ۆيكتور يانۋكوۆيچ باتىستىق بەدەلدى باق BBC-ءدىڭ «Newsnight» باعدارلاماسىنا سۇحبات بەردى. بۇل ونىڭ ۋكراينادا بولعان مەملەكەتتىك توڭكەرىستەن كەيىن رەسەيلىك ەمەس باق-قا بەرگەن العاشقى سۇحباتى.

ەكس-پرەزيدەنت ءوز سۇحباتىندا مايدانداعى قىرعىن تۋرالى ايتتى. ونىڭ سوزىنشە ول قان توگىلمەۋىنە بارىن سالعان. يانۋكوۆيچ 2014 جىلى، اقپانداعى جۇزدەگەن ادامنىڭ ءولىم قۇشۋىنا سەبەپ بولعان قاقتىعىستارعا بيلىككە قارسى كەلگەن راديكالدار كىنالى دەپ سانايدى.

«مەن قارسى تۇردىم، ءۇزىلدى-كەسىلدى قارسى كەلدىم. ەشقانداي بيلىك ءبىر تامشى قانعا تاتىمايدى. سوندىقتان مەن ۋكراينادا قان توگۋگە قارسى بولدىم. مەن ۋكراينادا سوعىس بولماۋى ءۇشىن قولىمنان كەلگەنىن جاسادىم»، - دەيدى يانۋكوۆيچ سۇحباتىندا. ول سونداي-اق، قۇقىق قورعاۋ ورگاندارىنىڭ ەشقايسىسىنا قارۋسىز ەرەۋىلدەرگە قارسى قارۋ قولدانۋعا بۇيرىق بەرمەگەنىن، الايدا پوليتسيانى راديكالداردىڭ ارانداتقانىن ايتادى.  

ءوزىنىڭ ۋكراينادان كەتۋىنە ەكس-پرەزيدەنت: «مەن پۋتينگە مەنى قۇتقار دەمەدىم، الايدا ول مەنىمەن اقىلداسپاي-اق ءوزىنىڭ ارناۋلى قىزمەتتەرى ارقىلى مەنى قۇتقاردى. مەن وعان مەنىڭ ومىرىمە اراشا بولعانى ءۇشىن ارينە راحمەت ايتامىن»، - دەدى.

رەسەي پرەزيدەنتى ءپۋتيننىڭ «ۋكراينا دەگەنىڭ مۇلدە مەملەكەت ەمەس قوي» دەگەن ءسوزى تۋرالى: «بۇندا – ساياسي شوۋدىڭ ەلەمەنتى بار» دەپ اتادى يانۋكوۆيچ. ول سونداي-اق، ء«بىز، رەسەي جانە ۋكراينانىڭ، كورشى مەملەكەت رەتىندەگى بۇگىنگى جانە تاريحي اقيقاتىمىز تاتۋ-ءتاتتى بولۋعا جەتەلەيدى. كورشىنىڭ اتى كورشى عوي، ونى تاڭداپ المايسىڭ»، - دەدى.

«ارينە، ۋكرايناداعى بولعان وقيعا ۋكراين حالقىنىڭ تراگەدياسى. ءبىز بۇل جاعدايدان شىعاتىن جول ىزدەۋىمىز كەرەك.  بۇگىندە سوعىس جالعاسىپ جاتىر. بۇل فاكت. قىرىمدى قايتارىپ الامىز دەيدى، قالاي قايتارامىز، تاعى دا سوعىسپەن بە؟ دەمەك تاعى دا سوعىس؟»، - دەپ ەلدىڭ قازىرگى جاعدايىنا الاڭداۋشىلىق ءبىلدىردى يانۋكوۆيچ.

ەستەرىڭىزگە سالساق، يانۋكوۆيچ بيلىكتەن تايدىرىلعان سوڭ رەسەيدى پانالاعان بولاتىن. ول ونداعى جەرگىلىكتى تەلەارنالار ارقىلى بىرنەشە رەت ءوزىنىڭ ءتىرى ەكەنىن ءارى ۋكراينانىڭ زاڭدى پرەزيدەنتى ەكەنىن مالىمدەگەن بولاتىن. ۋكراينانىڭ ەكس-پرەزيدەنتىنىڭ لاۋازىمى ۋكراينا راداسىنىڭ 4 اقپانداعى قابىلداعان زاڭىنا ساي، وسىدان بىرنەشە كۇن بۇرىن، 18 ماۋسىمدا رەسمي توقتاتىلدى. ول، 2014 جىلى، اقپان ايىندا ەلدەگى مەملەكەتتىك توڭكەرىستەن كەيىن ەلدەن كەتۋگە ءماجبۇر بولعان.

Abai.kz