قوعامدا ورىن الىپ جاتقان ءتۇرلى ماسەلەلەردى ءسوز ەتكەن ء«ومىر ساباقتارى» دەرەكتى دراماسىنىڭ جارىققا شىققانىنا ءۇش اي بولدى. «حابار» اگەنتتىگىنىڭ تاپسىرىسىمەن «Mass Media Group» كومپانياسى تۇسىرگەن بۇل تەلەونىمنىڭ تۇساۋى 6 ساۋىردە «ور قازۋ» اتتى بولىممەن كەسىلگەن بولاتىن. بۇگىندە تەلەتۋىندىنىڭ 22 ءبولىمى كورەرمەن نازارىنا ۇسىنىلىپ، ول «حابار» اگەنتىگىنىڭ ۇتىمدى جوبالارىنىڭ بىرىنە اينالدى.

ء«ار ءبولىمنىڭ وزىندىك وقيعاسى مەن كەيىپكەرلەرى، بەرەر ساباعى مەن ءتالىمى، ايتاتىن اقيقاتى مەن ۇندەۋى بار» - دەيدى جوبا جەتەكشىسى باۋىرجان يبراگيم. اكەنىڭ زارى، انانىڭ شاراسىزدىعى، جەتىمنىڭ مۇڭلى كوزدەرى، اقشا قۋعان جاندار تاعدىرى، تۇتاستاي قوعام مەن جەكەلەگەن وتباسىنىڭ تۇيىتكىلدى ماسەلەلەرى ء«ومىر ساباقتارىنىڭ» باستى تاقىرىپتارىنا اينالدى. ەڭ باستىسى تەلەتۋىندى ومىردەن الىنعان شىنايى وقيعالار ىزىمەن تۇسىرىلەدى. كورەرمەننىڭ ەرەكشە ءىلتيپاتىنا يە بولعان بۇل دەرەكتى دراما الەۋمەتتىك جەلى قولدانۋشىلارى نازارىنان دا تىس قالمادى. Massmediagroup اككاۋنتىمەن تىركەلگەن كومپانيانىڭ ينستاگرامداعى جەكە پاراقشاسىنا جازىلۋشىلار كۇن ساناپ ارتىپ كەلەدى، سونداي-اق قازىرگى ۋاقىتتا فيلم you tube پاراقشاسىندا 20000-نان استام كورەرمەن جيناپ وتىر. بۇگىندە باعدارلامانىڭ رەيتينگىسى وتە جوعارى. وسى ورايدا كورەرمەندەر پىكىرىنە قۇلاق تۇرسەك:

انار جانپەيىسوۆا – ءۇي شارۋاسىنداعى ايەل، 52 جاستا:

- ء«ومىر ساباقتارىنىڭ» ءار ءبولىمىن اسىعا كۇتەمىن. وقيعالارى ومىردەن الىنعاندىقتان كورەرمەنىن باۋراپ بارادى. ماسەلەن، «ەنە تاربيەسى مەن كەلىن قۇرمەتى» تاقىرىبى ماعان وتە جاقىن. سەبەبى مەنىڭ ءوزىم ەكى كەلىن ۇستاپ وتىرمىن. ءفيلمدى كورىپ، ءوزىمدى تانىعانداي بولدىم. اسىرەسە، وسىناۋ جۇگى اۋىر تاقىرىپتى كورەرمەنگە جەڭىل، ءارى ۇعىنىقتى ەتىپ جەتكىزۋ ءتاسىلى وتە ۇنادى.

اقەركە يلياسوۆا – ستۋدەنت، 19 جاستا:

- مەن ء«ومىر ساباقتارىن» يۋتۋبتان كورەمىن. سونداي قىزىقتى فيلم! وتاندىق رەجيسسەرلاردىڭ جۇمىسىن كورىپ، ريزا بولدىم! كورەرمەنگە ءوتىمدى كينو ءتۇسىرۋ وتە قيىن عوي. جاقىندا شىققان «بىرەۋگە ور قازبا، ءوزىڭ تۇسەرسىڭ» سەرياسى وتە ۇنادى. شىنىندا، ايەل زاتىنا قارىنداسىڭداي قاراۋ كەرەك قوي. سونىمەن قاتار، فيلمگە تۇسكەن اكتەرلار دا وتە كاسىبي.

