دۇيسەنبى, 30 ناۋرىز 2020
قۇيىلسىن كوشىڭ 7211 0 پىكىر 6 قاڭتار, 2016 ساعات 09:33

"سوتتىلىق" تۋرالى انىقتامانى الىپ تاستاۋىڭىزدى سۇرايمىز

                                                 قازاقستان رەسپۋبليكاسىنىڭ

 پرەمەر-مينءيسترى ك.ق.ماسىموۆكە

 

قۇرمەتتى كارىم قاجىمقانۇلى!

 

«قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى-قونى جانە  جۇمىسپەن قامتىلۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى پارلامەنتتىڭ قوس پالاتاسىنىڭ ماقۇلداۋىنان ءوتىپ، 24 قاراشا كۇنى ەلباسى قول قويدى.

اتالعان زاڭ جوباسىنىڭ 49-باپتىڭ 9) -تارماعىنداعى «اۋىر نەمەسە اسا اۋىر قىلمىس جاساعانى ءۇشىن الىنباعان نەمەسە وتەلمەگەن سوتتىلىعى بار» دەگەن ءسىز ۇسىنعان رەداكتسيا نەگىزىندە قابىلداندى. وسى «اشىق حاتتى» ەلباسىمىزدىڭ ەمەس، تىكە ءسىزدىڭ اتىڭىزعا جازىپ وتىرعانىمىزدىڭ دا سەبەبى سودان!

وسى زاڭعا سايكەس، شەتەلدەن ورالعان قانداستارىمىز تۇراقتى تىركەۋگە تۇرۋ ءۇشىن «سوتتىلىعىنىڭ» بار نەمەسە  جوقتىعىن دالەلدەۋ ماقساتىندا ءوزى كەلگەن مەملەكەتىنىڭ قۇزىرلى ورىندارىنان انىقتاما اكەلۋى كەرەك.

         ءبىز 49-باپتىڭ 9)-تارماعىنىڭ ەلىمىزگە شەتتەن قاۋىپ توندىرەتىن ەكسترەمي́زم مەن تەرروريزمنىڭ الدىن الاۋ ءۇشىن كەرەك ەكەنىن جاقسى تۇسىنەمىز.

            وكىنىشكە قاراي، «پاسپورتتاردى بەرۋ تۋرالى» 2006 جىلى 29 ساۋiردەگi قحر زاڭىنا سايكەس، بۇل ساناتتاعى قىتاي ازاماتتارىنا ۇلتتىق پاسپورتتار رەسiمدەلمەيدi. ناقتىلاپ ايتساق, «اۋىر نەمەسە اسا اۋىر قىلمىس جاساعانى ءۇشiن الىنباعان نەمەسە وتەلمەگەن سوتتىلىعى بار;» ازاماتتارعا شەتەلگە شىعۋعا تيىم سالىنعان.

            ول از دەسەڭىز، جاقىندا قىتاي ەلىنىڭ باس گازەتى «جەنمين جيباو» 2015 جىل، 25 تامىزداعى سانىندا قحر قوعام قاۋىپسىزدىك مينيسترلىگىنىڭ وسى جىلدىڭ 22 تامىزىنداعى بۇيرىعىنا سىلتەمە جاساي وتىرىپ، «قحر قوعام قاۋىپسىزدىك تاراۋلارى جاعىنان بەرىلمەيتىن 18 ءتۇرلى انىقتامانىڭ» تىزىمدىگىن جاريالاپتى.

سول «18 انىقتامانىڭ» 14-ءسى «سوتتىلىققا ياعني زاڭعا قايشى قىلمىسىنىڭ بار نەمەسە جوقتىعىنا» بايلانىستى انىقتاما ەكەن.

وندا:«كەز-كەلگەن جەكە تۇلعانىڭ قىلمىسقا قاتىستىلىعى جونىندەگى مالىمەت قوعامدىق قاۋىپسىزدىك مەكەمەلەرىنىڭ ىشكى شارۋاسى. سول سەبەپتى، مەملەكەتتىك اكىمشىلىك جانە ادىلەت مەكەمەلەرى جەكە تۇلعانىڭ ساياسي تولىمدىلىعىن تەكسەرگىسى جانە دە جەكە تۇلعاعا قاتىستى باسقا دا مالىمەتتەردى انىقتاعىسى كەلسە; ال، كاسىپ ورىندار مەن قوعامدىق مەكەمەلەر ءوز قارماعىنداعى اسا ماڭىزدى دەگەن لاۋازىمدى ورىندارعا تاعايىنداماقشى بولعان جەكە ادامدار جايلى تولىق ماعلۇمات العىسى كەلسە; انىقتاما تالاپ ەتكەن ورىننىڭ تەكسەرۋ وكىلەتتىگى بار قۇزىرەتتى ادامى ارنايى قىزمەتتىك كۋالىگىمەن جانە اتالعان مەكەمەلەردىڭ ارنايى قاتىناس حاتىمەن كەلگەن جاعدايدا عانا مالىمەت بەرىلۋى مۇمكىن. ال، اتالعان انىقتاما جەكە تۇلعانىڭ ءوز قولىنا بۇدان بىلايعى جەردە ەشقاشان بەرىلمەيدى» – دەلىنگەن!

قازىر بۇل بۇيرىق  جەرگىلىكتى جەرلەردە، اسىرەسە، شىڭجاڭ ولكەسىندە قاتاڭ اتقارىلىپ جاتىر. ەندىگى جەردە قىتاي قۇزىرلى ورىندارىنان، كىم بولۋىنا قاراماستان، جەكە تۇلعا ءۇشىن «سوتتىلىق» تۋرالى انىقتاما الۋدىڭ ەش مۇمكىندىگى جوق! قازاقستان رەسپۋبليكاسىنا كوشىپ كەلگەن ءبىر دە ءبىر ەتنيكالىق قازاق تۇراقتى تىركەۋگە تۇر الماي، تاعى دالادا قالايىن دەپ تۇر!

سوعان بايلانىستى، سىزدەن قازاقستان رەسپۋبليكاسىنىڭ ىشكى ىستەر مينيسترلىگىنە «قىتايدان كەلەتىن قانداستارىڭىزدى قينامايتىن ەتىپ، وسى ماسەلەنى نورماتيۆتىك-قۇقىقتىق قۇجاتتار ارقىلى رەتتەۋگە» بايلانىستى ناقتى پارمەن بەرۋىڭىزدى سۇرايمىز.

قۇرمەتپەن 

اشىق حاتقا 340 ادام قول قويدى


0 پىكىر