الماتى  سياقتى ەڭ ءىرى مەگاپوليستى وڭىرلەردەن جەتكىزىلەتىن ساپالى ازىق-تۇلىكپەن قامتاماسىز ەتۋ  يمپورتتى الماستىرۋ ماسەلەسىنىڭ شەشىمىن تابۋعا دا سەپتىگىن تيگىزەدى

الماتى قالاسىندا العاش رەت اۋىلشارۋاشىلىق تاۋارلارىن تىكەلەي وتكىزۋدى كووپەراتسيالار ارقىلى دامىتۋ جونىندە ايماقارالىق جيىن ءوتتى. «اتامەكەن» ۇلتتىق كاسىپكەرلەر پالاتاسى مەن الماتى قالاسىنىڭ اكىمدىگى بىرلەسىپ ۇيىمداستىرعان جيىنعا قازاقستاننىڭ ءار ايماعىنان 300-دەن اسا كاسىپكەر كەلدى. كەڭەسكە «اتامەكەن» ۇكپ تورالقاسىنىڭ توراعاسى تيمۋر قۇلىباەۆ،  الماتى قالاسىنىڭ اكىمى باۋىرجان بايبەك جانە الماتى وبلىسىنىڭ اكىمى اماندىق باتالوۆ قاتىستى.

الماتى اكىمىنىڭ ايتۋىنشا، بۇگىنگى تاڭدا ەلىمىزدەگى ەڭ ءىرى مەگاپوليس بولىپ وتىرعان الماتى قالاسى ايماقتىق اۋىلشارۋاشىلىق ونىمدەرىن تۇتىنعىسى كەلەدى ەكەن.  تۇرعىنداردى تازا ەكولوگيالىق وتاندىق ونىمدەرمەن قامتاماسىز ەتۋ ماقساتى كوزدەلۋدە. «ساپالى تاۋار ءوندىرىپ، ونىڭ لوگيستيكالىق ماسەلەسىن جولعا قويىپ جانە ونى ساۋداعا شىعارۋدىڭ تىكەلەي جولدارىن قاراستىرۋ قاجەت. كاسىپكەرلەرگە سەرىكتەستەر تاۋىپ، بىلىكتى ماماندارمەن قامتاماسىز ەتىپ، جۇمىسسىزدىق ماسەلەسىن دە شەشۋگە بولادى.  سونداي-اق، ساۋدا دەلدالدارىنسىز جۇمىس جاساۋعا كوشكەن ءجون. ايماقتىق اۋىلشارۋاشىلىق كاسىپورىندارىنىڭ ەلىمىزگە بەلگىلى ساۋدا جەلىلەرىمەن كەلىسىمگە كەلۋىنە جانە ولاردىڭ ونىمدەرىن تاسىمالداۋعا كومەك كورسەتىلۋى ءتيىس. اۋىل شارۋاشىلىعى ونىمدەرىنىڭ ساتىلىمعا شىعارۋ جولىن جاڭا قالىپقا ءتۇسىرىپ، يننوۆاتسيالىق دامۋعا قادام جاساۋ كەرەك، – دەدى قالا اكىمى جەكسەنبى سايىن وتكىزىلەتىن اۋىلشارۋاشىلىق جارمەڭكەسى تۋرالى تاقىرىپقا ويىسىپ. – ايماقتاردان جەتكىزىلەتىن اۋىل شارۋاشىلىعى ونىمدەرىنە ارنالعان جارمەڭكەلەردىڭ سانىن وسى جىلى 800-گە جەتكىزۋ جوسپارلانعان.  ماسەلەن، وتكەن جىلى 750-ءى وتكىزىلدى. ءوتىپ جاتقان جارمەڭكەلەردەگى ازىق-تۇلىكتەردىڭ باعاسى نارىقتاعى باعادان 20-30%-عا ارزان».

ال، الماتى وبلىسىنىڭ اكىمى اماندىق باتالوۆتىڭ سوزىنە قاراعاندا، الماتى وبلىسى تىرشىلىككە قاجەتتى بارلىق ازىق-تۇلىك ونىمدەرىن وندىرەدى جانە الماتى قالاسىن مۇمكىندىگىنشە قامتاماسىز ەتىپ وتىر. دەسە دە لوگيستيكالىق ورتالىقتاردى جۇيەلەپ، ولاردىڭ قىزمەت كورسەتۋ ساپاسىن ارتتىرۋ قاجەت.  سونداي-اق، ازىق-تۇلىك قويمالارىن جانە ولاردى ساقتاۋ ماسەلەسىن رەتتەۋ كەرەك. ودان كەيىن ساۋدا ورتالىقتارىنا تىكەلەي جەتكىزۋ وزەكتى بولىپ وتىر ەكەن.

بۇگىنگى تاڭدا الماتى وبلىسى ۇساق كاسىپورىنداردى ىرىلەندىرۋگە بايلانىستى ناۋقاندى ءساتتى اتقارىپ كەلەدى.  ماسەلەن، كووپەراتسياعا بىرىكتىرۋدىڭ ناتيجەسىندە 74 200 گەكتار جەرگە قانت قىزىلشاسى ەگىلىپ، بۇرىن-سوڭدى بولماعان ۇلكەن كورسەتكىشكە قول جەتكىزىلۋدە.  بارلىعى 125 مىڭ توننا قانت قىزىلشاسى جينالىپ، دايىن ءونىم شەتەلگە ەكسپورتتالعان.  وسى جىلى تەك قانا شاعىن جانە ورتا كاسىپكەرلىكتىڭ وزىنەن جەرگىلىكتى بيۋدجەتكە 132 ملرد تەڭگە پايدا تۇسكەن. الداعى ۋاقىتتا بۇل جۇمىس جالعاسىن تاپپاق.

abai.kz