"كەرەي مەن جانىبەك 1465 جىلى شۋ ءوڭىرىنىڭ قوزىباسى جەرىندە قازاق حاندىعىنىڭ نەگىزىن قالادى. بۇل تۋرالى مۇحاممەد حايدار ءدۋلاتيدىڭ «تاريح-ي-راشيدي» اتتى ەڭبەگىندە جازىلعان" دەپ وقىپ ەدىك. ەندى وعان دا وزگەرىس ەنگىزۋگە تالپىنىپ جاتىر ءبىزدىڭ پىسىق عالىمسىماقتار "قوزىباسى جەردىڭ اتاۋى ەمەس، كۇز باسى ياعني كۇزدىڭ باسىندا حاندىق قۇرۋى مۇمكىن" دەگەن قورىتىندى جاساپتى))) وسىندايلار وزدەرى اداسقاندارىمەن قويماي، ەلدى شاتاستىرىپ بولدى. "قازاق حاندىعىنىڭ 550 جىلدىعىنا قايتسەك تە جاڭالىق اشامىز" دەپ تىرباڭداعاندار جىل سوڭىنا دەيىن ءبىراز نارسەنى بۇلدىرەتىن سياقتى.

وتكەن اپتادا "قازاق حاندىعىنىڭ كارتاسى ۆاتيكاننان تابىلدى" دەپ بارلىق سايتتار جازىپ ءبىراز كۇلكى بولىپ ەدى. انىعىندا، ول ءسوز ستسك-دا مەنىڭ قويعان سۇراعىما بەرىلگەن جاۋاپ ەدى. كەلگەن قوناققا: "كىتابىڭىزدى جازۋ كەزىندە شەتەلدىك مۇراعاتپەن جۇمىس ىستەدىڭىز بە؟ كىتابىڭىز قازاقستان تاريحى ءۇشىن قانداي جاڭالىق اكەلەدى؟" دەگەن ەدىم. بىراق سۇراققا ناقتى جاۋاپ بەرە الماعان تاريحشى "ۆاتيكاننان قازاق حاندىعىنىڭ كارتاسى تابىلدى" دەپ، تۇسىنىكسىزدەۋ جاۋاپ بەرگەن بولاتىن. مەن ونى ماتەريال ەتىپ جازبادىم. سەبەبى، ول اقپاراتتى جاريالاۋ وقىرمانعا قيانات جاساۋمەن بىردەي بولاتىن. كەيىن، ول كىسىنىڭ ايتقان ءسوزى قاتە بولىپ شىقتى (جالعان). ول كىسىنىڭ ءسوزىن كەيبىر عالىمدار بىردەن تەرىسكە شىعاردى. 

عىلىم بوس كوپىرمە ءسوزدى كوتەرمەيدى. نەمەسە قىستا چەرنو-بەلىي ەتىپ شىعارعان كىتابىڭدى جازدا تسۆەتنوي ەتىپ باستىرۋ عىلىممەن اينالىسۋدىڭ بەلگىسى ەمەس. قازاق حاندىعى جايلى دەرەك بەرەتىن كسرو كەزىندە جازىلعان 15 كىتاپتىڭ شەگىن اينالدىرىپ بولدىق. بارلىق عالىمسىماقتار سىلتەمەنى سول كىتاپتارعا جاسايدى. ول عالىمسىماقتان كوشىرىپ الىپ وعان تاعى بىرەۋ سىلتەمە جاسايدى. ءسويتىپ اينالدىرعان 15 كىتاپتى قايتا-قايتا اينالدىرىپ وتاندىق تاريح عىلىمىنىڭ قازاق حاندىعىنا قاتىستى تۇسىن جاساپ وتىرمىز. ەندى بۇلارعا "قوزىباسى ەمەس ەكەن، دۇرىسى كۇز باسى" دەيتىندەر قوسىلدى

P.S: قازاق حاندىعى جايلى ورىس تاريحشىلارى سالىپ بەرگەن سۇرلەۋدەن اسىپ شىعا الماعاندار مەن اڭىزدى تاريح ەتىپ جازاتىندار ءسال ارىرەك جۇرسە ەكەن!

نۇرسەرىك جولبارىس

الەۋمەتتىك جەلىدەن