«ەكسپو-نىڭ» بۇرىنعى قوماعاي باسشىلارىنا قاتىستى جاڭا دەرەك پايدا بولدى. Nur.kz جاڭالىقتارىنىڭ جازۋىنشا، قاجىمۇرات ۇسەنوۆ لاۋازىمىن پايدالانىپ، اشىق تەندەردە «Southfork» سەرىكتەستىگىنە جەڭىستى جۇلىپ بەرگەن.

سول قىزمەتى ءۇشىن قىرۋار قاراجاتقا كەنەلىپتى. ال ۇيقاماقتا وتىرعان تالعات ەرمەگياەۆ بىرنەشە فيرمانىڭ ۇلەسكەرى ەتىپ ءوزىنىڭ تۋعان-تۋىستارىن تىركەي بەرگەن.

قالتا قامىن كۇيتتەگەن ەكسپوشىلارعا قاتىستى جاڭا دەرەكتەر قىلاڭ بەرۋدە. كولىكپەن ادام قاققىش ماقسات ۇسەنوۆتىڭ اكەسى قاجىمۇرات ۇسەنوۆ وتكەن اپتادا كومپانيا قاراجاتىن قىمقىردى دەپ ايىپتالىپ، ۇيقاماققا الىندى.

ول اشىق تەندەردە «Southfork» سەرىكتەستىگىن ءوز قولىمەن جەڭىمپاز جاساپ، بايگەنى جۇلىپ بەرىپتى. جۋرناليستىك زەرتتەۋ ناتيجەسىندە جەكە مەكەمەنىڭ تەندەردەن 724 ملن تەڭگەدەن اساتىن اقشانى قارپىعانىن انىقتالدى.

«استانا قالاسى الماتى اۋدانىنىڭ №2 اۋداندىق سوتى بۇرىنعى قۇرىلىس باسقارماسىنىڭ باسشىسى قاجىمۇرات ۇسەنوۆكە قاتىستى ۇيدە قاماپ ۇستاۋ تۇرىندەگى بۇلتارتپاۋ شاراسىن سانكتسيالادى. قاجىمۇرات ۇسەنوۆ قىلمىستىق كودەكستىڭ 176-بابى، 4-تارماعىنىڭ «ب» تارماقشاسى بويىنشا كوزدەلگەن قىلمىستى جاساعانى ءۇشىن، ياعني اسا ءىرى كولەمدە 214 ملن تەڭگە سوماسىنداعى قارجىنى جىمقىردى دەپ كۇدىكتەلۋدە»، — دەدى استانا قالالىق سوتىنىڭ اقپاراتتىق قامتاماسىز ەتۋ ءبولىمىنىڭ باسشىسى بوتاگوز بايانوۆا.

اتى-شۋلى ەكسپو ىسىندە تالعات ەرمەگياەۆ تە باستى نىساناعا ىلىككەن. ۇيقاماققا الىنعان ول دا، ساناساڭ شەتى شىقپايتىن ءىرىلى-ۇساق فيرمالارعا ءوزىنىڭ تۋعان-تۋىستارىن ۇلەسكەر ەتىپتى. مۇنى سايتتان انىق اڭعارۋعا بولادى. قوسىمشا اكتسيا يەلەرىنىڭ ءتىزىمى تايلى-تاياعىمەن وسىندا جاريالانعان.

بىلتىر تالعات ەرمەگياەۆتىڭ جۇبايى كامار ەرمەگياەۆا بريتاندىق برەندتەگى حالىقارالىق «دجوزەف» كيىم دۇكەنىن اشقان ەدى. قىرۋار قاراجاتتى قاجەت ەتەتىن كاسىپكە ەكسپو-نىڭ ەكس-باسشىسى دەمەۋشى بولعان. ال كۇنى كەشە ەلوردالىق سوت شەنەۋنىككە قىرۋار تابىس ءتۇسىرىپ وتىرعان 6 بىردەي كومپانيانىڭ ەسەپ شوتى مەن مۇلكىنە تىيىم سالدى.

تىلشىلەر انىقتاعانداي، كومپانيا قاتارىنا كىرگەن «سا-بەك» جانە «تكم» سەرىكتەستىكتەرىنە الماتىداعى «جەتىسۋ»، «يالان» جانە «راحات» بازارى تيەسىلى بولىپ شىقتى.

وسى تۇستا، ەكسپوعا ارتىلعان مىندەت تىم اۋىر. جوسپار بويىنشا، قۇرىلىس 2016 جىلى تۇگەلدەي اياقتالۋى ءتيىس ەدى. ال 2017-دە 100-دەن استام ەل كورمەگە قاتىسىپ، ميلليونداعان تۋريست كەلۋى كەرەك.

بىراق  قىزىل اقشا شەنەۋنىكتەر ءۇشىن ەل ابىرويىنان قىمبات بولعانعا ۇقسايدى. قازىر قوس ىسكە بايلانىستى تەرگەۋ امالدارى جۇرگىزىلىپ جاتىر.

كىنالەرى دالەلدەنگەن جاعدايدا، لاۋازىمدى تۇلعالار 7 مەن 12 جىل ارالىعىندا تەمىر تورعا توعىتىلۋى مۇمكىن.

اباي-اقپارات