ەرشاتتىڭ قيىلىپ قالعان شىندىعى
اڭىزدىڭ اقىرى نەمەسە قۇلاقتاعى "لاپشا"
"التىن دومبىرا" ايتىسىندا ەفيردەن قيىلىپ قالعان ەرشاتتىڭ شىندىعى
سويلە ءتىلىم الاڭداما، تارتىنبا،
اڭعال قازاق، اقيقاتتى ال تىڭدا.
15 مينۋت شىندىق ايتىپ كەتەيىن،
15 ميلليون حالقىم باردا ارتىمدا.
بيىل ءبىزدىڭ بيلىك قالاي وزگەردى؟
كوكەلەردىڭ نە ىستەگەنىن كوز كوردى.
ەشتەڭە دە ىستەمەدى، ايتتى ولار
الدار كوسە ايتا الماعان سوزدەردى.
جاڭا جىلدى قاراشادا ويلادى،
سولاي ۇلتتىڭ تاعدىرىمەن وينادى.
ازاتتىقتىڭ تۋعان كۇنىن تويلاماي،
حريستياننىڭ ولگەن كۇنىن تويلادى.
تويلا دەسە تويلايمىز عوي، كونەرمىز،
شەتەلدەردىڭ تويىن تويلاپ ولەرمىز.
جاڭا جىلدى تويلاعىشتار، ناۋرىزدا
ۇلىس كۇنىن تويلار بولسا كورەرمىز.
ەي، كوكەلەر ازات ەلگە بول تۇتقا.
جاڭا جىلدى تويلايمىز دەپ قورقىتپا.
اقشاقاردان ءسابيرالار كەم بە ەدى؟
اياز اتا قايراتتاردان ارتىق پا؟
قارا حالىق جالداپ جاتىر ەسكى ۇيدە،
كوكەلەردىڭ كوكەيىن بۇل تەسپەيمە؟
جاڭا جىلدا شىرشالاردى كەسكىشتەر،
وزدەرىنىڭ جالاقىسىن كەسپەيمە؟
قارىنبايلار ەلىن ويلاپ ءىش تارتسىن،
ەكى قولعا ءبىر كۇرەكتەن ۇستاتسىن.
قايعىسى كوپ، ايلىعى از حالقىمدى،
قىزمەتىنەن قىسقارتۋدى قىسقارتسىن!
اقيقاتقا اينالماي تۇر كوپ ارمان،
مەن ادىلدىك تاپپاي ءجۇرمىن قوعامنان.
پايداسى جوق دەپۋدات كوپ سەناتتا،
قىسقارتۋدى باستاۋ كەرەك سولاردان.
ەي، كوكەلەر، جۇرە بەرمەي ەكى ويدا،
ەلدى توناپ، جەردى توناپ كەت ايعا.
ءار قازاقتىڭ باسپاناسى بولماسا،
جەرىمىزدىڭ كەڭدىگىنەن نە پايدا؟
بەيباق قازاق بەيبىت كۇندە مۇڭايدىڭ،
مەن سەن ءۇشىن ەڭىرەيمىن، جىلايمىن.
از قازاعىم شالقىپ ءومىر سۇرمەسە،
كوپتىگىنەن پايدا بارما مۇنايدىڭ.
ەي، كوكەلەر تىڭداڭدارشى مەنى دە،
قىسىق كوزدەر كوز سۇزبەسىن كەنىمە.
جەر استىنان شىعىپ جاتقان بايلىقتى،
بەرمەڭدەرشى اسپان استى ەلىنە.
اششى داۋسىم اشىنعاننان شىعادى،
مەن ول ءۇشىن بولا الماسپىن كىنالى.
تاپتاماسىن، ورىس، قىتاي، ۇيعۇرلار،
قازاقستان - قازاقتاردىڭ تۇراعى.
ەي، كوكەلەر، بيلىك ءۇشىن ميماندار،
اڭقاۋ ەلدىڭ ادالدىعىن سىيلاڭدار.
ءومىرىمدى قيساڭداردا وتىنەم،
ولەڭىمدى ەكراننان قيماڭدار.
قايران، قازاق، نە كورمەدىڭ، نە كوردىڭ؟
مەن سەن ءۇشىن بارلىعىنا كونەرمىن.
تاڭدايىما تۇسكەن ءسوزدى ايتتىم عوي،
ماڭدايىما جازىلعاندى كورەرمىن...
ەرشات قايبولدين
