27 قازاندا قاراعاندى وبلىستىق سوتىندا «احمەتوۆ ءىسى» بويىنشا كۋاگەرلەردەن جاۋاپ الۋ ودان ءارى جالعاستى. سوت قاراعاندى قالاسىنىڭ يندۋستريالدىق پاركىنىڭ ينفراقۇرىلىمدىق نىساندارىن سالۋدا بيۋدجەت قارجىسىن ۇرلاۋ ەپيزودىن قاراستىرۋدا.

بۇگىنگى وتىرىستا بەينە بايلانىس ارقىلى الماتى قالاسىنداعى كۋاگەرلەردەن جاۋاپ الىندى. سولاردىڭ ءبىرى «سومنۋس» جشس-ءنىڭ ديرەكتورى ن. ەلعوندين وزىنەن «Sapa Project Group» جشس-ءنىڭ جەتەكشىسى د. نۇرباەۆتىڭ قوندىرعى جەتكىزۋگە كومەك سۇراپ، ماتەريالدىق سىياقى ەسەبىندە «تويوتا لاند كرۋزەر پرادو» اۆتوكولىگىن بەرۋگە كەلىسكەنىن اشىپ ايتتى.

ايتا كەتەلىك، بۇعان دەيىنگى سوت وتىرىستارىنىڭ بىرىندە كۋاگەر رەتىندە جاۋاپ بەرگەن قازاقستاندىق ونەركاسىپتىك كورپوراتسيانىڭ باس ديرەكتورىنىڭ ورىنباسارى ءالجان اقمولداەۆ قاراعاندى وبلىسىنىڭ ەكس-اكىمى س. احمەتوۆتىڭ قامقورلىعىنىڭ ارقاسىندا ءوزىنىڭ كومپانياسىنىڭ يندۋستريالدىق پاركتەگى ينفراقۇرىلىمدىق نىساندى سالۋعا ءتيىمدى قوسالقى مەردىگەرلىككە قول جەتكىزگەنىن مالىمدەگەن ەدى. سوت زالىنداعى سوزىندە ول قوندىرعىنى جەتكىزۋگە دۋمان نۇرباەۆتىڭ «Sapa Project Group» كومپانياسىنىڭ كومەگىن پايدالانعانىن حابارلاعانى ءمالىم. ال بۇگىنگى وتىرىستاعى كۋاگەر ن. ەلعوندين ءا. اقمولداەۆتىڭ سوتقا بەرگەن تۇسىنىكتەرىن راستادى.

كۋاگەر سوتتالۋشى د. نۇرباەۆتىڭ ءوزىنىڭ ەسكى دوسى ەكەنىن جاسىرمادى.  2012 جىلى ءبىر جۇمىس ۇسىنىپ، وعان ءوزىنىڭ كەلىسىمىن بەرگەنىن اشىق ايتتى. ايىپتاۋشى تاراپ ونىڭ سوتقا دەيىنگى تەرگەۋ كەزىندە بەرگەن تۇسىنىكتەرىن وقىپ بەردى. ونىڭ ءماتىنى تومەندەگىدەي:

«2012 جىلدىڭ باسىندا ماعان ستۋدەنتتىك شاقتاعى دوسىم د. نۇرباەۆ حابارلاسىپ، ءبىر جۇمىس ۇسىندى. سەبەبى ول مەنىڭ شەتەلدەردەن تاۋار جەتكىزۋمەن اينالىساتىن فيرمامنىڭ بارىن بىلەتىن. دۋمان قاراعاندى قالاسىندا ۇلكەن ءبىر جوبانى قولعا العانىن، سول بويىنشا ««Sapa Project Group» جشس-نە ءىرى كولەمدە اقشا تۇسەتىنىن حابارلادى. ول سونداي-اق، تاپسىرىس بەرۋشىگە كەلىسىم-شارت بويىنشا كەم دەگەندە 2 ملن. اقش دوللارىنا جۋىق اقشا قايتارۋ قاجەتتىگىن ايتتى. ودان كەيىنگى ءىس-ارەكەتتەر تاپسىرىس بەرۋشىنىڭ قۇزىرىندا ەكەنىن، وسى ىسكە جاردەمدەسۋىمدى ءوتىندى. مەن كەلىستىم. بىراق ول ءىستىڭ ەگجەي-تەگجەيىن ءتۇسىندىرىپ جاتپادى. تەك تاپسىرىس بەرۋشىگە اقشانى قايتارۋ ءۇشىن وعان «Sapa Project Group» ارقىلى سىرتتاعى فيرمالاردىڭ كومەگىمەن قارجىنى قولما-قول اقشاعا اينالدىرۋ كەرەكتىگىن جەتكىزدى. جانە ونداي فيرمالاردىڭ ىشىنەن «سومنۋس» جشس-ءىن تاڭداپ العانىن ايتا كەلە جوبا ىسكە اسىرىلعاننان كەيىن ماتەريالدىق سىياقى ەسەبىندە «تويوتا لاند كرۋزەر پرادو» اۆتوكولىگىن بەرۋگە ۋادە ەتتى. ارادا بىرنەشە اپتا وتكەندە د. نۇرباەۆ تاعى حابارلاسىپ، بۇل سىزباعا تاعى بىرنەشە فيرمانىڭ كومەگى كەرەكتىگىن مالىمدەدى. مەن ونداي فيرماسى بار دوستارىم كوپ ەكەنىن ايتتىم».

