19-مامىر كۇنى ەلوردا تورىندە بوكستان ايەلدەر اراسىندا الەم چەمپيوناتى وتەتىنىنەن حاباردار بولارسىز.  اتالعان دودادا ريو-دە-جانەيرو قالاسىندا بولاتىن جازعى وليمپيادا ويىندارىنا جولدامالار ساراپقا سالىنادى.

(نازىم يششانوۆا)

حالىقارالىق دودالاردا ەل نامىسىن قورعاپ، كوك بايراعىمىزدى كوككە كوتەرىپ، ءانۇرانىمىزدى الەم الدىندا اۋەلەتىپ جۇرگەن بوكسشى قىزدارىمىز از ەمەس. دەگەنمەن، وليمپيادالىق سالماق دارەجەسىندە (60 كگ.-رەد.) وسىعان دەيىن جاستار اراسىندا جەڭىمپاز اتانىپ، كوزگە ءتۇسىپ ۇلگەرگەن نازىم يششانوۆانىڭ ورنى بولەك، ارينە.

سونىمەن، ساناۋلى كۇننەن سوڭ، استانادا وتەتىن الەم چەمپيوناتىنا اتالعان سالماقتا (60 كگ.) ەل نامىسىن  اتىراۋلىق نازىم يششانوۆا قورعاۋى ءتيىس بولعان. سەبەبى، وسىعان دەيىن وتكەن ەل چەمپيوناتىن جەڭگەن نازىمنىڭ الەم چەمپيوناتىنا العان تىكەلەي جولداماسى بولعان.

الايدا قازاقستاننىڭ بوكس فەدەراتسياسى  استاناداعى جارىسقا نازىمدى جىبەرمەي، ونىڭ ورنىنا استانالىق ريمما ۆولوسەنكونى (قازاقستان چەمپيوناتى 2016- كۇمىس جۇلدەگەرى) وتكىزىپ جىبەرگەن.  

(ريمما ۆولوسەنكو)

فەدەراتسيانىڭ مۇنداي شەشىمىمەن كەلىسپەيتىن نازىم، «فەدەراتسيا ءوزىنىڭ جولىن كەسىپ، بارماق باستى، كوز قىستىلىققا سالىپ وتىر» دەپ ەسەپتەيدى.

«Abai.kz» پورتالىنا ارنايى حابارلاسىپ، كومەك سۇراپ، قازاقستاننىڭ بوكس فەدەراتسياسىنداعى سىبايلاس-جەمقورلىقتىڭ سالدارىنان ريو وليمپياداسىنىڭ جولداماسىنان قاعىلىپ قالايىن دەپ تۇرعانىن ايتقان نازىمنىڭ نازىنا قۇلاق ءتۇرىپ كورگەن ەدىك.

نازىم يششانوۆا، بوكسشى:

-ەل چەمپيوناتى بىلتىر قازان ايىندا وتكەن بولاتىن. مەن ول كەزدە 60 كگ-دا چەمپيون اتاندىم. نەگىزى چەمپيونات جىلىنا ءبىر-اق رەت وتكىزىلۋى ءتيىس قوي. سودان كوپ ۇزاماي، 6 ايدان سوڭ، اقپان ايىندا  قازاقستان چەمپيوناتىن قايتا وتكىزدى. ول جەردە دە مەن ءوز سالماعىمدا چەمپيون اتاندىم. ەل چەمپيوناتىن ۇتقان ادامعا الەم چەمپيوناتىنا تىكەلەي جولداما بەرىلەدى عوي. مەن ءسويتىپ، ءبىر ەمەس ەكى رەت ۇتىپ الدىم. ال بەلگىسىز ءبىر سەبەپتەرمەن،  19 مامىر كۇنى استانادا  بولاتىن بوكستان ايەلدەر اراسىنداعى الەم چەمپيوناتىنا مەنى جىبەرمەي، قازاقستان ىشىندە مەنەن ەكى رەت جەڭىلىپ قالعان استانالىق ريمما ۆولوسەنكونى وتكىزىپ وتىر. بۇل ادىلەتسىزدىك قوي. مەن ءوز كۇشىممەن ريممانى ءبىر ەمەس، ەكى رەت جەڭىپ كەتتىم. سوندا بوكس فەدەراتسياسى قانداي كريتەريلەر بويىنشا ريمما ۆولوسەنكونى وتكىزىپ وتىر؟ مەنىڭ باپكەرلەرىم دە مۇنى تۇسىنە الار ەمەس.

مەنىڭ ورنىما وتكىزىپ وتىرعان ريمما ۆولوسەنكو دەگەن قىز استانادان ەكەن. ونىڭ سپورتتىق دارەجەسى دە جوق، سەنەسىز بە؟.. قاراپايىم سپورت شەبەرلىگىنە ۇمىتكەر دە ەمەس.

ءدال وسى سالماقتا مەن ءۇش رەت الەم چەمپيوناتىنا باردىم. 2013 جىلى بولگاريادا وتكەن الەم چەمپيوناتىندا قولا جۇلدە الدىم. ال 2015 جىلى قىتايدىڭ تايپەيىندە وتكەن ءاچ-دا مەن تاعى دا قولا جۇلدەگەر اتاندىم. بوكستان سپورت شەبەرى دەگەن دارەجەم تاعى بار.

