بۇگىن قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ەرجان قاجى مالعاججىۇىۇلى وتانداستارىمىزدى استانا كۇنىمەن قۇتتىقتادى.

«استانا – ەلىمىزدىڭ رۋحاني ورداسى، كەلىسىم مەن بەيبىتشىلىكتىڭ التىن بەسىگى. ەلوردامىزدا ءار جىل سايىن وتەتىن الەمدىك جانە ءداستۇرلى ءدىن كوشباسشىلارىنىڭ قۇرىلتايى ادامزاتتى بىرلىككە، تاتۋلىققا، ىزگىلىككە، ۇيىمشىلدىققا ۇندەپ كەلەدى. تمد اۋماعىندا تەڭدەسى جوق، قازاق توپىراعىندا بۇرىن-سوڭدى بولماعان، ءسانى مەن سالتاناتى جاراسقان، ءزاۋلىم «ازىرەت سۇلتان»، «نۇر استانا» مەشىتتەرى جاڭا ەلوردامىز استانادا بوي كوتەردى. ەگەمەن ەلىمىز تاۋەلسىزدىك جىلدارىندا رۋحاني قۇندىلىقتارىمەن قايتا قاۋىشىپ، ەركىن قۇلشىلىق جاساۋدا. بۇل – اللانىڭ بەرگەن ۇلى نىعمەتى، تەڭدەسسىز سىيى. استانا كۇنى قۇتتى بولعاي. ەلباسى باستاعان ەلىمىزدىڭ ەڭسەسى بيىك، مەملەكەتىمىزدىڭ مەرەيى ۇستەم بولعاي. ۇلى مۇراتتارعا ۇمتىلعان جۇرتىمىزدىڭ دۇعاسى قابىل، يمانى كامىل بولعاي»، – دەلىنگەن باس ءمۇفتيدىڭ قۇتتىقتاۋ حاتىندا.

قمدب ءباسپاسوز قىزمەتى

www.muftyat.kz