كۋاگەردىڭ ايتۋىنشا، كەيىنىرەك «سومنۋس» جشس-ءى جانە ءوزى تاپقان «Perfect Education»، «Gepipetrade» جشس-تەرى ارقىلى «Sapa Project Group»-تان تۇسكەن بارلىق قاراجات قولما-قول اقشاعا اينالدىرىلعان. الايدا د. نۇرباەۆ وعان ۋادە ەتكەن «تويوتا لاند كرۋزەر پرادو» اۆتوكولىگىن بەرمەي كەتىپتى. مەملەكەتتىك ايىپتاۋشى كۋاگەردىڭ تەرگەۋگە بەرگەن جاۋابىندا مىناداي دالەلدەر بارىن سوتقا وقىپ بەردى: ««Gepipetrade» جشس-ءى مەن «Sapa Project Group» جشس-ءى اراسىندا تەحنولوگيالىق قوندىرعىنى جەتكىزۋگە سوماسى 117 ملن. 549 مىڭ تەڭگەگە كەلىسىم-شارت جاسالعان. «Perfect Education» جشس-ءى مەن «Sapa Project Group» جشس-ءى اراسىندا دا وسىعان ۇقساس كەلىسىم-شارت جاسالادى. ونىڭ قۇنى 504 ملن. 770 مىڭ تەڭگە دەپ كورسەتىلەدى. «سومنۋس» پەن «Sapa Project Group»-ءتىڭ شوتتارىنا 657 ملن. 768 مىڭ تەڭگە تۇسەدى. ناتيجەسىندە اتالعان ءتورت كومپانيانىڭ شوتتارىنا 1 ملرد. 280 ملن. 808 مىڭ 263 تەڭگە ءتۇسىپ، بىردەن قولما-قول اقشاعا اينالدىرىلادى».

احمەتوۆ ءىسى. كۋاگەر ج. احاشەۆ شابادانداعى اقشا تۋرالى ايتتى

27 قازاندا «احمەتوۆ ءىسى» بويىنشا سوت وتىرىسى جالعاسىپ، الماتى قالاسىنداعى كۋاگەرلەردەن «ونلاين» تارتىبىمەن سوتتا جاۋاپ الىندى. «Eco-Treatment systems» جشس-ءنىڭ بۇرىنعى قىزمەتكەرى جانىبەك احاشەۆ سوتتالۋشى دۋمان نۇرباەۆپەن بىرلەسىپ قاراعاندى وبلىسىنىڭ باسشىلىعىنا ارنالعان اقشانى قالاي جىبەرگەنى تۋرالى اڭگىمەلەدى. ج. احاشەۆ د. نۇرباەۆ «Eco-Trading systems» جشس-ءنىڭ 25 پايىزدىق ۇلەسىن ساتىپ الۋدى ۇسىنعاننان كەيىن «Eco-Treatment systems» كومپانياسىنا رەسمي تۇردە جۇمىسقا ورنالاسادى. وسىدان كەيىن نۇرباەۆتىڭ كەڭەسشىسىنە اينالعان كۋاگەر قاراعاندى قالاسىنىڭ يندۋستريالدىق پاركىندەگى شارۋاشىلىق-تۇرمىستىق سۋاعارلاردى تازالاۋ ستانتسياسىنىڭ قۇرىلىسى تۋرالى بىلاي تۇسىنىك بەردى: «2011 جىلى نۇرباەۆ ماعان قۇنى 1 ملرد. تەڭگە تۇراتىن قاراعاندى قالاسىنىڭ يندۋستريالدىق پاركىندەگى شارۋاشىلىق-تۇرمىستىق سۋاعارلاردى تازالاۋ ستانتسياسىنىڭ قۇرىلىسى جونىندە اقمولداەۆپەن كەلىسسوزدەر جۇرگىزىپ جاتقانىن ايتتى. ول جوبانىڭ پايدالىلىعى جاعىنان ءبىزدى وتە قىزىقتىراتىنىنا ەكپىن ءتۇسىردى».

