اللا قالاسا، الداعى قىركۇيەكتە ايدىن ايىمبەتوۆ باۋىرىمىز اسپان تورىنە عارىشكەر-زەرتتەۋشى ءارى بورت ينجەنەر رەتىندە ۇشاتىن بولادى. ايتسە دە بىزدەگى عارىش اگەنتتىگىنىڭ باسشىسى تالعات مۇساباەۆپەن بولعان ەكەۋارا اڭگىمە بارىسىندا ايتىلعان «روسكوسموس» كورپوراتسياسىنىڭ جەتەكشىسى كوماروۆ مىرزانىڭ سوزدەرىنە سەنەتىن بولساق، ءبىزدىڭ ايدىن باۋىرىمىز عارىشقا ۇشۋ ءۇشىن اجەپتاۋىر كولەمدە اقشا تولەۋگە ءتيىس ەكەن – اعىلشىندىق ءانشى سارا برايتمان سياقتى. «ايىمبەتوۆتىڭ عارىشقا ۇشۋى ءۇشىن قازاقستان 20 ميلليون اقش دوللارى شاماسىندا اقشا تولەۋگە ءتيىس، ازىرگە بۇل سوما تولەنگەن جوق...» دەيدى كورپوراتسيا جەتەكشىسى كوماروۆ. بۇ كىسى، ءتىپتى، قازاق ەلى اتالمىش سومانى تولەمەسە، ايىمبەتوۆتىڭ عارىشقا ۇشپاي قالۋى دا مۇمكىن ەكەنىن جاسىرعان جوق. ال اڭگىمە بارىسىندا مۇساباەۆ بولسا، كوماروۆقا قارسى ء«ماۋ» دەپ ءبىر اۋىز ءسوز ايتۋعا جارامادى، اشىعىن ايتۋ كەرەك.

قىسقاسىنان قايىرعاندا، مەنىڭ ويىم مىنانداي: قازاق ەلى رەسەيگە «بايقوڭىر» عارىش ايلاعىن جالعا بەرىپ وتىر ما – بەرىپ وتىر. بىلتىردان بەرى رەسەي وسىناۋ جالدىڭ قۇنىن دا، سۇيەگى قازاق جەرىنە شاشىلىپ كەتكەن «پروتوننىڭ» گەپتيلىنە بايلانىستى تولەۋگە ءتيىستى وتەماقىنى دا ءالى كۇنگە دەيىن تولەگەن جوق پا – تولەگەن جوق. مۇنى ەلىمىزدىڭ عارىش اگەنتتىگىندەگى اقپارات كوزىنەن الىنعان رەسمي مالىمەتتەر راستاپ وتىر. سوندا دەيمىن-اۋ، «قايداعى ءبىر 20 ميلليون دوللار دەيتىن بولمايتىن» اقشانى مۇساباەۆ مىرزا رەسەي تاراپىنىڭ قازاق ەلىنە تولەۋگە ءتيىستى جال قۇنى مەن گەپتيلدىڭ وتەماقىسىنىڭ ىشىنەن ەسەپتەپ، نەگە شىعارتىپ تاستامايدى، ا؟ الدە مۇساباەۆتىڭ «ميى وسىعان» دا جەتىڭكىرەمەي وتىر ما؟ تۇسىنىكسىز ماسەلە، وتە-وتە تۇسىنىكسىز، ويتكەنى، مەنىڭ ويىمشا، ورىس ەلى ايىمبەتوۆتى عارىشقا ۇشىرماۋدىڭ قانداي دا بولماسىن ءبىر امال-ايلاسىن قاراستىرىپ جاتقانعا ۇقسايدى.

نەگە؟

«نەگە؟» دەسەڭىز، عارىشقا عارىشكەر-زەرتتەۋشى رەتىندە ۇشايىن دەپ وتىرعان ايدىن باۋىرىمىز عارىشتاعى زەرتتەۋلەرى بارىسىندا بىزگە – ياعني، قاراپايىم قازاققا بەلگىسىز ءبىراز دا ءبىراز جۇمباق جايتتاردىڭ بەتىن اشۋى ابدەن مۇمكىن. باسقا ەشتەڭە دە ەمەس.

مارات ماداليموۆ. 

Abai.kz