«وتانعا ورالۋدى ماقسات تۇتقان شەتەلدەگى قانداستارىمىز ءۇشىن جاعىمدى جاڭالىق بار دەپ حابارلايدى» 24.kz.
ەندى ولار كەلگەن بەتتە بىردەن «ورالمان» مارتەبەسىن جانە ءبىر جىل ىشىندە ازاماتتىق الا الادى. ەگەر قانداستار ۇكىمەت ۇسىنعان وڭىرگە تۇراقتاۋعا كەلىسسە، بارار جولدارى مەملەكەت ەسەبىنەن تولەنىپ، ۋاقىتشا باسپانا، قوسىمشا ۇستەماقى بەرىلەدى. بۇل رەتتە دەپۋتاتتار تاعى ءبىر تىڭ ۇسىنىس جاسادى.

سەرىكباي نۇرعيساەۆ، قر پارلامەنتى ءماجىلىسىنىڭ دەپۋتاتى:
– سىرتتاعى اعايىنداردى اۋىلىمەن، ورتاسىمەن كوشىرىپ اكەلۋ كەرەك. سول ىڭعايلى. ويتكەنى ءبىر-بىرىنە جاقىن، ءتارتىپتى بولادى. قورقىنىش سەزىمى بولمايدى.

قابيبوللا جاقىپوۆ، قر پارلامەنتى ءماجىلىسىنىڭ توراعاسى:
– ارينە، قارالىپ جاتقان زاڭ جوباسى وتە كۇردەلى. كوپ دۇنيەلەر شەشىمىن تاۋىپتى. ەندى زاڭدى قازاقستان ءۇشىن، ورالماندار ءۇشىن جازۋىمىز كەرەك.
ايتا كەتەيىك، بۇگىنگە دەيىن ەلىمىزگە ورالعان 1 ملن قانداسىمىزدىڭ 22%-ى وڭتۇستىك قازاقستاندا، 15%-ى الماتى، 12%-ى ماڭعىستاۋ جانە 9%-ى جامبىل وبلىسىندا قونىس تەپكەن دەپ مالىمەت بەرەدى وسى ورايدا 24.kz

رەداكتسيادان: بۇگىن Abai.kz اقپاراتتىق پورتالىندا ءماجىلىس توراعاسى قابيبوللا قابەنۇلىن سىنعا العان ماقالامىز شىقتى. ماقالا وقىرمان تاراپىنان ويداي پىكىر تۋعىزىپ، كوپ تالقىلاندى. قايتەيىك ەندى،  وزىمىزگە قاتىستى ماسەلەگە جانىمىز اشيدى. راس، كەيدە قاتتى ايتامىز. بىراق، ءوزىمسىنىپ ايتامىز. قابيبوللا جاقىپوۆ مىرزا –  قازاقتىڭ ءبىر بالاسى. جامانشىلىعىن كورگەن ەمەسپىز، ازاماتتىق تۇلعاسىن جاماندىققا جانە قيمايمىز. ايتسە دە، ساياسي تۇلعا رەتىندە ءار سوزىنە ءمان بەرىپ وتىرامىز. ەگەر بۇل كىسى ۇلكەن ساياساتتا بولماسا، ساياساتتى ىقتاپ سويلەمەسە، «اعاش اتقا» وتىرعىزىپ نەمىز بار؟ دەمەك، ۇلكەن باسىمەن ول كىسى دە وزىنە قاراتىلعان سىندى قابىلداۋى قاجەت دەگەن ويدامىز. ال، ءبىز ەشكىمنىڭ جاۋى ەمەسپىز. مىنە، جاڭا عانا جوعارىداعى اقپاراتتى الىپ، قۋانا جاريالاپ وتىرمىز. قابەكەڭ: «ەندى زاڭدى قازاقستان ءۇشىن، ورالماندار ءۇشىن جازۋىمىز كەرەك»، - دەپتى. بارەكەلدى! وسى عوي بىزگە كەرەگى! ءماجىلىس توراعاسى باستاعان دەپۋتتار وسىلايشا ەل ءۇشىن، مەملەكەت مۇددەسى ءۇشىن تاباندىلىق تانىتىپ، ساياسي ەرىك-جىگەر بىلدىرە السا، قانداي قيىن ءتۇيىننىڭ دە كۇرمەۋى شەشىلەرى كۇمان تۋعىزباس ەدى. ال، ۇكىمەت ۇسىناتىن وڭىرلەرگە كوشىپ بارىپ، تۇراقتاۋ، قازاقستاننىڭ ىرىس قازانىن بىرگە قايناتۋ – اتاجۇرتىن اڭساپ جۇرگەن اعايىن ءۇشىن قيىن ەمەس. ونىڭ ەڭ باستى كەپىلى: كوشى-قوننىڭ جولىن توساتىن كەدەرگىلەردى كوپتەن داۋ تۋعىزىپ  كەلە جاتقان زاڭ جوباسىنان مۇلدە الىپ تاستاۋ. قۇيىلسىن كوشىڭ، قايران ەل!

داۋرەن قۋات

Abai.kz