بىرنەشە كۇن بۇرىن سيريالىق كۇرد جاساقتارىنىڭ قولىنا وتكەن ميننەح اۋە بازاسى مەن ونىڭ جانىنداعى اۋىل ارتيللەريا شابۋىلدارىنىڭ نىساناسىنا اينالدى. سوعىس قيمىلدارىنىڭ باستالعانى تۋرالى سيريادان تىس اۋماقتا ورنالاسقان ادام قۇقىعىنىڭ ساقتالۋىن قاداعالاۋ جونىندەگى سيريالىق ورتالىقتاعى دەرەك كوزدەرى راستادى. ودان بولەك، ارتيللەريالىق شابۋىلدىڭ بولعانىن تۇركيا پرەمەر-ءمينيسترى احمەت داۋىتوعلى دا قۋاتتادى.

اتىس بولار الدىندا داۋىتوعلى ءوز ەلىنىڭ سيريانىڭ سولتۇستىك بولىگىندەگى كەي اۋدانداردى باقىلاۋدا ۇستاپ وتىرعان سيريالىق كۇردتەرگە قارسى اسكەري وپەراتسيا باستاۋعا دايىن ەكەندەرى تۋرالى مالىمدەگەن ەدى. پرەمەر قۇرلىق وپەراتسياسى تۋرالى ايتپاعانىمەن، كۇرد اسكەري جاساقتارى شوعىرلانعان جەرلەردى بومبالاۋلارى مۇمكىن ەكەنىن جوققا شىعارماعان بولاتىن.

سونىمەن بىرگە، ساۋد ارابياسىنىڭ اسكەري ۇشاقتارىن اقش اۋە كۇشتەرىنىڭ تۇركياداعى "يندجيرليك" اۋە بازاسىنا اپارىپ جاتقانى تۋرالى حابار تارادى. بۇل تۋرالى تۇركيا سىرتقى ىستەر ءمينيسترى مەۆليۋت چاۆۋشوعلى ميۋنحەندەگى كونفەرەنتسيادان قايتىپ كەلە جاتقان بەتىندە مالىمدەگەن. مينيستر تۇركيا مەن ساۋد ارابياسىنىڭ كوپتەگەن ەلدە قىزمەتىنە تىيىم سالىنعان "يسلام مەملەكەتى جيحادشى توبىنا قارسى قۇرلىق وپەراتسياسىن باستاۋلارى مۇمكىن ەكەنىن" ايتتى.