بۇعان دەيىن، جاقىندا «الاۋىزدىق تۋعىزدى» دەگەن ايىپپەن ەكى جىلعا سوتتالعان سەرىكجان مامبەتاليننىڭ Facebook الەۋمەتتىك جەلىسىندەگى پاراقشاسىندا جۇما كۇنى بەلسەندىنىڭ «ايىبىن مويىنداعانى» جانە «ىسىنە وكىنەتىنى» تۋرالى مالىمدەمەسى شىقتى.

بيىلعى جىلدىڭ قاڭتارىنداعى سوت بارىسىندا ايىپتاۋلارمەن كەلىسپەگەن سەرىكجان مامبەتالين ەندى كوزقاراسىن قايتا قاراعانىن ايتىپ وتىر جانە قوعامنان ءوزىنىڭ جازاسىن جەڭىلدەتىپ، تۇرمەدەن شىعۋىنا كومەكتەسۋىن سۇرايدى.

مامبەتاليننىڭ قولى قويىلعان مالىمدەمەدە: «مەن قاتەلىكتەرىمدى تولىق مويىندايمىن جانە ادامي تۇسىنىستىك پەن اياۋشىلىقتىڭ عانا ماعان كەشىرىم الۋىما كومەكتەسە الاتىنىن تۇسىنەمىن. مەن وزىمە اششى ءارى جاعىمسىز ساباق الدىم. جانە ول وزگەلەرگە دە ۇلگى بولادى»، —دەلىنگەن.

سەرىكجان مامبەتالينمەن بىرگە بۇل ءىس بويىنشا ءۇش جىلعا سوتتالعان ازاماتتىق بەلسەندى ەرمەك نارىمباەۆ تا وتىر. ەكى بەلسەندىگە Facebook الەۋمەتتىك جەلىسىندە «قازاق حالقىنىڭ نامىسىن قورلايتىن» «ۆەتەر س ۋليتسى» كىتابىنان ءۇزىندى جاريالاعانى ءۇشىن ايىپ تاعىلدى. ءوز كەزەگىندە ولار بۇل ۇزىندىلەردى ينتەرنەتتەن كوشىرىپ باسقاندارىن ايتادى. «ۆەتەر س ۋليتسى» كىتابىنىڭ اۆتورى مۇرات تەلىبەكوۆ جارىق كورگەن شىعارماسىندا ونداي ءماتىننىڭ جوقتىعىن مالىمدەدى.

مامبەتالين ءوزىنىڭ مالىمدەمەسىندە ءارى قاراي: «ماسەلەم وڭ شەشىلگەن جاعدايدا، مەن بارلىق جاۋاپكەرشىلىكتى تەرەڭ سەزىنە وتىرىپ، وتباسىما، بالالارىم مەن اتا-اناما قاراۋ ءۇشىن قوعامدىق-ساياسي ىستەردەن باس تارتاتىنىمدى جانە كەتەتىنىمدى مالىمدەيمىن»، — دەلىنەدى.