ۇيىم قازاقستاندى بۇرىنعىداي "ەكونوميكالىق ەركىندىگى ورتاشا" ەل دەپ اتايدى. قازاقستان ازيا جانە تىنىق مۇحيتى ايماعى ەلدەرى اراسىنان ەكونوميكالىق ەركىندىگى جاعىنان 12-ورىندا تۇر. بيىلعى كورسەتكىش وتكەن جىلعىدان 0,3 بالعا جوعارى.

ەكونوميكالىق ەركىندىك يندەكسى بيزنەس جاساۋ، ەڭبەك ەتۋ، قارجى-نەسيە، مۇلىك قۇقىعىنىڭ قورعالۋى، كوررۋپتسيا دەڭگەيى، بيۋروكراتيالىق اپپارات كەدەرگىسى، ساۋدا جانە ينۆەستيتسيا ەركىندىكتەرىنىڭ كورسەتكىشى بويىنشا انىقتالادى.

"ورتالىق ازياداعى ەكونوميكاسى ەڭ ءىرى قازاقستاندا ەكونوميكانى ءار تاراپتاندىرۋ مەن كومىرسۋتەگى شيكىزاتىنا تاۋەلدىلىكتى ازايتۋ ۇلكەن ماسەلە بولىپ قالىپ وتىر. كوررۋپتسيا باسقارۋ ورىندارىنىڭ بارلىق دەڭگەيىندە كەڭ تارالعان. سوت جۇيەسى كونستيتۋتسيا بويىنشا اتقارۋشى بيلىككە باعىنىشتى. 2014 جىلى قابىلدانعان زاڭنامالار مۇلىكتى تىركەۋدى وڭايلاتقانىمەن، مۇلىك قۇقىعى ءتيىمدى تۇردە قورعالىپ وتىرعان جوق. ەڭبەك زاڭنامالارى سالىستىرمالى تۇردە العاندا جۇمساق بولعانىمەن، ورىندالۋى ناشار" دەيدى ۇيىم ساراپشىلارى.

بۇرىنعى سوۆەت رەسپۋبليكالارى اراسىندا قازاقستان ەكونوميكالىق ەركىندىگى جاعىنان ەستونيا (9-ورىن), ليتۆا (13), گرۋزيا (23), لاتۆيا (36), ارمەنيادان (54) كەيىن تۇر.

اباي-اقپارات