جانىبەك احاشەۆ سوتقا حابارلاعانداي، الماتىلىقتار جوبانى جۇزەگە اسىرۋعا كىرىسكەنىمەن كەيىنىرەك «Eco-Treatment systems» جشس-ءنىڭ تەك قۇرىلىس-مونتاج جۇمىستارىمەن عانا اينالىساتىنىن، ال قوندىرعىنى جەتكىزۋ بوگدە كومپانيالارعا جۇكتەلەتىنىن ەستيدى. ءسويتىپ ول بۇعان نارازىلىق بىلدىرەدى. وسى جەردە كاۋگەردىڭ سوتقا دەيىنگى تەرگەۋگە بەرگەن جاۋابىن مەملەكەتتىك ايىپتاۋشى وقىپ بەردى: «بۇعان نارازىلىق ءبىلدىردىم. بىراق نۇرباەۆ بۇل تاپسىرىس بەرۋشىنىڭ قويعان تالابى ەكەندىگىن، ونىڭ تالقىلانبايتىنىن ەسكەرتتى. ەگەر دە تالاپپەن كەلىسپەسەك، كەلىسىمگە قول جەتكىزە المايمىز، بەدەلىمىزگە دە نۇقسان كەلەدى دەدى. مۇنداي تالاپتى اقمولداەۆ قويعانىن ەستىدىم. مەن ونى ۇزاق ۋاقىت «تسەنتر-ستروي كومپلەكت نس» جشس-ءنىڭ باسشىسى دەپ ساناپ كەلگەن ەدىم. ءسال كەيىنىرەك «تسەنتر-ستروي كومپلەكت نس» جشس-ءنىڭ ديرەكتورى اسانوۆ ەكەنىن، ال اقمولداەۆ كومپانيانىڭ جۇمىسىن ۇيلەستىرۋشى ەكەنىن ءبىلدىم».

سونىمەن قاتار، ج. احاشەۆ د. نۇرباەۆتىڭ بىرىككەن اراب امىرلىكتەرىندە تىركەلگەن كومپانيالاردىڭ شوتىنا اقشا اۋدارۋدىڭ جولدارىن سۇراپ، ءوتىنىش جاسايدى. انىعىندا د. نۇرباەۆ وعان شەتەلدىك ءبىر كومپانيانىڭ دەرەكتەمەسىن ەلەكتروندىق پوشتاسىنا جىبەرىپ، اتالعان دەرەكتەمەگە اقشا اۋدارۋدىڭ جولدارىن ءوزىنىڭ تانىستارىنان سۇراستىرۋدى وتىنەدى. بىراق ج. احاشەۆ بۇل ماسەلەنىڭ شەشىمىن تابا المايدى. سودان كەيىن د. نۇرباەۆ بىرەۋگە اقشا اپارىپ بەرۋ ءۇشىن كۋاگەردى جانىنا ىلەسىپ جۇرۋگە شاقىرادى. مۇنداي وقيعا ەكى رەت بولىپتى. «2012 جىلى مامىر ايىنىڭ باسىندا نۇرباەۆ بىرەۋگە ءىرى كولەمدە اقشا اپارىپ بەرۋ كەزىندە جانىنا ىلەسىپ ءجۇرۋدى ءوتىندى. ءبىز الماتىداعى «Eco-Treatment systems» جشس-ءنىڭ كەڭسەسىنەن شىعىپ، «الماتى پالاس» ساۋدا ءۇيىنىڭ جانىنا كەلدىك. سول جەردە مەن دۋماننىڭ اۆتوكولىك باگاجىنان شابادان الىپ شىققانىن كوردىم. ەكىنشى رەت مۇنداي وقيعا 2012 جىلدىڭ كوكتەمىنىڭ سوڭىندا بولدى. د. نۇرباەۆ ەكەۋمىز مەنىڭ اۆتوكولىگىممەن فيرمانىڭ كەڭسەسىنەن شىعىپ، «نۇرلىتاۋ» بيزنەس ورتالىعىنىڭ اۆتوتۇراعىنا توقتادىق. نۇرباەۆ اتالعان جوبا بويىنشا شابادانداعى اقشالار قاراعاندى وبلىسىنىڭ باسشىلىعىنا جىبەرىلىپ جاتقانىن ايتتى»، - دەپ اڭگىمەلەدى ج. احاشەۆ.

ءامينا باكىر

Abai.kz