نەمەسە بىلمەيمىز، "اقتوبە" مە، "اقتوبىل" ما؟

ءبىزدىڭ قوستانايدىڭ جۇگىرمەكتەرى بۇگىندەرى ءبىر كەزدەرى مۇقىم جۇرتقا بەلگىلى بولعان وسىناۋ كۇلدىرگى ءاننىڭ ماقامىنا سالىپ قۇيقىلجىتا  اندەتىپ ءجۇر. بۇعان ءسىرا تاڭ قالۋعا دا بولماس. ويتكەنى ءدال قازىرگى تاڭدا كورشىمىز اقتوبە قالاسىنداعى وسى اتتاس فۋتبول كلۋبىنىڭ ايدىك دەيتىن ءتورت بىردەي سپورتشىسى ءبىزدىڭ «توبىل» كلۋبىنا ءبىرجولاتا قونىس اۋدىپتى. مۇنى وسىنداعى بيۋدجەتتەن مول قارجى الىپ، قاعاناعى قارق، ساعاناعى سارق بولىپ وتىرعان ءباسپاسوز جەردەن جەتى قويان تاپقانداي الاقايلاپ جازىپ جاتىر.

بۇرىن ويىنىنا ادام تۇسىنبەيتىن، بىردە ۇتسا، بىردە ۇتىلىپ، كوش سوڭىندا ارەڭ ءىلبىپ جۇرگەن «توبىلعا» «اقتوبەدەن» اۋىسىپ كەلگەن دميتري ميروشنيچەنكو، ۆيكتور دميتريەنكو، چيپريان دياك پەن ارتۋراس جۋلپا دەگەندەردىڭ اتىن اتاپ، ءتۇسىن تۇستەپ ءماز-مايرام بولۋدا. جاقسى ويىندى ەمەس، مول اقشانى عانا ويلايتىن، كىمنىڭ تارىسى پىسسە، سونىڭ تاۋىعى بولا سالاتىن بۇل لەگيونەرلەردىڭ  «توبىلدىڭ» كوسەگەسىن كوگەرتە قويادى دەۋدىڭ ءوزى قيىن. «قىردا قىس جايلى بولسا، ارحار اۋىپ نەسى بار» دەگەندەي، ولاردىڭ «اقتوبەدەگى» جىلى ورنىن اۋىستىراتىنداي نە باسىنا كۇن تۋدى دەيسىڭ. مۇنىڭ دا ەرەكشە قۇپياسى جوق.

اقتوبە وبلىسىنىڭ اكىمى بۇل لەگيونەرلەردىڭ ايىنا 60 مىڭنان 70 مىڭ ەۆروعا دەيىن جالاقى الاتىندىعىن ايتىپ، ول كوماندانىڭ بيۋدجەتىن 1 ميلليارد تەڭگەگە قىسقارتقاننان سوڭ كۇيى كەتە باستاعان سىڭايلى. بۇرىن ۇتسا دا، ۇتىلسا دا قىلشىعى قيسايمايتىن، وسىنشاما مول اقشانى ءتىپتى جان قيناماي الا بەرەتىن كەلىمسەكتەر وزدەرىنە تىقىر تايانعاندىعىن سەزگەن ارينە. سوسىن، ءسوز جوق، ساپارباەۆ سەكىلدى ساراڭدىق جاسامايتىن، قولى اشىق، جومارت وڭىرلەرگە كوز سالماي ما؟ نازارلارى ءبىزدىڭ ولكەمىزگە تۇسكەن ءتۇرى بار. بۇلاي دەۋىمىزگە سەبەپ تە جوق ەمەس. وسىنداعى «ناشا گازەتا» باسىلىمىنىڭ جۋرناليستەرى وبلىس اكىمى ارحيمەد مۇقانبەتوۆكە ءۇشبۋ حات جولداپ، «توبىل» كومانداسىنىڭ قارجىلىق جاعدايىن سۇراعان ساۋالىنا ناقتى جاۋاپ الا المادى. «توبىلعا» بيۋدجەتتەن قانشا قارجى بولەنەتىندىگىن، ونىڭ فۋتبولشىلارىنىڭ جالاقىسىنىڭ قانشالىقتى دەڭگەيدە ەكەندىگىن اقىرى بىلە الماي-اق قويدى. بۇل دەرەكتەر ءالى كۇنگە دەيىن قۇپيا كۇيىندە قالىپ وتىر. تاعى ءبىر قىزىعى، بۇل ساۋالدارعا ايقىن جاۋاپ بەرۋدىڭ ورنىنا سول «توبىل» كومانداسىنىڭ ءباسپسوز حاتشىسى دولجانسكي دەگەن مىقتىڭ ورىستاردىڭ «سام دۋراك!» دەگەن قاعيداسىمەن الگى جۋرناليستەرگە «سەندەردىڭ ايلىقتارىڭ قانشا؟» دەپ وزدەرىنە تاپ بەرىپتى. ءسىرا، بۇل بۇرىنعى جۋرناليست بيۋدجەتتەن قارجىلاندىراتىن مەكەمە مەن جەكە مەنشىك گازەتتىڭ ايىرماشىلىعىن تۇسىنە الماي جۇرسە كەرەك. وسىدان كەيىن ءبىزدىڭ شەنەۋنىكتەردىڭ دەڭگەيىنىڭ قانشالىقتى ەكەندىگىن باعامداي بەرىڭىزدەر.

ءبىزدىڭ وبلىستىڭ اكىمى ارحيمەد مۇقانبەتوۆتەن جۋرناليستەر بىردە ول كىسىنىڭ ءحوببيى تۋرالى سۇراعاندا ءوڭىر باسشىسى «فۋتبول مەن شاحماتتى جاقسى كورەمىن» دەپ جاۋاپ قايتارعان ەدى. سوعان قاراعاندا اقتوبەدەن اۋىپ كەلگەن لەگيونەرلەردىڭ جاعدايى جامان بولمايتىن سەكىلدى. ەگەر ولار كەلىپ، كەرەمەت ويىن كورسەتىپ، وبلىسىمىزدىڭ اتىن شىعارىپ جاتسا، ءبىر جەلپىنىپ قالار ەدىك. تەك ءبىزدى سول شەكەلەرى شىلقىپ جۇرگەن، ءبىر جالاقىسىنا ءبىر ءۇي ساتىپ الۋعا جارايتىن مول قارجى وزدەرىمىزدىڭ قارادومالاقتارعا بۇيىرماي جۇرگەندىگى جانعا باتادى. ارحيمەد بەگەجانۇلى تەك كەلىمسەكتەرگە عانا ەمەس، ءوز ىشىمىزدەن شىعاتىن بولاشاق اياق دوپ شەبەرلەرىن تاربيەلەۋگە دە كوڭىل بولەر دەگەن ۇمىتتەمىز.

ال، ازىرشە ءبىزدىڭ ازىلكەشتەر «بىلمەيمىز، «اقتوبە مە؟» مە، «اقتوبىل ما؟، ويىن ەمەس، بۇل ءوزى قاقپاقىل ما؟»» دەپ اندەۋدەن جالىعار ەمەس.

مۇراتبەك داۋرەنۇلى، 

قوستاناي

Abai.kz