مەملەكەت باسشىسى پارلامەنت ءماجىلىسىنىڭ توراعاسى قابيبوللا جاقىپوۆپەن جانە پرەمەر-مينيستر كارىم ماسىموۆپەن كونسۋلتاتسيا وتكىزدى. كەزدەسۋگە سونداي-اق پرەزيدەنت اكىمشىلىگىنىڭ باسشىسى ن.نىعماتۋلين قاتىستى دەپ حابارلايدى aqorda.kz سايتى.

ەلباسى ءماجىلىس دەپۋتاتتارىنىڭ كەزەكتەن تىس پارلامەنت سايلاۋىن وتكىزۋ تۋرالى باستاماسى ءتۇرلى پىكىرتالاس الاڭدارىندا، ساراپشىلار اراسىندا جانە بۇقارالىق اقپارات قۇرالدارىندا كەڭىنەن تالقىلانىپ جاتقانىن ايتتى.

نۇرسۇلتان نازارباەۆ قوعامدىق پىكىردى انىقتاۋعا ارنالعان ساۋالناما دا بۇل ۇسىنىستىڭ كەڭىنەن قولداۋ تاپقانىن كورسەتىپ وتىرعانىنا نازار اۋداردى.

ق.جاقىپوۆ پارتيالاردىڭ سايلاۋشىلاردان جاڭا سەنىم مانداتىن الۋ، كەڭ قوعامدىق ۇيىسۋ، سونداي-اق جۇرگىزىلەتىن رەفورمالاردى بارلىق دەڭگەيدە جۇزەگە اسىرۋ ءۇشىن ءماجىلىس پەن ءماسليحاتتار ءىس-قيمىلىن سايكەستەندىرۋ قاجەتتىگى مۇنداي شەشىمنىڭ قابىلدانۋىنا باستى سەبەپ بولعانىن اتاپ ءوتتى.

ۇكىمەت باسشىسىمەن، ءماجىلىس توراعاسىمەن،پرەزيدەنت اكىمشىلىگىنىڭ باسشىسىمەن كەڭەسىپ العان پرەزيدەنت نازارباەۆ كونستيتۋتسيالىق كەڭەس توراعاسى يگور روگوۆپەن اقىلداستى.

كەزدەسۋ بارىسىندا كەزەكتەن تىس پارلامەنت سايلاۋىن وتكىزۋ ماسەلەسى تالقىلاندى.

مەملەكەت باسشىسى ءماجىلىس دەپۋتاتتارىنىڭ ۇندەۋىن العانىن، وندا اتالعان باستاماعا رەفورمالاردى جانە مەملەكەت بەلگىلەگەن داعدارىسقا قارسى شارالاردى ءتيىمدى جۇزەگە اسىرۋ قاجەتتىگى نەگىز بولعانىن اتاپ ءوتتى.

سونىمەن قاتار قازاقستان پرەزيدەنتى پارلامەنتتىڭ قوس پالاتاسىنىڭ توراعالارىمەن جانە پرەمەر-مينيسترمەن كونسۋلتاتسيا وتكىزگەنىن ايتتى.

ي.روگوۆ كونستيتۋتسيانىڭ 63-بابىنىڭ 1-تارماعىنا سايكەس، پارلامەنتتى نەمەسە پارلامەنت ءماجىلىسىن قازاقستان پرەزيدەنتى پارلامەنت پالاتالارىنىڭ توراعالارىمەن جانە پرەمەر-مينيسترمەن كونسۋلتاتسيادان كەيىن تاراتا الاتىنىن ايتتى. سونىمەن بىرگە، كونستيتۋتسيالىق كەڭەس توراعاسى كەزەكتەن تىس سايلاۋ پارلامەنت نەمەسە پارلامەنت ءماجىلىسى وكىلەتتىگىن مەرزىمىنەن بۇرىن دوعارعان كۇننەن كەيىن ەكى اي ىشىندە وتكىزىلەتىنىنە نازار اۋداردى.

ي.روگوۆ ماجىلىسكە كەزەكتەن تىس سايلاۋدى الداعى بارلىق دەڭگەيدەگى ءماسليحات سايلاۋىمەن ءبىر مەزگىلدە وتكىزۋ كونستيتۋتسيا نورمالارىنا تولىق ساي كەلەتىنىن اتاپ ءوتتى.

اباي-اقپارات