اسلان مىرزاباەۆ – بانك قىزمەتكەرى، 34 جاستا:

- ءساتتى شىققان وتاندىق جوبا. ۇيدەگىلەردىڭ ءبارى قارايدى. ءوز باسىم قولىم بوساعاندا ينتەرنەتتەن كورەمىن. كەشكى ۋاقىتتا ەفيرگە شىعىپ تۇرسا، ءتىپتى جاقسى بولار ەدى!

ء«ومىر ساباقتارى» - وقيعالار توپتاماسىنان قۇرالعان كوپ سەريالى دەرەكتى دراما. مۇنداعى ءار وقيعا قوعامداعى بەلگىلى ءبىر ماسەلەنى قوزعايدى. بۇل رەتتە ء«ومىر ساباقتارىنىڭ» ستسەناريستەرىنە ارتىلار جۇك اۋىر. ء«بىز حالىقتىڭ مۇڭ-مۇقتاجىن ءدوپ باسىپ، ولاردىڭ ىستىق-ىقىلاسىنا بولەنىپ ءجۇرمىز» - دەيدى، باس رەداكتور، ستسەناريست ايجانار مۇراتقىزى. بۇگىندە رەداكتسياعا كەلىپ تۇسەتىن حاتتار، قوڭىراۋلار، الەۋمەتتىك جەلىلەردەگى حابارلامالار لەگى تاۋسىلار ەمەس. بىرىندە جىلى لەبىزدەر مەن العىستار ايتىلسا، بىرىندە كورەرمەن وي تاستايدى، پىكىر قوسادى، ءوزىنىڭ باسىنان وتكەن وقيعانى باياندايدى. ستسەناريستەر ولاردى ىرىكتەي وتىرىپ، ءىلىپ الارلىق، اسەرلى وقيعالاردى تەرىپ جازادى. وسىلايشا، كورەرمەن وقيعاسىنىڭ ىزىمەن جازىلعان بولىمدەر دە جارىققا شىعىپ جاتىر. كەيىپكەر وبرازىنا كەلەتىن بولساق، اكتەر تاڭداۋدا رەجيسسەردىڭ قوياتىن ەڭ باستى تالابى – وبرازعا ەنە ءبىلۋ. بۇگىندە ق.قۋانىشباەۆ اتىنداعى قازاق مۋزىكالىق دراما تەاترى، جاستار تەاترىنىڭ اكتەرلارى، قازاق ۇلتتىق ونەر ۋنيۆەرسيتەتىنىڭ اكتەر شەبەرلىگى جانە تەاتر رەجيسسۋراسى كافەدراسىنىڭ ستۋدەنتتەرى باستى رولدەردى سومداۋدا. سونىمەن قاتار ەكىنشى، ءۇشىنشى پلانداعى رولدەرگە اكتەرلار كاستينگ ارقىلى دا ىرىكتەلىپ الىنادى. باعىن سىناپ كورەمىن دەۋشىلەرگە ءاردايىم ەسىك اشىق! بۇل رەتتە بويىندا دارىنى بار، اكتەر بولۋدى ارماندايتىن كەز-كەلگەن ادام ءۇشىن اتالعان جوبا كەرەمەت مۇمكىندىك.

«كەيىپكەردىڭ وبرازىن اشا الاتىن اكتەر قاراپايىم حالىق اراسىندا دا ءجۇرۋى مۇمكىن، سوندىقتان ءبىز ۇنەمى ىزدەنىس ۇستىندەمىز» - دەيدى، قويۋشى رەجيسسەر ايبول سەيلحان. بۇرىن سوڭدى قازاق كينوسى تاريحىندا بولماعان ءجايت- بۇگىندە ءتۇسىرىلىم توبى اپتاسىنا ەكى بولىمنەن تۇسىرۋدە. ارينە، بۇل ەڭ الدىمەن ء«ومىر ساباقتارى» ۇجىمىنىڭ ايانباي ەڭبەك ەتۋىنىڭ، كاسىبيلىگىنىڭ، ىزدەنىسىنىڭ ارقاسى. ەندەشە، «Mass Media Group» كومپانياسى ۇجىمىنا ساتتىلىك تىلەپ، ء«ومىر ساباقتارىنان» قىزىقتى دا شىتىرمان وقيعالار كۇتەمىز!

Abai.kz