ءتىس شۇقۋ مەن ءىس قىلۋ
«بىزدە ناعىز وپپوزيتسيا بار ما؟» دەگەن ساۋالعا وراي كوكەيدە جۇرگەن ايتارىم بار ەدى. سونىڭ ءساتى بۇگىن ءتۇسىپ تۇر.
وپپوزيتسيا – تاڭداپ الار كاسىپ ەمەس. ول – وقۋمەن كەلەر ماماندىق تا ەمەس. ول – بايۋعا باستايتىن بيزنەس تە ەمەس.
وپپوزيتسيا – كوڭىلدىڭ الەۋمەتتىك-ساياسي «سوستويانيەسى». ەرىك-جىگەردىڭ قالاۋى. وعان ەشكىمدى ايداپ اپارمايدى. «ايداپ اپارار» ءبىر كۇش بولسا، ول – قوعامنىڭ الەۋمەتتىك احۋالىنان تۋعان تانىم مەن تۇيسىك قانا. سول تانىم مەن تۇيسىكتىڭ توڭىرەگىنە جينالعان الەۋمەتتىك توپ «وپپوزيتسيا» دەپ اتالسا كەرەك.
سوندىقتان وپپوزيتسياعا «بارعان ادام» ەشكىمنىڭ الدىندا وزىنە مىندەت المايدى. سەن «ويتپەدىڭ»، «بۇيتپەدىڭ» دەپ، ەشكىم وعان مىندەت قويۋعا قاقىسى جوق. ەگەر ول وپپوزيتسيا بىرىككەن ساياسي كۇشكە اينالىپ، ساياسي پارتيا قۇرىپ، قوعامدى وزگەرتەمىز دەپ، وزىنە مىندەت الىپ جاتسا – اڭگىمە باسقا.
ال جىلى پەشتىڭ جانىنا جانتايا جاتىپ اپ، كەشكىلىك ىشكەن سىلدىر-سۋ كوجەنىڭ ىشىندەگى ءۇش ءتۇيىر ەتتىڭ تىسكە تۇرعان تالشىعىن سىپىرتقىدان سىندىرىپ العان شيمەن شۇقي وتىرىپ: «بىزدە وپپوزيتسيا جوق!» – دەپ، الدەبىرەۋلەردى جازعىرا سويلەۋ – ءوزىنىڭ اشقۇرساق كۇنىنە باسقا بىرەۋدى جازعىرعانمەن بىردەي جاعداي. سول كۇنىڭە نارازى ەكەنسىڭ – ءوزىڭ بار سول وپپوزيتسياعا! «قاراسۋ ساپىرعان مىناۋ كۇنىم قۇرىسىن، وپپوزيتسيانى «ويتتىرەم»، «بۇيتتىرەم» دەسەڭ – پليز: بارا قال سول ورتاعا!
ال بارا المايدى ەكەنسىڭ، قىشىرىڭ جوق ەكەن – قۇر وسىرىق ويبايمەن وڭعان كۇنگە كەنەلە قالۋ بولمايدى. ءبىر بۇرىشتا بۇعىپ جاتقان بىرەۋلەر ءۇشىن باسىن بايگەگە تىككەن «باسقالار» جۇماق ورناتىپ بەرمەيدى.
وپپوزيتسيا – جالدامالى جۇمىسشى ەمەس. وعان «جىلى پەشتىڭ تۇبىندە جاتقان» قازاق جالاقى تولەمەيدى. ەندەشە تاسادا تۇرىپ ء«تىسىن شۇقىعان» قازاق پەن وپپوزيتسيانىڭ اراسىندا جاسالعان ەڭبەك شارتى بولماسا، ول قازاقتىڭ وپپوزيتسياعا ودىراڭداۋعا قاقىسى بار ما؟
(وسىعان داۋ ايتار ء«تىس شۇقىعىشتار» شىعا قالسا، جالعاسىن جازا جاتارمىن).
ەرمۇرات باپي
«فەيسبۋك» پاراقشاسىنان
