جازۋشىلار وداعىنىڭ ساراپشىلار كەڭەسىنىڭ شەشىمىندە مۇشە بولۋدىڭ ساپاسى يسلام كاريموۆتىڭ "ادەبيەتكە دەگەن كوزقاراس — رۋحاني ءومىر مەن بولاشاققا دەگەن كوزقاراس" دەگەن جولداۋى نەگىزىندە قارالعانى ايتىلعان. وندا بۇدان بىلاي جازۋشىلار وداعىنا تەك عانا قوعامنىڭ الدىندا ءوزىن جاۋاپتى سەزىنەتىن جانكەشتى ادامدار عانا مۇشە بولا الادى دەلىنگەن.

جازۋشىلار وداعى قۇرامىنان شىعارىلعان شىعارماشىلىق تۇلعالاردىڭ ىشىندە حۋرشيد داۆرون سەكىلدى وزبەكستاننىڭ حالىق اقىنى، سالومات ۆافو سەكىلدى جازۋشى، نورتۋحتا كىلىچ، حامراكۋل اسكار جانە سۋلايمون راحمون سەكىلدى اقىندار بار. سونىمەن بىرگە تىزىمنەن شىعارىلعانداردىڭ ىشىندە مامادالي ماحمۋدوۆ (ەۆريل تۋرون) پەن مۋحامماد ساليح سەكىلدى شەتەلدە تۇراتىن ديسسيدەنت جازۋشىلار بار. مۇنان وزگە وپپوزيتسيالىق كوزقاراستارى ءۇشىن ەلدەن قۋىلعان باتىر نوربوي، يادگار ابيد جانە يۋسۋف دجۋما سەكىلدى جازۋشىلار بار.

مۇشەلىك بيلەتتەن ايىرىلعان اقىن، جازۋشىلار بيلىكتىڭ بۇل ارەكەتى وزدەرى ءۇشىن ابىروي ەكەنىن ايتادى. قازىرگى جۇيەنىڭ قارۋى بولعانشا، بيلەتسىز جۇرگەن الدەقايدا دۇرىس دەيدى.

— شىعارماشىلىق ورتالىقتى شىنايى اقىندار مەن جازۋشىلار عانا جاسايدى. ءبىزدىڭ ۋاقىتتا شىعارماشىلىق ءومىر قايناپ جاتتى. قازىر ءولى تىنىشتىق. شىندىقتى ايتاتىن جازۋشىلارعا ءار زاماندا قيىن بولعان. سول سەبەپتەن مەنى جازۋشىلار وداعىنان شىعارىپ تاستاعانى ءۇشىن تەك عانا ريزا ەكەنىمدى جەتكىزەمىن، - دەپ تۇسىنىكتەمە بەردى جازۋشى مامادالي ماحمۋدوۆ.

اباي-اقپارات