ءمارماردى قاشاپ، سابيگە،

جىلايدى زەرگەر،

قاي جەردەن، قالاي وت باستى؟
مۇڭىن دا شاعىپ ايتا الماي كەتتى-اۋ، فانيگە،
جاساماشى اعا، كوك تاستى.

اجالىن كۇتكەن ساقالىن ارلەپ بوياۋمەن،
ادامدار قانداي جەتەسىز!
تۋىلا سالا قۇلپىتاس جاساپ قويار ما ەڭ،
ولمەيتىندەر شە،
ولمەيتىندەردى نە ەتەسىز؟

تىلەگىن جولداپ تامۇقتاعى ەلدەن،
جۇرەگىن جۇلىپ حالىققا بەرگەن.
سىيمايتىن رۋحى تابىتقا مۇلدەم،
قىرانداي كوكتە قالىقتاپ ولگەن،
قابىلانداردى قايتەسىز؟!

كۇشىگەن ويلار، ىسىگەن كەۋدە،
ىلەسىپ اردىڭ تۇسىنە ەرگەنگە.
شەشەسىن تىلدەر شوق باسسا،
اينالسىن سولار كوك تاسقا!

سۇقتانا قاراپ الا كوزدەرى،
مىنا شال ەسكە سالادى وزگەنى.
اقىنعا مۇنىڭ كەرەگى قانشا،
قالاممەن قاشاپ الادى وزدەرى…

انامنىڭ ءۇنسىز جىلاپ تۇرعانى...

داۋىلدى داۋىل باسىپ كورگەن بە،

جولبارىستانىپ جاسىقتار جەردە.

شاشىنان سىرعىپ اق ورامالى،

كورشى ايەل ۇيگە قاشىپ كەلگەندە،

كۇرسىنىپ، انام جىلادى،

جىندى سۋ،  –  دەدى – كىنالى.

سەبەپ تە تاپپاي كىسىڭدى اقتاۋعا،

سابيدەي قولى ءۇسىپ جاتقاندا.

الپامسا جىگىت اقىرىپ ءتونىپ،

اكەسىن ساباپ ءتىسىن قاققاندا.

جابىعىپ، انام جىلادى،

جىندى سۋ، –  دەدى  – كىنالى.

جاماۋسىز كوڭىل قازاقتا بار ما،

پاناسىز قايتسىن كوزى اقپاعاندا؟

بەيكۇنا جاندى تاعدىردىڭ ءوزى،

جەتىمەك قىز دەپ مازاقتاعاندا.

قوسىلىپ، انام جىلادى،

سول، – دەدى  – تاعى كىنالى.

ءومىردىڭ ءمانى، مۇراتتىڭ ءمانى،

كەۋدەمە تولىپ سۇراقتىڭ ءبارى.

ىشىمدىك كورسەم، تۇسەدى ەسكە،

انامنىڭ ءۇنسىز جىلاپ تۇرعانى. 

***

جەر دەيتىن پلانەتا،

الەمنىڭ بۇرىشىندا،

ءبىر قىز بار...
ەسىمى تۇر ءتىل ۇشىمدا:
ءانشى دە، ءبيشى دە ەمەس،
باققانى ونەر دە ەمەس،
ءبىر عانا بەرەر كەڭەس:

قاباعىندا تولقىندى جاسىن ويناپ،
ول كۇلسە  –  تۇرلەنەدى جاسىل ايماق.
جىلاسا  –  كۇڭىرەنتەر قانشا اۋەندى،
جۇبانسا  – جۇرەك باستى بارشا بەلدى!

اققۋداي تامسانۋعا جاراتىلعان،
ارۋلار اقىندارعا بولا تۋعان!
ءبىر قىز بار،
ۇمىتىمنەن تاڭ اتىرعان،
الەمنەن دارا تۇرعان!

