ءمۇفتي: "نارەستەنى تىرىدەي لاقتىرىپ جىبەرگەنىن ەستىگەندە مازاسىز كۇي كەشتىم"
قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ەرجان قاجى مالعاجىۇلى قوعامنىڭ تالقىلاۋىنا تۇسكەن مەكتەپ وقۋشىلارىنىڭ ەرتە جۇكتىلىككە تاپ بولۋى، جاڭا تۋىلعان ءسابيدى تىرىدەي دالاعا تاستاۋ تۋرالى وقيعالارعا وراي پىكىر ءبىلدىردى دەپ حابرلايدى قمدب ءباسپاسوز قىزمەتى.
«اكە اكەلىك مىندەتىن اتقارىپ، بالاعا رۋحاني تاربيە بەرمەسە، انا انالىق پارىزىن ورىنداپ، مەيىرىمىن توكپەسە، بالا اتا-انانىڭ قامقورلىعىن سەزىنبەسە، ۇلكەندەرگە قۇرمەت كورسەتىپ، باتاسىن الۋدى ۇيرەنبەسە، وندا سول وتباسىنىڭ ويرانى شىقپايدى دەپ كىم ايتا الادى؟ كەيبىر قارىنداستارىمىز بولماشى تۇرمىستىق سىناققا سابىر ەتە الماي، باۋىر ەتى بالاسىن تىرىدەي دالاعا تاستاپ، بولمىسىمىزعا جات مىنەز تانىتىپ جاتقانى جانىمىزعا باتادى»، – دەيدى قمدب توراعاسى.
باس ءمۇفتيدىڭ ايتۋىنشا، قىزدارىمىزدىڭ 11 سىنىپتى بىتىرمەي جاتىپ، ەرتە جۇكتىلىككە تاپ بولاتىن جاعداي قازىرگى قوعامدا ۇلكەن ماسەلەگە اينالدى دەۋگە بولادى.
«جاستارىمىز اسىعىس شەشىم قابىلداۋعا بەيىل تۇرادى. نەگە؟ مۇنىڭ سەبەپ-سالدارىن ايتقاندا، قايتادان سول تاربيەنى، يماندىلىقتى، ىزگىلىك پەن سەنىمدى تاعى ءسوز ەتەمىز. شىعىس دانالىعىندا: «بوس اربانىڭ سىلدىرى كوپ»، – دەگەن ءسوز بار. تامىرى تەرەڭ تارتپاعان تالدىڭ دا جەل شايقاسا قۇلاۋعا شاق قالاتىنى سەكىلدى، تۇلا بويى يمانعا تولماعان ادامنىڭ عۇمىرى بايانسىز بولادى. قالاداعى كەيبىر اتا-انالارىمىز ۋاقىتىنىڭ كوپ بولىگىن جۇمىستا وتكىزەدى. بىلايشا ايتقاندا، ءوز ءۇيىمىزدىڭ «كۆارتيرانتىنا» اينالدىق. ارينە، اقشا كىمگە قاجەت ەمەس. بارىنە كەرەك. الايدا ۇيدەگى بالانىڭ تاربيەسى ودان دا ماڭىزدى ەكەنىن ابدەن ەسكەرۋىمىز ءتيىس»، – دەگەن كەڭەسىن جەتكىزدى.
«وتكەن جولى اقپارات قۇرالدارىنان ءسابيىن كولىكتە بوسانىپ، دالاعا تىرىدەي لاقتىرىپ جىبەرگەن قارىنداسىمىز تۋرالى قايعىلى حاباردى مەن دە ەستىدىم. دەنەم تىتىركەنىپ، ۇزاق مازاسىز كۇي كەشتىم. ارينە، وكىنىشتى جاعداي. قىزدى قىرىق ۇيدەن تىيا بىلگەن حالىقپىز عوي. باياعىدا بويجەتكەن قىزدار وتباسىن قۇرۋ تۋرالى اناسىمەن، جەڭگەسىمەن سىرلاساتىن. قازىر بۇل ءۇردىس ازايىپ بارادى. وكىنىشكە قاراي، ۇل-قىزدارىمىزدىڭ تاربيەسى ەكىنشى ورىندا قالىپ قويدى. بالاسىن تىرىدەي ولىمگە قيعان سول قارىنداسىمىزعا قاراجات، كيىم، باسپانا، تاعى باسقا نارسە جەتپەي جاتىر دەپ ايتا الماس ەدىك. جاستارىمىزعا جەتپەي جاتقانى – رۋحاني ازىق، يمان، تاربيە. ويتكەنى، يسلام – ەكى دۇنيە باقىتىنىڭ كىلتى»، – دەيدى ەرجان قاجى مالعاجىۇلى.
Abai.kz
