىرىمى بويىنشا چەمپيون، 26 جاستاعى داۆيد لەمە اراسىنداعى جەكپە-جەك 17 قازاندا نيۋ-يوركتەگى Madison Square Garden ارەناسىندا وتەدى

اباي-اقپارات