سول جاننىڭ ماڭگى الاۋداي جانسا باعى،
جۇرەگى جۇرەك ەمەس، ءان ساباعى!
عاجايىپ جۇمباعىنا جاراتقاننىڭ،
شىركىن-اي، ادام قالاي قول سالادى؟

ءومىرىم وكتەم كۇنىن تاپتى سودان،
كوڭىلىم كوكتەم كۇنىن تاپتى سودان.
سەنىمىم شەرتكەن سىرىن تاپتى سودان،
سول جۇمباق جان ۇقسايدى قاتتى ساعان!

 كىم كىنالى؟

كوزىندە تارتىلىس بار، قۇشتار عالام،
اق مونشاعىن تەڭەۋگە ءتۇس قالماعان.
اق ساۋساعى ورىنسىز ۇستالماعان،
بۇل جايلى ەشكىمگە دە ءتىس جارماعان،
ءبىر قىز بار-تىن اۋىلدا،
مەن بىلەتىن..
ەسىمىنە ەلەڭدەپ ەل جۇرەتىن،
ەسىگىنە كوپ جىگىت تەلمىرەتىن،
ەسسىزدەرى تاكاپپار، پاڭ كورەتىن،
ەس بىلگەنى ەرەكشە ءمان بەرەتىن.

ال ءبىر كۇنى،
جاڭا وتاۋ جارىق شاشتى،
سەلتەڭ جىگىت،
شورت مىنەز،
شارىق باستى.
ەرتەڭگىلىك ەركەمە ەس بىلدىرمەي،
كوركەم قىلىپ كولىكپەن،
الىپ قاشتى!

قايران ارۋ!
قان تۋلاپ كەتتى بەتىن،
ماحابباتتى ء"سۇيىسۋ" دەپ بىلەتىن.
پاك سەزىم جايلاۋىنان شەت جۇرەتىن،
جات كوزگە جار تىزگىنىن ۇسىنباق پا؟
ارتىڭ  –  جار،
جولعا باستار تۇسىڭ  –  قاقپا.
قۇستاي اققان كولىكتەن، ءوزىن-ءوزى،
لاقتىرىپ كەپ..
قاناتىن ءتۇسىردى وتقا.

تاڭ اتا زار جىلاتىپ ءتامام ەلدى.
ءبىر جولاۋشى حابارىن الا كەلدى.
ءسان قۇرىپ ۇلگەرمەگەن سارعالداق قىز،
ماڭگىلىك زاعيپ بولىپ قالا بەردى.

ء"وزىن-ءوزى قورلاي ما، ءوستىپ ادام؟" -
دەگەن قارتتى كوزگە ىلمەي كوشتى زامان.
ودان سوڭ اڭعارمادى جات جۇرەگىن،
ودان سوڭ تاڭدانبادى ەشكىم وعان.

ەسىمىنە ەلەڭدەپ ەل جۇرەتىن،
ەسىگىنە كوپ جىگىت تەلمىرەتىن.
جۇرەگى جالعىزدىققا بولا تۋعان،
ءبىر قىز بار-تىن اۋىلدا..
مەن بىلەتىن.

***

ءبىر كۇندەر بولادى،
كۇلكى بىلمەيتىن.
ءبىر تۇندەر بولادى،
كىرپىك ىلمەيتىن.

ءبىر سەزىم بولادى،
سىر اقتاراتىن.
ءبىر ءازىل بولادى،
جىلاپ قالاتىن.

ءبىر باۋىر بولادى،
سەرىك بولمايتىن.
ءبىر اۋىل بولادى،
كولىك بارمايتىن.

ءبىر سىرىڭ بولادى،
بولىسكە - جەتىم.
ءبىر شىلىم بولادى،
تەرىس شەگەتىن.

ءبىر ۋايىم بولادى،
تاس تا جىلايتىن.
ءبىر قايىڭ بولادى،
باسقا قۇلايتىن.

ءبىر باقىت بولادى،
تۇكىرگەن كوبى.
ءبىر ۋاقىت بولادى،
كۇتىڭدەر مەنى!

Abai.kz