ەكەۋى دە ول كەزدە اكىم ەدى. ءبىرى باتىس وبلىستاردىڭ ءبىرىن “بالشىقتان
ارشىپ جاتسا، ەكىنشىسى وڭتۇستىكتەگى شىمكەنتتىڭ شىرايىن كەلتىرۋگە كۇش سالىپ جاتقان بولاتىن. الدىمەن وڭتۇستىككە جولىم ءتۇستى. توپ جۋرناليست اكىمنىڭ جولىن تورىپ، ەكى كۇن كۇتكەنىمىز ەسىمدە. وبلىستى ەلباسى ارالاپ جۇرگەنىن ەستىگەن سوڭ ساپارباەۆتىڭ ءبىزدى ويلاۋعا مۇرشاسى دا جوق ەكەنىن تۇسىندىك. ءۇشىنشى كۇنى ءوزى ىزدەپ كەلدى. ول كەزدە اكىمنىڭ جۋرناليستەردى ءوزى ىزدەپ كەلۋى سونشالىقتى جاڭالىق ەمەس ەدى. مەنى تاڭ قالدىرعانى بەردىبەك اعامىزدىڭ اماندىقتان سوڭ ايتقان ءسوزى بولدى.
-مەن قازاق جۋرناليستەرىنە قارىزدارمىن،-دەدى ول، – ەكونوميكا مينيسترلىگىندە قاراپايىم قىزمەتكەر بولىپ جۇرگەنىمدە ءبىر كۇنى “حابار” جۋرناليستەرىنە قازاقشا سۇحبات بەرەتىن ادام تابىلماي، باسشىلار امالسىز مەنى ۇسىنىپتى. ەكونوميكانى قازاقشا سويلەتۋ وڭاي ەمەس قوي. شاما شارقىنشا سويلەپ بەردىم. سول كۇنى-اق مەملەكەت باسشىسىنىڭ كوزىنە تۇسكەن بولۋىم كەرەك. كوپ ۇزاماي قىزمەتىم دە ورلەي بەردى…
…اتىراۋ ساپارىندا دا ءدال سولاي. العاشقى كۇنى اكىمدى مازالاماي-اق، ءتۇسىرىلىمدى ەرتەڭگە جوسپارلاپ جاتقانبىز. تۇندە يمەكەڭنىڭ ءوزى ىزدەپ كەلىپ تۇر. رياسىز اڭگىمە تاڭعا دەيىن سوزىلدى-اۋ دەيمىن سول كۇنى. سۇحبات تا جازىلدى. ەرتەسى قالانى دا جاقسىلاپ ءتۇسىرىپ الدىق. اتىراۋدىڭ اجارى اشىلىپ، كوز تويماستاي بولىپ تۇرعان كەز. تاسماعانبەتوۆتىڭ قالانىڭ بۇكىل ۇيلەرىن بوياپ شىققانىن “بوياۋشى، بوياۋشى دەگەنگە…” دەپ الگى ماقالعا كەلتىرگىسى كەلگەندەرگە تابىلدى دوسىموۆتىڭ “ساقالىن ەمەس- شاھارىن بوياپ جاتىر عوي” دەپ ءۋاج ايتاتىن كەزى عوي.

كەتەرىمىزدە يمەكەڭ:
-تىم ماقتاپ جىبەرمەڭدەر! مەن اتىراۋدا ءالى دە ءبىراز جۇمىس ىستەۋىم كەرەك!-دەپ ءازىل-شىنى ارالاس ايتىپ قالدى. كوپ ۇزاماي تاسماعانبەتوۆتىڭ قىزمەتى كوتەرىلدى. الماتىدا اتىراۋ وبلىسىنىڭ كورمەسىن ءتۇسىرىپ جاتىر ەدىك، ەكسپوناتتاردى ارالاپ جۇرگەن يمەكەڭدى كوزىمىز شالىپ قالدى. ول دا ءبىزدى بايقاعان بولۋى كەرەك، كوپشىلىكتىڭ ورتاسىنان سۋىرىلىپ كەلىپ قۇشاقتاي امانداستى.
-مەن سەندەرگە ايتىپ ەدىم عوي، تىم ماقتاي بەرمەڭدەر…ەندى مىنە استاناعا قايتا كەلدىك،- دەپ كۇلدى،-ءازىل عوي. ال، شىندىعىندا قازاق جۋرناليستەرىنە قارىزبىن. ەڭبەگىمدى ەڭ العاش جالپاق جۇرتقا جاريالاعان دا سولار!
…ەكەۋىنىڭ دە سودان كەيىن الدىنا بارىپ كورمەپپىم. سىرتتاي باقىلايمىن. ء“تفا، ءتفا” “دەيمىن كەيدە. ءتىل كوزدەن، تاعى بىردەڭەلەردەن امان بولسىن! ەكەۋى دە اتتان تۇسپەي كەلەدى. تۇسپەسە ەكەن!

ارمان سقابىلۇلى،

qazaquni.kz