ادام سەنبەيدى – «استانا ەكسپو-2017» ۇلتتىق كومپانياسىنىڭ باسقارما توراعاسى تالعات ەرمەگياەۆ مىرزا زاڭسىز سىياقى رەتىندە قولما-قول اقشامەن 4,2 ميلليارد تەڭگە الىپتى. بۇل تۋرالى بۇگىن عانا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ اپپارات جەتەكشىسى ايگۇل شايىموۆا حانىم حابارلادى.

«تالعات ەرمەگياەۆ «استانا ەكسپو-2017» ۇلتتىق كومپانياسىنىڭ بۇرىنعى لاۋازىمدى تۇلعالارىمەن، سونداي-اق مەردىگەر ۇيىمدار مەن جالعان كاسىپورىن جەتەكشىلەرىمەن بىرلەسە وتىرىپ ەكسپو قۇرىلىسىنا بولىنگەن اسا ءىرى كولەمدەگى بيۋدجەت قارجىسىن تالان-تاراجعا سالعان، - دەدى شايىموۆا بۇگىن تۇسكە قاراي وتكىزىلگەن جەدەل بريفينگتە، - دالىرەك ايتاتىن بولساق، ەرمەگياەۆتىڭ 4 ميلليارد 200 ميلليون تەڭگە كولەمىندەگى بيۋدجەت اقشاسىن زاڭسىز سىياقى رەتىندە قولما-قول اقشامەن ساناپ العانى انىقتالىپ وتىر. قازىرگى كەزدە وسى سىبايلاستىققا قاتىسى بار دەپ كۇدىك كەلتىرىلىپ وتىرعان 10 لاۋازىمدى تۇلعا قاماۋعا جانە ۇيقاماققا الىنعان...»

راس، تاڭ قالىپ، تاڭداي قاقپاسقا امال جوق، ويتكەنى 4 ميلليارد 200 ميلليون تەڭگە دەگەنىڭىزدى قولما-قول اقشا كۇيىندە كوزىڭىزدىڭ الدىڭا ەلەستەتۋدىڭ ءوزى ءتىپتى قورقىنىشتى ەندى، اشىعىن ايتۋ كەرەك. ال ەندى وسى جەردە تاعى ءبىر سۇراق كوكەي شىركىندە كولبەڭ-كولبەڭ ەتە قالادى، ول – «وسى ميللياردتار سول – قولما-قول اقشا كۇيىندە تابىلدى ما، جوق الدە ۋحيت-سۋحيت بولىپ، ءىزىم-قايىم جوق بوپ كەتتى مە؟» دەگەن سۇراق. بۇلاي دەيتىن سەبەبىمىز – وقىرماندارىمىز ۇمىتپاعان بولسا، وسى جاقىندا عانا اقتوبەلىك وندىرگەنوۆ دەگەن دەپۋتات-كاسىپكەردىڭ ۇيىنەن تابىلعان قولما-قول اقشانى قوجامجاروۆ اگەنتتىگىنىڭ قىزمەتكەرلەرى «تابانى كۇرەكتەي» بەس ساعات ساناعان بولاتىن. بەس-التى ادامنىڭ بەس ساعات بويىنا مۇرنىنان شانشىلىپ، اقشا ساناعانىن كوزىڭىزدىڭ الدىنا ەلەستەتىپ كورىڭىزشى! سۇمدىق ەندى! ءبىز سوندا وندىرگەنوۆتىڭ ء«وندىرىپ» تاستاعانىنا قاتتى-قاتتى تاڭدانىپ ەدىك، سويتسەك – ەرمەگياەۆتىڭ جانىندا وندىرگەنوۆتىڭ «وندىرگەنى» بالانىڭ ويىنى بوپ قالدى، اشىعىن ايتايىق. قىسقاسىنان قايىرعاندا، كوڭىلدەگى سۇراق: اگەنتتىكتىڭ اپپارات جەتەكشىسى ايتىپ وتىرعان ميللياردتار «قۇتتى ورنىنا» قاشان قايتارىلادى؟ الدە قايتارىلدى ما؟ مۇنى – ءبىرىنشى ماسەلە دەسەك، ەكىنشى ماسەلە – «وسىنشاما ميللياردتاردى شىتىرلاتىپ تۇرىپ ساناپ الدى دەگەن كۇدىك كەلتىرىلىپ وتىرعان ەرمەگياەۆتىڭ «انشەيىن عانا» ۇيقاماقتا وتىرۋى قالاي ءوزى؟» دەگەن كوڭىلگە قونىمسىزداۋ ماسەلە، ويتكەنى قازىردىڭ وزىندە «ەرمەگياەۆ ۇيىندە وتىرعان جوق، ول – ميللياردتارىن جاسىرۋمەن اينالىسىپ جاتىر» دەگەن اڭگىمەلەردىڭ قۇلاعى قىلتيىپ جاتىر. ۇزىنقۇلاقتى راستاپ وتىرعان جوقپىز ءبىز ارينە، ايتسە دە «جەل سوقپاسا، ءشوپ باسىنىڭ قيمىلدامايتىنى» دا بەپ-بەلگىلى نارسە. قىسقاسى، بريفينگ بارىسىندا ەكسپودان قولدى بولعان ميللياردتاردىڭ كەشەلى-بۇگىنگى جانە بولاشاقتاعى تاعدىرى تۋرالى شايىموۆا حانىم ءلام-ميم دەگەن جوق. سوعان قاراعاندا، ءوزى دە ونشا-مۇنشا بىلە بەرمەيتىن بولسا كەرەك.

P.S. ءبىز بريفينگتەن شىققاندا ەكسپو قۇرىلىسىنان قايتىپ بارا جاتقان اۋىل قازاعىنىڭ گيتارانى توقپاقتاپ ايتقان ءانىن ەستىدىك – «ەكسپودان «جەل» شىقتى – ەرمەگياەۆ دەگەن «ەر» شىقتى...» دەگەن. جەل شىعىپ جاتسا جاقسىلىق ەمەس ايتەۋىر، ءبىزدىڭ بىلەتىنىمىز.

مارات ماداليموۆ.

Abai.kz