"مۇحاممەد پايعامبار ايتىپتى-مىس" دەگەن سوزدەر وتە كوپ. ولاردىڭ قايسىسىنىڭ شىن، قايسىسىنىڭ وتىرىك ەكەندىگىندە ءبىزدىڭ شارۋامىز جوق. بىراق، ءبىرتالاي جىل بۇرىن، ءبىر مولدانىڭ قولىنان سونداي سوزدەردىڭ بروششيۋرا تۇرىندەگى ءبىر جيناعىن كورگەنىم بار. سونداعى 8-حاديس مىناداي ەدى: "ارابتاردى ءۇش نەگىزدە ءسۇيىڭىز. بىرىنشىدەن، مەن-ءوزىم ارابپىن. ەكىنشىدەن، قۇران-كارىم اراب تىلىندە تۇسىرىلگەن. ۇشىنشىدەن، جۇماقتا سويلەنەتىن ءتىل دە - اراب ءتىلى". ياعني، ء"تاڭىردىڭ ءوزى و دۇنيەنىڭ ماڭگىلىك جۇماعىندا تەك ارابتىڭ قامىن عانا جەيتىن قۇداي" ەكەن! ال، كەرەك بولسا! ونىمەن سالعاستىرعاندا، بەس كۇندىك بۇ دۇنيەدە جۇماق (كوممۋنيزم) ورناتپاقشى بولعان نيكيتوشتىڭ (ن.س. حرۋششەۆتىڭ) "ورىس ءتىلى - كوممۋنيزم ءتىلى" دەگەن زىمياندىعى انشەيىن ءبىر، قياڭقى بالانىڭ قىرشاڭقى ءسوزى بولىپ قانا قالادى عوي!.. ەلىمىزدەگى قازىرگى مۇسىلمان قازاقتارىمىزدىڭ كوبىسىنىڭ نامازدى تەك ارابشا عانا قيراعاتتاپ، شاريعاتتىق بارشا امالداردى دا تەك ارابشا عانا ورىنداۋعا تىم بەلسەندىلىك تانىتىپ جۇرگەندەرىنە قاراعاندا، سول جولىڭبولعىرلار اتالمىش حاديسكە يمانداي ۇيىيدى دەگەن ءسوز! ول ول ما، "تالاي جىل بولدى، قوشقارىمىزدىڭ ماڭدايىننان دا، جىلانىمىزدىڭ جۇمىرتقاسىنان دا، اسقاباعىمىزدىڭ قابىعىنان دا، ءتىپتى، قارعالارىمىزدىڭ قارداعى ىزىنەن دە ناق اراب قارىپتەرىمەن جازىلعان "اللا" دەگەن ءسوز جاپپاي كورىنىس بەرە باستادى"! مۇسىلمان قازاعىمىزدىڭ دەنى تازا ارابشا "اللا"-لاپ كەتتى! ەندى قايتسىن، "قۇدايدىڭ ءوزى تەك اراب جازۋىمەن عانا "اللا" دەپ بەلگى بەرىپ وتىرسا"!
ايپىرم-اي، سونداعى سونشاما اڭگۇدىكتىكتىڭ سەبەبى نەدە دەسەيشى! نەدە بولۋشى ەدى، ءتايىرى; ول - ەلىمىزدەگى مۇسىلمانداردىڭ باسىم بولىگىنىڭ كادىمگى وي-ءورىسىنىڭ، يسلامدىق ساۋاتىنىڭ، جالپى، عىلىم-ءبىلىمىنىڭ باياعىدا اباي ء"انناتايىنا كاركاۋسار، پوشال دەرەۋ، كۇناھار، ءانى-ءشانى كۇلاپتار" تۇرىندە ءاجۋالاي كەلتىرگەن "ابرالى نامازىنان" ەش ايىرماشىلىعىنىڭ جوقتىعىندا.
"قارعامىزدىڭ قارداعى ءىزى" دەمەكشى، "سوناۋ ءبىر جىلى، ارقاداعى ءبىر قارعامىزدىڭ "اللا! اللا!" دەپ، ارابشا سۇڭقىلداپ قويماي قويعانى" جانە بار! كەزىندە، "اللا" دەگەن جازۋلاردىڭ جەر-جەردەن ارابشا قاپتاپ وقىلا باستاعاندىعى" بۇكىلقازاقستاندىق تەلەارنالارىمىزدان قالايشا داقپىرتتالىنىپ وتىردى، "اللاشىل" ارابي قارعامىز دا ءدال سولاي ەرەن "جارنامالانىپ" ەدى. جاقىندا سونى مەملەكەتتىك تەلەارنامىزدان قايتالاپ تاعى كورسەتتى! قىرىق سان ءتۇرلى مۇسىلماندارىمىزدىڭ كوپشىلىگى تاعى دا ولەردەي تاڭىرقاپ، ءبىر-بىرىنەن ءسۇيىنشى سۇراسىپ جاتتى. قالعاندارى ولارعا قوسىلماسا دا، ىشتەي قۇپتايتىندىقتارىن ۇنسىزدىكتەرىمەن كورسەتىپ باقتى. سوندىقتان، ءبىزدىڭ وسى جازبامىزدى دا قارعاپ-سىلەيتىندەردىڭ از بولمايتىندىعىنا سەنىمىمىز كامىل. مەيلى عوي، كىمنىڭ اۋزىنا قاقپاق بولعاندايمىز. وداندا، الگى "اللاشىل قارعامىزدى" تۇسىنۋگە تىرىسالىق. جالپى، "تۇيسىكتىك ەس يەلەرى" بولىپ تابىلاتىن حايۋاناتتار ىشىندە، وزىندىك "ويلاۋ" قابىلەتى جاعىنان دا، تىرلىك ەتۋدەگى الۋان ايلا-امالدارى جاعىنان دا، اينالاسىنداعى وزىنە ۇنامدى يا قورقىنىشتى دىبىس-داۋىستاردى "جاتتاپ الۋداعى تالانتى" جاعىنان دا، - قارعانىڭ ءجونى ەرەكشە. وعان قاراعاندا، توتىقۇسىڭىزدىڭ "جاتقاسوعارلىعى" جولدا قالادى. كوزى اشىق ادامدار قارعانىڭ كادىمگىدەي اقىلدىلىعىنىڭ قيلى-قيلى زەرتحانالىق عىلىمي دالەلدەرىن دە جاقسى بىلەدى.
ءسوز سوڭىندا ايتپاعىمىز: "اللالاعان" اششى ازان ءتۇن تىنىشتىعىندا ءھام تاڭ الدىندا توسىننان شاقىرىلعان سايىن، مەشىت مۇناراسىنان ۇركىپ ۇشىپ، "اللا"-لاپ كەتۋگە ءماجبۇر بولعان شوشىمالى قارعا دا - ءبىر، مەشىتتە ارابشا ناماز سۋدىراتىپ، ولارىنان وزدەرى دىم تۇسىنبەي، قۇر "اللا"-لايتىن مۇسىلماندارىمىز دا - ءبىر.

تىنىشتىقبەك ابدىكاكىمۇلى.