فەدەراتسيا مەنىڭ جولدامامدى زاڭسىز جولمەن استانالىق قىزعا بەرىپ بەرىپ جىبەرگەندىكتەن، سىزدەرگە حابارلاسىپ وتىرمىن. مەيلى، ەگەر ريمما مەنى تازا جەڭىپ الاتىن بولسا، مەن ەشتەڭە دەمەس ەدىم. بىراق، ءبىر ەمەس ەكى رەت مەنەن فينالدا ۇتىلىپ قالعان عوي. ونىڭ ۇستىنە بۇل ريو جولداماسى ساراپقا سالىناتىن ماڭىزدى جارىس. ەگەر مەن وسى جارىسقا قاتىسپايتىن بولسام، بىراق بۇل مەن ريوعا بارمايدى دەگەن ءسوز ەمەس. ول ءۇشىن مەن بارلىق جارىستاردى جەڭىپ كەلدىم عوي.

بەيبىت يششانوۆ، جەكە باپكەرى، اكەسى:

-ءبىز فەدەراتسيانىڭ مۇنداي شەشىمىمەن كەلىسپەيمىز. وسى ماسەلەگە قاتىستى پرەسس-كونفەرەنتسيا وتكىزگەلى جاتىرمىز. قازاقستان بوكسىنا بەي-جاي قارامايتىن  وتانداستىرىمىز ءبىزدىڭ نازىمنىڭ سپورتتاعى، سونىڭ ىشىندەگى بوكستاعى قارىم-قابىلەتىن جاقسى بىلەدى.  حالىقارالىق ارەنادا ەلىمىزدىڭ بەدەلىن لايىقتى جەڭىستەرىمەن ءوزىن مويىنداتقان نازىم قورعاۋى ءتيىس بولاتىن. وكىنىشكە وراي قازاقستاننىڭ بوكس فەدەراتسياسى قويىرتپاق جاساپ، بەلگىسىز سەبەپتەرمەن (كەيبىر تانيتىن كىسىلەردىڭ ايتۋىنشا، ريمما ۆولوسەنكو وسى جولدامانى ساتىپ الىپتى) نازىمنىڭ ورنىنا استانالىق ريمما ۆولوسەنكونى وتكىزىپ وتىر. ءبىز ادىلەتتىلىكتى قوعامنان ىزدەيمىز. ءدال وسىنداي جولمەن نازىمنىڭ بەتىنەن قاعىپ، سىبايلاستىققا سالىنىپ وتىرۋى وكىنىشتى. مىنا استانى قالالىق سپورت باسقارماسىنىڭ باسشىسى بەرىك بارلىبايۇلى مىرجىقپاەۆ دەگەن كىسىنىڭ  دايىنداپ وتىرعان قىزى – وسى ريمما ۆولوسەنكو. وسىنىڭ الدىندا مىرجىقپاەۆ قىزىلوردادان ماريا ۆولنوۆانى استاناعا اكەلىپ، كوتەردى. ءتىپتى وليمپيادا جۇلدەگەرى ەتتى. كەيىن ماريا ءوزى ول كىسىدەن كەتىپ قالدى. وسىدان كەيىن مىرجىقپاەۆ اشۋلانىپ، ءدال ماريا سەكىلدى ريممانى دا الىپ شىعامىن دەگەن ەكەن. مىرجىقپاەۆتىڭ قانداي ادام ەكەنىن وسى فەدەراتسياداعى بارلىق باپكەرلەر جاقسى بىلەدى. ءتىپتى، ودان سەسكەنەتىنى دە وتىرىك ەمەس.

نەگىزى ريمما ءبىزدىڭ نازىممەن ەكى رەت جەكپە-جەككە شىعىپ جەڭىلىپ قالعان. فەدەراتسيا بولسا، «نازىم ءالى جاس قوي، كەيىن دە شىعادى» دەگەن سىلتاۋلار ايتىپ وتىر. راس، جاس، كەيىن دە شىعا جاتار. بىراق، قازىر بولايىن دەپ تۇرعان كەزىندە بەتىن قاققانىمىز ادىلەتسىزدىك قوي.

ونىڭ ۇستىنە قبف نازىمعا ۇسىنىس جاساپ، استانانىڭ اتىنان شىعۋدى ايتقان. ءبىز بۇعان كەلىسپەگەن ەدىك. ءبىز ءوزىمىزدىڭ جەردىڭ، اتىراۋدىڭ اتىنان قاتىسىپ ءجۇرمىز. نازىمنىڭ جولىن كەسىپ وتىرعان دا وسى بولۋى كەرەك.

ءبىزدىڭ تالابىمىز بىرەۋ عانا. جاڭاعى ريمما دەگەن قىز بەن نازىمنىڭ اراسىندا جەكپە-جەك وتكىزەيىك. جانە وعان باق وكىلدەرى قاتىسسىن. سول جەردە قايسى قىز جەڭەدى، مىنە سول بارسىن. بۇل ادىلەتتى شەشىم بولار ەدى. سەبەبى، استاناداعى  جارىستا ريو وليمپياداسىنىڭ جولداماسى ساراپقا سالىنادى. مۇمكىن بۇل ريوداعى قازاقستاننىڭ التىنى بولۋى مۇمكىن عوي.

رەداكتسيادان: اتالعان ماسەلە بويىنشا ءبىز قبف-مەن  بايلانىس ورناتا المادىق. الداعى ۋاقىتتا قازاقستاننىڭ بوكس فەدەراتسياسىنىڭ نازىم يششانوۆانىڭ بازىناسىنا قاتىستى پىكىرىن جاريالايتىن بولامىز.

سپورتتىق جەتىستىكتەرىنە قاراي باعالايتىن بولساق، ارينە نازىم يششانوۆانىڭ   جولىن بوكس فەدارتسياسى كەسىپ وتىر دەپ اشىق ايتۋعا بولادى. نازىمنىڭ جولداماسى ريمما ۆولوسەنكوعا قانداي جولمەن بەرىلگەنىن قبف ءتۇسىندىرۋى ءتيىس.  

نۇرگەلدى ابدىعانيۇلى

Abai.kz