الەۋمەتتىك جەلىدەگى جازباسى ءۇشىن، قر قىلمىستىق كودەكسىن ورەسكەل بۇزىپ، «الاۋىزدىق تۋدىردى» دەگەن ايىپپەن ەكى جىلعا باس بوستاندىعىنان ايىرىلعان ازاماتتىق بەلسەندى سەرىكجان مامبەتالين ءوز كىناسىن مويىنداپ، كەشىرىم سۇرادى.

مامبەتاليننىڭ مالىمدەمەسى الەۋمەتتىك جەلى قولدانۋشىلارى اراسىندا قىزۋ پىكىر-تالاس تۋدىرعانى دا جاسىرىن ەمەس.  سەرىكجان مامبەتالين كەشە Facebook جەلىسىندەگى جەكە پاراقشاسىندا جۇرتشىلىققا ارناعان ۇندەۋىن جاريالادى. وندا اتى شۋلى سوتتالۋشى كىناسىن مويىنداپ، كەشىرىم سۇراپ، وزىنە كەسىلگەن جازانى جۇمسارتۋدى ءوتىنىپتى. سوعان قاراعاندا، جۋىردا اپەللياتسيالىق سوت وتىرىسىندا ونىڭ ارىزى قارالىپ، 2 جىلدىق تۇرمە جازاسى شارتتى جازاعا اۋىستىرىلۋى مۇمكىن دەگەن بولجامدار ايتىلۋدا.  مۇنداي جاعدايدا ول قاماۋدان بوساتىلادى.

تومەندە س.مامبەتاليننىڭ ۇندەۋىنىڭ اۋدارماسىن بەرىپ وتىرمىز.

قۇرمەتتى دوستارىم جانە مەنىڭ جاقتاستارىم، تاعدىرىما الاڭداۋشىلار! 

وزدەرىڭىزگە ءمالىم وسىدان ءبىراز ۋاقىت بۇرىن ماعان ۇلتارالىق تاتۋلىققا سىزات ءتۇسىردى دەگەن ايىپ تاعىلىپ، ەكى جىلعا باس بوستاندىعىمنان ايىرىلعان بولاتىنمىن. اباقتىدا وتىرىپ، بولعان جايدى جان جاقتى وي ەلەگىنەن وتكىزۋگە ۋاقىت تاپتىم. 

ويلانا كەلە بۇل جاعدايعا ءوزىمنىڭ كىنالى ەكەنىمدى ءتۇسىندىم. تەرگەۋ بارىسىندا مەنىڭ كىنامدى ايعاقتايتىن، بۇلتارتپايتىن دالەلدەر بۇگە-شۇگەسىنە دەيىن ءتىزىلدى. سول سەبەپتەن دە ءوز كىنامدى مويىنداۋعا ءماجبۇر بولىپ وتىرمىن. 

مەن الەۋمەتتىك جەلىدەگى پاراقشامدا قازاق حالقىنىڭ ار-نامىسىنا نۇقسان كەلتىرەتىن كوزقاراستاعى كىتابىمدى جارىققا شىعارعان بولاتىنمىن. شىندىعىندا مەن وسى ارەكەتىمدى جۇزەگە اسىرىپ جاتقانىمدا ايىپتالاتىنىمدى بىلگەنىم جوق. وتە قاتتى قاتەلەسكەنىمدى كەيىننەن بارىپ تۇسىنگەنىمدە دە مۇنى قاستىق ويلاعان قىلمىس رەتىندە سەزىنە الماعانىم راس. مەنىڭ شەتەلدە ۇزاق ۋاقىت بيزنەسپەن اينالىسقانىمدى كوپشىلىك بىلەدى. سول كەزدە ەلىمىزدەگى قوعامدىق-ساياسي وقيعالارعا بەلسەنە ارالاسىپ، ءومىردى جاقسارتۋعا تىرىسپاق نيەتتە بولدىم. 

سوڭعى ۋاقىتتاردا مەنىڭ وتباسىلىق ومىرىمدە دە وڭ وزگەرىستەر بولدى. قىركۇيەك ايىندا ۇلىم الماتىدا دۇنيەگە كەلدى. مەن بالامنىڭ تولىقتاي قازاقستاننىڭ ازاماتى بولىپ وسكەنىن قالايمىن. 

مەنىڭ اكە-شەشەم بۇگىندە قارت ادامدار. ولار ءوز عۇمىرىندا وتانىنا دەگەن قۇرمەتىن ەش ۋاقىتتا جوعالتققان ەمەس. 

انام ەلىمىزگە ەڭبەگى سىڭگەن اكۋشەر-گينەكولوگ. ۇلتتىق مەديتسينالىق اكادەميادا ءدارىس بەرىپ، كوپتەگەن بىلىكتى مامانداردى تاربيەلەپ شىعاردى. 

اكەم دە مەديتسينا سالاسىندا ءوزىن بىلىكتى عالىم رەتىندە كورسەتە بىلگەن ادام. مەديتسينا عىلىمىنىڭ دوكتورى، كوپتەگەن ازاماتتاردىڭ دەنساۋلىعىنا اراشاشى بولىپ، ساۋىعىپ كەتۋىنە سۇبەلى ۇلەسىن قوستى. 

تەرگەۋدە جانە سوت پروتسەسى كەزىندە ءوزىمنىڭ وتباسىما، اتا-اناما، ۇل-قىزىما كەرەك ەكەنىمدى ءتۇسىندىم. قارت اتا-انام مەنىڭ بوستاندىققا شىعۋىمنان كۇدەر ءۇزدى. ۇلىمنىڭ مەنسىز تاربيەلەنىپ جاتقانىنا دا جانىم كۇيزەلەدى. 

مەن ءوز ايىبىمدى تولىعىمەن مويىنداپ جانە سول ءۇشىن دە وكىنەمىن. بۇل ماعان اۋىر ساباق بولدى. 

ەندى مەنىڭ بۇل قاتەلىگىمدى كەشىرىپ، ايتقان ويىما ادامگەرشىلىك تۇسىنىستىكپەن قاراپ، ماعان شىعارىلعان ۇكىمدى جەڭىلدەتۋىڭىزدى سۇرايمىن. اتا-اناما، وتباسىما، بالالارىما ورالۋ ءۇشىن ەندىگىدە قوعامدىق-ساياسي وقيعالارعا ارالاسپايتىنىمدى جۇرتشىلىق الدىندا مالىمدەيمىن. جانە قازىرگى كۇندە دە سوت قوعامدىق بەلسەندىلىك تانىتاتىن ىستەرمەن اينالىسۋىما تىيىم سالعان جايى بار. 

مەنى ورىنسىز قارالاپ، بۇل ماسەلەنى ساۋداعا سالماۋلارىڭىزدى سۇرايمىن. مەنىڭ جانە وتباسىمنىڭ باسىنا تۇسكەن وسى قيىندىققا تۇسىنىستىكپەن قاراۋلارىڭىزعا شاقىرامىن.

سىزدەرگە دەگەن قۇرمەتپەن، سەرىكجان مامبەتالين. 

 Abai.kz